काठमाडौं– नेपाल उद्योग वाणिज्य महासंघकी अध्यक्ष भवानी राणाले सरकारले स्वदेशी तथा विदेशी लगानी भित्र्याउन र बढाउन तत्काल आधारभूत ६ काम पूरागर्नु पर्ने बताएकी छिन्।
महासंघको ५२औं वार्षिक साधारणसभा तथा उद्योग वाणिज्य दिवसका अवसरमा अध्यक्ष राणाले मुलुकमा प्रसस्त मात्रामा लगानीका अवसर रहे पनि लगानीमैत्री वातावरण नभएको बताइन्।
उद्योग वाणिज्य दिवसको उद्घाटन गर्न पुगेका प्रधानमन्त्री केपी शर्मा ओली समक्ष उनले लगानी भित्र्याउन सरकारले तत्काल सैद्धान्तिक तथा नीतिगत कुरामा सुधार गर्न आवश्यक रहेको बताएकी हुन्।
उनले भनिन्, ‘प्रधानमन्त्रीले अघि सारेको ‘सम्वृद्ध नेपाल र सुखी नेपाली’को अभियानमा सिंगो मुलुकलाई आर्थिक विकासको एकल शुत्रमा अगाडि लैजान सक्छौं। तर सोही अनुसार विकासका कार्यक्रम तीव्र रुपमा अगाडि बढ्ने वातावरण पनि चाहिन्छ।’
राणाले देशलाई समृद्धिको अभियानमा लैजान कार्यशैली र दृष्टिकोणमा परिर्वतन गर्न तयार हुनुपर्ने बताइन्। उनले भनिन्, ‘मुलुकको आर्थिक अवस्थालाई यर्थाथपरक भएर हेर्ने हो भने अझै पनि नेपालमा लगानीको वातावरण त्यति उत्साहजनक बन्न सकेको देखिँदैन।’
उद्योग वाणिज्य महासंघका तर्फबाट अध्यक्ष राणाले लगानीको आधार तयार गर्न तत्काल निम्न ६ काम गर्नुपर्नेमा जोड दिइन्।
ऊर्जा विकास
उद्योग व्यवसाय र लगानी आकर्षणका लागि सबैभन्दा महत्पवूर्ण भनेको ऊर्जाको पर्याप्त आपूर्ति हो। नयाँ उद्योग राख्न चाहनेले मागेका बखत ऊर्जा दिन सक्यौं भने लगानीको वातावरण बन्छ। पछिल्लो समय मुलुकका धेरै भाग लोडसेडिङ मुक्त भइसकेको छ। औद्योगिक क्षेत्रमा पनि अघिल्ला वर्षको तुलनामा लोडसेडिङको मात्रा न्यून भएको त छ तर यसलाई पूर्ण रुपमा अन्त्य गर्नुपर्छ।
पुराना ऐन कानुनको संशोधन/खारेज
अहिले पनि हामी निकै पुराना ऐन कानुनबाट निर्देशित छौं। तत्कालीन परिस्थितिमा आएका कतिपय कानुन आजको सन्दर्भमा अव्यवहारिक एवं प्रगतिका बाधक रहेकाले संशोधन वा खारेज आवश्यक रहेको हाम्रो ठम्याई छ। कतिपय पुराना ऐन नियमका कारण उद्योग व्यवसाय क्षेत्रले आफूलाई राष्ट्रिय अन्तर्राष्ट्रिय प्रतिस्पर्धामा खरो उतार्न असमर्थ भइरहेको छ। कालो बजारी ऐन, भूमि सुधार ऐन, वन ऐन, वातावरण ऐन लगायतका थुप्रै ऐन चाँडै संशोधन गर्न जरुरी छ।
स्वदेशी उद्योगलाई प्रोत्साहनसहितको नीति
विगतमा राजनीतिक अस्थिरता, शान्ति सुरक्षाको कमजोर अवस्था, ऊर्जाको चरम अभाव जस्ता कारणले मुलुकभित्रका उद्योगधन्दा निरन्तर ओरालो लाग्न गए। उक्त परिस्थितिमा हाल सुधार आए पनि हाम्रा उद्योगधन्दा निर्वाध सञ्चालन हुन सकेका छैनन्। मुलुकभित्र उद्योग व्यवसायको विकास र विस्तारका लागि राज्यका तर्फबाट प्रोत्साहनसहितको विशेष नीति हुनुपर्छ।
ब्याजदरमा सुनिश्चितता
उद्योग व्यवसाय सञ्चालन गर्न निश्चित अवधिका लागि लिइएको ऋणमा महिनामै पटक–पटक ब्याजदर बढाउँदा उद्योगी व्यवसायी निकै अप्ठ्यारोमा परेका छन्। यस्ता निर्णय गर्दा त्यसले उद्योग व्यवसाय र स्वयं बैंकलाई पनि असर पार्यो। त्यसकारण आगामी दिनमा ब्याजदरको सुनिश्चितता गराउनुपर्छ।
समृद्धि अभियान दशक घोषणा
२०७५–२०८५ को अवधिलाई ‘समृद्धि अभियान दशक’ का रुपमा घोषण गरियोस्। पूर्वाधार विकास, औद्योगिकीकरण विस्तार, पर्यटन, ऊर्जा र कृषि क्षेत्रलाई केन्द्रबिन्दुमा राखेर ‘समृद्धि अभियान दशक’ का लागि रणनीति तथा कार्यक्रम तत्काल सार्वजनिक गर्न आवश्यक छ।
दोहोरो करको समस्या
दोहोरो कर तिर्न नपर्ने सुनिश्चितता गरियोस्। नेपालमा व्यवसाय लागत निकै बढी भएकाले व्यावसाय लागत घटाउन राज्यको विशेष नीति आवश्यक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
