काठमाडाैं- वैदेशिक रोजगार व्यवसायी संघका पूर्वअध्यक्ष राेहन गुरुङले कोरोना महामारीको कारण कम्पनी बन्द हुँदा खाडी र मलेसियामा समस्यामा परेका नेपाली कामदारबारे सरकारले वास्ता नगरेकाे आराेप लगाएका छन्। उनले उद्धारको पर्खाइमा बसिरहेका हजारौं कामदारको पीडा सरकारले नसुनेको बताए।
'कोरोना महामारीको कारण कम्पनी बन्द हुँदा खाडी र मलेसियामा रहेका नेपाली कामदारहरुलाई खानको समस्या परेको देखिन्छ। उद्धारको पर्खाइमा बसिरहेका हजारौं कामदारको पीडा न वैदेशिक राेजगार बोर्डले न सरकारले सुनेको छ,' नेपाल लाइभसँग गुरुङले भने।
वैदेशिक रोजगार बोर्डको कोष सञ्चालन नियमावली २०६४ मा नेपाली कामदार कार्यरत विदेशी मुलुकमा युद्ध, महामारी रोगको कारण नेपाली कामदार असुरक्षित देखिएमा कोषको रकम प्रयोग गर्न मिल्ने स्पष्ट व्यवस्था भएपनि ब्याज खाएर बस्ने बाहेक बोर्डले अरु कुनै काम गर्न नसकेकाे उनले बताए। उनले वैदेशिक रोजगार बोर्डका कर्मचारी तलब भत्ता खान मात्र रहेकाे बताए।
गुरुङले भने, 'जीवित हुँदा कामदारले कुनै सहयोग नपाउने वैदेशिक रोजगार बोर्ड कर्मचारीलाई तलब र भत्ता खान राखिरहनु औचित्य र आवस्यक छैन।' उनले एक छाक खानाको व्यवस्था गर्न वैदेशिक रोजगार संघको उपस्थितिसमेत नदेखिएकाे बताए। समस्या पर्दा सहयोग गर्ने विश्वास दिलाएर पैसा जम्मा गर्न लगाउने बोर्डले हालसम्म खानको लागि कुनै सहयोग रकम नपठाएको उनकाे भनाइ छ। एनआरएनलगाएत विभिन्न संस्थाले सहयोग नगरेको भए हजारौं नेपाली भोकै हुने समाचारहरु सुन्दा दुःख लागेकाे उनले बताए।
वैदेशिक रोजगारीमा जाने नेपाली कामदारहरुको संरक्षण गर्न वैदेशिक रोजगार बोर्डको स्थापना भएपनि बोर्डको पैसा कर्मचारीहरुले तलब भत्ता खान र मृत्यु भएका कामदारका परिवारलाई आर्थिक सहयोग गर्न सिवाय अरु कुनै काममा प्रयोग नभएको उनले बताए। 'वैदेशिक रोजगारमा जाने कामदारले अनिवार्य रु १,५०० देखि रु २,५०० सम्म करार अवधिअनुसार रकम भुक्तानी गर्नुपर्ने व्यवस्था गरिएको छ। हालसम्म बोर्डमा करिब ६ अर्ब रकम जम्मा भई विभिन्न बैंकहरुमा ब्याजमा लगाइएको अवस्था छ,' उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
