शालिकराम चालिसे
नुवाकोट- राष्ट्रिय गौरवको आयोजनाको रूपमा विस्तार भइरहेको गल्छी–त्रिशूली–मैलुङ–स्याफ्रुबेसी रसुवागढी सडकखण्डको मुआब्जा वितरणको तयारी अन्तिम चरणमा पुगेको छ।
आयोजनाले मुआब्जा वितरणको लागि नुवाकोटको ढुङ्गेदेखि शान्तिबजारसम्मका करिब ८ सय जग्गाधनीको नाम प्रकाशित गरेको हो। आयोजनाले सडकको केन्द्रबिन्दुदेखि १५/१५ मिटर दायाँबायाँ जग्गा पर्ने र सडकमा पर्ने धनीलाई सामाजिक न्यायका आधारमा उचित मुआब्जा उपलब्ध गराउने आयोजनाका इन्जिनियर कृष्णकुमार महतोले बताए।
सडक आयोजनाले प्रभावितहरुलाई स्थानीय मूल्य अनुसारको मुआब्जा दिन नसकिने तर मालपोत कार्यालयले गरेको मूल्यांकन कम हुने भएकोले सहमति गराएर मुअब्जा वितरण गरिने उनको भनाइ छ।
आयोजना निर्माण सुरु भएको लामो समय बितिसक्दा पनि निर्माण योजनाको काम १८ दशमलव ५ प्रतिशत मात्र प्रगति भएको छ।
मुअब्जाको विषय नटुंगिँदा बट्टार,विदुर ढुङ्गे तथा गंगटे लगायतका क्षेत्रमा सडक निर्माणको काम सुरु हुन सकेको छैन। विदुर नगरपालिका क्षेत्रका जग्गाधनीले पहिले जग्गाको उचित मूल्याङ्कन हुनुपर्ने र सडकको मध्यरेखाको विषयमा प्रस्ट हुनुपर्ने बताएपछि काम अघि बढ्न नसकेको हो।
आयोजनाले जग्गा ऐन २०३४ को दफा २५ मा टेकेर मुअब्जा वितरण गर्ने तयारी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
