भक्तपुर- आउँदो बैसाखदेखि भक्तपुरमा पहिलो पटक आर्थिक गणना २०७५ सुरु हुने भएको छ। सरकारले देशभर नेपालको प्रथम राष्ट्रिय आर्थिक गणना सञ्चालन गर्ने भएपछि त्यसलाई सफल पार्न भक्तपुर जिल्लाले बैसाखदेखि नै गणना सुरु गर्ने भएको हो। यसको तयारी जिल्लामा पनि तीव्र रुपमा भइरहेको छ।
आर्थिक गणनाका लागि आवश्यक जनशक्ति तयार पार्न जिल्लामा ६१ गणक र ९ निरीक्षक छनोट भई ब्यासीस्थित वासु माविमा सुरु भएको तालिमको भक्तपुरका प्रमुख जिल्ला अधिकारी तथा जिल्ला आर्थिक गणना समन्वय समितिका अध्यक्ष द्रोण पोखरेलले उद्घाटन गरेका छन्। उनले देशमै पहिलो पटक हुन लागेको आर्थिक गणनाले मुलुकको दिगो विकासका लागि आवश्यक पर्ने आधारभूत आर्थिक तथ्यांक प्राप्त हुने विश्वास व्यक्त गरे।
आर्थिक गणनाअन्तर्गत अन्य जिल्लामा जस्तै गणक सबै व्यावसायिक आर्थिक एकाइ अर्थात् प्रतिष्ठान, व्यवसायस्थलमै पुगेर गणना गरिनेछ। बैसाख र जेठ महिना आर्थिक एकाइको लगत संकलन, प्रशोधन, सञ्चयन, विश्लेषण र प्रकाशन गरिने भएको छ।
जिल्ला गणना अधिकृत सुरेन्द्र रावलले आर्थिक गणनामा कुनै पनि व्यावसायिक आर्थिक एकाइ नछुट्ने र नदोहोरिने गरी प्रशिक्षण दिइएको बताए। बैसाखदेखि इन्टरनेट र कागजी प्रश्नावली फारमको प्रयोग गरी आर्थिक एकाइको विस्तृत विवरण संकलन गर्ने गरी आर्थिक गणना गरिने उनको भनाइ छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
