काठमाडौं– प्रधानमन्त्री तथा नेकपा अध्यक्ष केपी शर्मा ओलीका पक्षमा बहुमत सांसद र केन्द्रीय सदस्य रहेको ‘सन्देश’ दिनेगरी तयारी थालिएको छ। नेकपाका अर्का अध्यक्ष पुष्पकमल दाहाल प्रचण्डसँग मंगलबार बेलुकी भेटवार्तामा ‘चर्काचर्की’ भएपछि प्रधानमन्त्री ओलीले यस्तो तयारी गरेको बुझिएको छ।
ओलीले उपत्यकामा रहेका आफूनिकट नेकपाका सांसदहरुलाई बालुवाटारमा बोलाएका छन्। दिउँसो १ बजे बैठक बस्नेगरी आफूहरुलाई बोलाइएको ओलीनिकट एक सांसदले बताए। उनले भने, ‘अर्का अध्यक्ष प्रचण्डले आफूलाई एकल अध्यक्ष नदिइए जे पनि हुन सक्ने चेतावनी दिनुभएछ। त्यसकारण प्रधानमन्त्री ओली पक्षका हामीले आफ्नो तयारी गर्न लागेका हौं।’
उनका अनुसार प्रधानमन्त्री ओलीका पक्षमा हस्ताक्षर अभियानसमेत आजै सुरु हुनेछ। बेलुकीसम्म बहुमत नेकपा सांसद ओलीको पक्षमा रहेको सन्देश प्रवाह हुनेगरी सूची र हस्ताक्षर सार्वजनिक हुन सक्छ । उनले भने ‘हामीसँग बहुमत रहेको एक झलक आजै दिइनेछ।’
नेपाललाई अध्यक्ष बनाउन ओली तयार!
अध्यक्ष प्रचण्डले एकल अध्यक्षको अपेक्षा गरेपछि प्रधानमन्त्री ओलीले तीन अध्यक्षको प्रस्ताव गरेका थिए। ओलीले पार्टीका वरिष्ठ नेता माधव नेपाललाई समेत अध्यक्ष बनाउने कुरामा आफू सकारात्मक रहेको बताएको ओलीनिकट ती सांसदले बताए। उनले भने, ‘उहाँ (प्रधानमन्त्री) तीन अध्यक्ष भएर काम गर्न तयार हुनुहुन्छ। तर एकल अध्यक्षका लागि चाहिँ महाधिवेशन पर्खिन भन्नुभएको छ।’
तीन अध्यक्षको प्रस्ताव आएपछि झलनाथ खनालले समेत आफूलाई अध्यक्षका लागि दाबी गरेका छन्। त्यसपछि बामदेव गौतम र रामबहादुर थापालाई समेत अध्यक्ष बनाएर ‘अध्यक्ष मण्डल’ गठन गर्ने विषयमा दुई अध्यक्षबीच कुराकानी भएको ती सांसद बताउँछन्। अध्यक्ष मण्डलको संयोजक आफूलाई बनाउनुपर्ने, त्यसो नगरिए पार्टी फुटाएर कांग्रेस र जसपासँग मिलेर सरकार बनाउने तहको धम्की प्रचण्डले दिएको आरोप ओली पक्षका नेताहरुको छ। तर, प्रचण्ड पक्षका नेताहरु भने त्यो तहसम्मको कुराकानी नभएको बताइरहेका छन्।
मंगलबार साँझ भएको दुई अध्यक्षबीचको भेटवार्ता सौहार्द नरहेको भने ओली पक्षका नेताहरुको तयारीले संकेत गर्छ। ओलीनिकटस्थ ती नेता भन्छन्, ‘सकभर लचिलो हुने हो। तर, पेल्न खोजियो भने लत्रिनेचाहिँ होइन। हामी त्यहीअनुसार तयारी गरिरहेका छौं।’
बालुवाटारमा ओलीनिकट नेताहरु जम्मा हुन थालिसकेका छन्। सबै जम्मा भएपछि १ बजे प्रधानमन्त्री ओलीले सम्बोधन गरेर आगामी रणनीति तय गर्ने कार्यक्रम रहेको बुझिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768546075.png)
-1764146706.png)
-1768395492.png)
