काठमाडौं– सत्तारुढ दल नेकपाभित्रको पछिल्लो राजनीतिक दाउपेचले प्रारम्भमा गरिएका अनुमानहरुभन्दा अलग हिसाबको घुम्ति तय गर्दैछ। बहुप्रतिक्षित शनिबारको नेकपा सचिवालय बैठकमा प्रधानमन्त्री केपी शर्मा ओलीले विवादित भएका कतिपय निर्णयका बारेमा आत्मआलोचना गरेका छन्। र, दाउपेचका एक प्रभावशाली पात्र बामदेव गौतमलाई उपयुक्त समयमा प्रतिनिधि सभा सदस्य बनाउन निर्णय गरिएको छ।
‘घेराबन्दी’मा परेका भनिएका प्रधानमन्त्री ओलीबारे यसअघि शनिबार दिउँसोमात्रै सचिवालयमा बहुमत सदस्यहरु उनलाई प्रधानमन्त्रीबाट नहटाउने पक्षमा रहेका समाचारहरु सार्वजनिक भएका थिए। सचिवालय बैठकले स्थायी कमिटीको बैठक बोलाएको छ। यससँगै प्रधामन्त्री ओलीले नैतिकताका आधारमा राजीनामा दिनुपर्ने ओलीइतर समूहको एजेन्डा धुमिल बनेको राजनीतिक विश्लेषणहरु सतहमा आउन थालेका छन्।
प्रधानमन्त्री ओलीको शासनमाथि धावा बोलिरहेको कार्यकारी अध्यक्ष पुष्पकमल दाहाल ‘प्रचण्ड’ नेतृत्वको समूह आसन फेरेर फर्किएको छ। नैतिकताको हतियार बोकेर ओलीलाई पार्टी नेतृत्व र प्रधानमन्त्रीबाट राजीनामा गराउन बालुवाटार पुगेको भैंसेपाटी बटालियन तितरबितर भएको छ।
बम बोकेर बसेका ओलीले हानेको पद लोलुप टियर ग्याँसबाटै टोली लाखापाखा लागेको छ। शासन फेर्न तम्सिएका कार्यकारी अध्यक्ष प्रचण्ड तत्कालका लागि आसनमा चित्त बुझाउन पुगेका छन्। उनी स्वभाविक रुपमा पाउनुपर्ने शक्ति र हैसियत किस्ताबन्दीमा पाइरहेका छन्। नेकपामा ओली दाताको रुपमा देखिएका छन् भने प्रचण्ड प्राप्तकर्ताको।
नेकपा अध्यक्ष पुष्पकमल दाहाल प्रचण्ड प्रधानमन्त्री तथा अर्का अध्यक्ष केपी ओलीको दाउपेचका शिकार पार्टी एकीकरण गरेदेखि नै भइरहेका छन्। सुरुमा अध्यक्ष प्राप्त गरे, अधिकार पाएनन्। पाँच वर्षे शासनकालमा साढे २ वर्ष प्रधानमन्त्री बन्न पाउने तमसुक अध्यक्षका अघि ’कार्यकारी’ थप्ने क्रममा च्यात्नुपर्यो।
कार्यकारी अध्यक्ष पाएपनि काम गर्न पाइरहेका छैनन्। पार्टीले सरकार चलाउने भनिएको थियो। कम्युनिस्ट पार्टीमा त झन् अनिवार्य शर्त हो। तर महत्वपूर्ण अध्यादेश समेत बजारमा हल्लाखल्ला भइसकेपछि थाहा हुन्छ। सचिवालयमा राष्ट्रिय सभामा पठाउने व्यक्तिको टुंगो लगाएर निर्णय गरिन्छ। अध्यक्ष समेत रहेका प्रधानमन्त्री ओली त्यसलाई कार्यान्वयन नगर्न उद्दत हुन्छन्।
विशाल कम्युनिस्ट पार्टीको कमजोर कार्यकारी अध्यक्ष प्रचण्डलाई केही समयअघि चुप नलाग्ने झोंक चल्यो। पार्टीमा असन्तुष्ट नेता त प्रशस्त पुगिसकेका थिए। उनीहरुलाई साथ लिएर पार्टी र सरकारमा एकलौटी शासन गरिरहेका ओलीको आसन हल्लाउने तयारी गरे। पूर्व प्रधानमन्त्री तथा पार्टीका वरिष्ठ नेताहरु माधव नेपाल, झलनाथ खनाल, उपाध्यक्ष बामदेव गौतमसमेत साथ भएपछि उनलाई लागेको थियो, ओलीलाई सबक सिकाउन सकिन्छ।
