काठमाडौं- बैंकका कर्मचारीहरुले बिदा नपाउने भएका छन्। कोरोनाले सबै क्षेत्र प्रभावित हुँदै गर्दा बैंकिङ क्षेत्र भने सुचारु भइरहने नेपाल राष्ट्र बैंकका प्रवक्ता डा. गुणाकर भट्टले जानकारी दिए। बैंकहरु बन्द गर्ने विषयमा अहिलेसम्म कुनै पनि निर्णय नभएको भट्टले बताए।
बैंक तथा वित्तीय संस्थाहरू बन्द गर्ने विषयमा अहिलेसम्म कुनै कुराकानी नभएको अर्थमन्त्रालय वित्तीय क्षेत्र व्यवस्थापन महाशाखा प्रमुख झक्कप्रसाद आचार्यले जानकारी दिए। सुरक्षित रहेर सहज वित्तीय सेवा दिन बैंकहरू तयार छन् भन्नेमा सरकार विश्वस्त रहेको उनले बताए। उनले भने‚ 'यस्तो अवस्थामा सकेसम्म विद्युतीय कारोबार गरी आफू सुरक्षित रहन सम्पूर्ण वित्तीय सेवा प्रयोगकर्ताहरूलाई अनुरोध गर्दछौँ।'
बैंक सञ्चालन गर्ने क्रममा पहिलो कुरा कर्मचारीको स्वास्थ्य र सुरक्षामा ध्यान दिनुपर्ने र दोस्रो कुरा ग्राहकको सेवा सुविधामा ध्यान दिनुपर्ने नविल बैंकका प्रमुख कार्यकारी अधिकृत अनिल केशरी शाहले बताए। सबैभन्दा ठुलो समस्या पर्यटन र पर्यटनसँग सम्बन्धित पेसा व्यवसायमा परेको छ।
हरेक क्षेत्रमा काम गर्ने मजदुर, खाद्यान्न उत्पादन गर्ने किसानदेखि लिएर सबै जनालाई नकारात्मक प्रभाव पारिरहेको छ। अहिलेको स्थितिमा अधिकांश क्षेत्रलाई प्रभाव पारिरहेको छ। प्रभाव नपर्ने क्षेत्र धेरै कम होलान्।
नेपाल सरकारले २५ जनाभन्दा बढि भेला नहुनु भनेको छ। कुनै पनि बैंकको शाखामा गयो भने २५ जनाभन्दा बढी मानिसहरु हुन्छन्। त्यसलाई कसरी कम गर्ने भन्ने विषय चुनौतीपूर्ण रहेको शाहले बताए। उनले भने‚ 'हामीहरु सरकारको निर्देशन विपरीत जाने कुरा आउँदैन। त्यसका लागि हामीले डिजिटल बैंकिङलाई जोड दिएका छौं।'
नेपाल बैंकर संघले शुक्रबारदेखि डिजिटल बैंकिङ निःशुल्क प्रदान गर्ने निर्णय गरेको छ। बैंकहरुले एटिएम, मोबाइल बैंकिङलगायतका सबै सेवा निःशुल्क दिँदैछन्। यसले गर्दा मानिसहरु बैंकमा आउनुपर्दैन। डिजिटल बैंकिङ चलाउन नसक्ने ग्राहकहरुले आफूसँग भएको मोबाइल प्रयोग गरेर आजैका दिनदेखि मोबाइल बैंकिङ चलाउन थाल्नुपर्ने शाहको सुझाव छ। उनले भने‚ 'उहाँहरुले सिक्नुपर्यो। मौका यही हो।'
बैंकमा काम गर्ने सम्पूर्ण कर्मचारीहरुलाई स्यानिटाइजर दिने, फेस मास्क दिने, हात धुने व्यवस्था गर्नेलगायतको व्यवस्था गरी सुरक्षित हुने व्यवस्था मिलाउने शाहले जानकारी दिए। उनले थपे 'यस बाहेक हामीले केही गर्न सक्ने अवस्था छैन।'
कुनै पनि हालतमा बैंक बन्द नहुने भन्दै शाहले थपे‚ 'एउटा कुरा बैंक बन्द हुँदैन। बैंक पनि हस्पिटल, आर्मी पुलिसजस्तै हो। बैंकको सेवा अवरुद्ध हुँदैन। त्यसका लागि बैंक बन्द हुने कुरा आउँदैन।' उनले भने, ‘यसका लागि हामी के के गर्नुपर्छ ती सबै गर्न तयार छौं।’
'भूकम्प गएको बेलामा भोलिपल्टैदेखि बैंकिङ सेवा सुचारु भएको निबिर्सनु होला। त्यतिबेला सम्पूर्ण वित्तीय संस्थाहरु खुलेका थिए। यो बेलामा पनि बैंक बन्द हुन्छ कि भनेर भ्रममा लाग्दै नलाग्नु होला।' शाहले विश्वस्त पारे।
जबसम्म नेपाल सरकार नेपाल राष्ट्र बैंकबाट बैंकिङ सेवा बन्द गर्नु भन्ने निर्देशन आउँदैन तबसम्म बैंकिङ सेवा सुविधा बन्द नहुने उनले जानकारी दिए। हामी हाम्रो ग्राहकहरुलाई सेवा प्रदान गरिरहन्छौं। यसका लागि जति व्यवस्थापनका काम गर्नुपर्ने हो सबै गर्छौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1784106715.png)
-1764146706.png)
