बुटवल–उपचारका लागि तीन दिनदेखि भौंतारिएका नवलपरासीका एक युवकलाई चौतर्फी दबाब र आलोचनापछि बुटवलस्थित लुम्बिनी प्रादेशिक अस्पताल भर्ना गरिएको छ ।
लुम्बिनी प्रादेशिक अस्पताल बुटवलले भर्ना नगरिदिँदा ती युवक तीन दिनसम्म परासी, बुटवल र काठमाडौंका विभिन्न अस्पतालमा भौतारिएका थिए। कुनै पनि अस्पतालले भर्ना नगरेपछि प्रादेशिक अस्पतालले भर्ना गरेको हो।
बिरामीलाई बिहीबार बेलुका भर्ना गरिएको अस्पतालका मेडिकल सुपरिटेण्डेन्ट डा. राजेन्द्र खनालले जानकारी दिए। उनले बिरामीको नमुना परीक्षणका लागि राष्ट्रिय जनस्वास्थ्य प्रयोगशाला काठमाडौंमा पठाइएको बताए ।
जिल्ला अस्पताल परासी र लुम्बिनी प्रादेशिक अस्पताल बुटवलमा कोरोना संक्रमितलाई उपचार गर्नकै लागि आइसोलेसन वार्ड तयार गरिए पनि चिकित्सकहरुले भर्ना लिन नमानेका हुन्।
कोरोना संक्रमितलाई उपचार गर्दा लगाउनुपर्ने आवश्यक पोशाक, स्वास्थ्य किट र उपकरण नभएको हुनाले आफूहरुले बिरामीलाई छुन नमानेको जिल्ला अस्पताल परासीका डा. पवन अग्रहरीले बताए।
सञ्चार माध्यमको चौतर्फी दबाबपछि बिरामीलाई भर्ना लिन प्रादेशिक अस्पताल बुटवल बाध्य भएको जनाइएको छ।
रामग्राम नगरपालिका–१६ हकुइका ती युवकलाई रुघाखोकी र ज्वरो आएपछि तीन दिनअघि परासीको एक क्लिनिक पुर्याइएको थियो। त्यहाँबाट पृथ्वीचन्द्र जिल्ला अस्पताल परासी पठाईएको थियो। जिल्ला अस्पतालले त्यहा उपचार नगरी प्रादेशिक अस्पताल बुटवल रिफर गरेको थियो।
प्रादेशिक अस्पतालमा सामान्य चेकजाँचपछि कोरोनाको आशंका गर्दै पुरानो मेडिकल कलेज चितवन पठाइएको थियो ।
त्यहाँबाट काठमाडौं पठाइएका बिरामीलाई आफन्तले कलंकीको एक निजी अस्पताल पुर्याएका थिए ।
उक्त अस्पतालले पनि भर्ना लिन नमानेपछि निराश भएका बिरामी र आफन्त बिहीबार परासी फर्किएका थिए।
परासी अस्पतालबाट बुटवल जान भनेपछि मध्यराति बुटवल पुगेका बिरामीलाई अन्ततः अस्पतालले भर्ना लिएको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1784106715.png)
-1764146706.png)