सचिवालयको निर्णय विफल
गौतमलाई उपयुक्त समयमा प्रतिनिधि सभामा लैजाने निर्णयसँगै यसअघि सचिवालयले गरेको राष्ट्रिय सभामा सिफारिसको निर्णय विफल भएको छ। गत फागुन १४ गते बसेको नेकपा सचिवालय बैठकले बामदेव गौतमलाई राष्ट्रिय सभामा सिफारिस गर्ने निर्णय गरेको थियो।
राष्ट्रिय सभा सदस्य प्रधानमन्त्री बन्ने प्रावधान नभएसम्म त्यता नजाने अडान लिएका गौतम राजी भएका थिए। तर, प्रधानमन्त्री ओलीले सांसद बनाउने सरकारको अधिकार रहेको बताउँदै उक्त निर्णयलाई सैद्धान्तिकको संज्ञा दिए। केही दिनपछि वरिष्ठ नेता माधव नेपालसँग बालुवाटारमै भेटेर भने, ‘वामदेवलाई राष्ट्रिय सभामा ल्याउने होइन, युवराज खतिवडालाई हटाउने षड्यन्त्र हो। यो निर्णय म मान्दिनँ, सरकारको अधिकारको कुरा हो।’
सचिवालयको यो निर्णय नमान्ने ओलीको चाहना पूरा भएको छ। गौतमलाई प्रतिनिधी सभामा लैजाने निर्णयसँगै राष्ट्रिय सभाको रिक्त कोटामा खतिवडा पक्का भएका छन्। आगामी कार्यकाल पनि अर्थमन्त्री उनी नै निरन्तरता दिनेछन्।
भैंसेपाटी समूहको उदय र पतन
तत्कालीन सभामुख कृष्णबहादुर महरामाथि बलात्कारको आरोप लाग्यो। उनले राजीनामा दिएपछि रिक्त बनेको प्रतिनिधी सभाको सभामुख सुवास नेम्वाङलाई ओलीले निकै कसरत गरे। तर, प्रचण्डले आफूनिकटका अग्नि सापकोटालाई सभामुख बनाउन अड्डी कसे। सचिवालयका धेरै सदस्यले उनलाई साथ दिए। प्रचण्डले प्रस्ताव गरेको व्यक्ति सभामुख हुने सचिवालयका बहुमत सदस्यको धारणापछि ओली पछाडि हट्नुपर्यो।
नेम्वाङलाई सभामुख बनाउन नदिनुमा बामदेव गौतमको भूमिका रहेको ओलीको बुझाइ थियो। किनभने बामदेव निवास भैंसैपाटीमा भएको बैठकले सभामुख पूर्व माओवादीलाई दिने निर्णय गर्यो। यहीबाट यो गुटको उदय भएको थियो। उक्त बैठकमा प्रचण्डसहित झलनाथ खनाल, माधवकुमार नेपाल, गौतम र नारायणकाजी श्रेष्ठ थिए।
भैंसीपाटीमा यसरी ओलीविरुद्ध भएको एकताले केही दिनअघिसम्म निरन्तरता पायो। भैंसेपाटी मोर्चा नेकपाभित्र हाबी भइरहेको थियो। तत्काललाई यो मोर्चा छिन्नभिन्न बनाउन सफल भएका छन्।
भैंसेपाटी समूहका कारण डगमगाउन खोजेको उनको आसन जोगिएको छ। स्थायी कमिटीको बैठकमा ओलीको कार्यशैलीमाथि औंला तेर्सिने सम्भावना त कायम छ। तर सचिवालय नै नरम भइसकेपछि त्यो गरम बहश मनको भँडास पोख्नका लागि मात्रै हुनेछ। फेरि एकपल्ट ओली सफल राजनीतिक खेलाडि दरिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778036869.gif)
-1764146706.png)
