कोरोना अपडेट

भारतबाट पेट्रोलियम पदार्थ आयात निरन्तर

अभाव हुँदैन, अनावश्यक स्टक नराख्नुहोस् : निगम

दीपक घिमिरे बिहीबार, चैत ६, २०७६ १६:५८

भैरहवा- कोरोना भाइरसका कारण नेपाल-भारत सीमानाका बन्द हुने हल्लाले सर्वसाधरणले आवश्यकताभन्दा बढी इन्धन भण्डार गर्ने गरिरहेको अवस्थामा निगमले भने अनावश्यक भण्डारण नगर्न आग्रह गरेको छ। सीमानाका बन्द हुने हल्लाले केही जिल्लाहरुमा पेट्रोलियम पदार्थको अभाव हुन थालेको भन्दै लाइनमा बसेको तस्बिर सामाजिक सञ्जालमा पोस्ट भएका थिए।

भारतबाट निर्बाध रुपमा पेट्रोलियम पदार्थ नेपाल आइरहेकाले कुनै समस्या नभएको निगमले जनाएको छ। 'भारतबाट आउने इन्धनको परिमाणमा पनि कमी आएको छैन। नेपाल आयल निगमका डिपोहरुमा इन्धन भण्डारण गरेर राखिएको छ। निरन्तर रुपमा पुरानै तुलानामा इन्धन आयात भइरहेको निगमको भैरहवा कार्यालयका एक अधिकारीले भने।

तराई-मधेस आन्दोलनको क्रममा सबै नाका बन्द हुँदा खुल्ला रहेको भैरहवा नाका (बेलहिया)बाट मात्रै आयात भएको इन्धन मुलुकभरका लागि आपूर्ति व्यवस्था मिलाइएको थियो। यो नाकाबाट आयात हुने पेट्रोलियम पदार्थमा कुनै कमी नआएको नेपाल आयल निगमको भलवारी डिपोका प्रमुख इन्जिनियर सुरज शाहले जानकारी दिए। ‘विगतमा जुन परिमाणमा इन्धन आइरहेको थियो त्यही परिमाणमा अहिले पनि आइरहेको छ,’उनले भने, ‘ट्यांकरमा इन्धन लोड भइरहेको छ, हालसम्म भारतबाट इन्धन ढुवानीका लागि केही समस्या आएको छैन।’

उनका अनुसार भारतबाट आइतबार २ गते मात्रै २ लाख ४० लिटर डिजेल र ७ लाख ५२ हजार लिटर पेट्रोल र ३२ वटा एलपीजी ग्याँस बुलेट आएको भएको छ। त्यस्तै सोमबार ३ गते एक लाख लिटर डिजेल, ७ लाख ८४ हजार लिटर पेट्रोल र २० वटा एलपीजी ग्याँस बुलेट आएको जानकारी दिए। ४ र ५ गते पनि आएको छ। ४ गते ४ लाख ६० हजार लीटर (४६० केएल) पेट्रोल आएको छ भने ५ गते ३ लाख ४० हजार लीटर (३४० केएल) आएको छ। ४ गते ११ लाख ८४ हजार लिटर र ५ गते ८ लाख ९६ हजार लिटर डिजल आएको छ।

४ गते १७ बटा बुलेटमा २ सय ९९ मेट्रिक टन ग्यास आएको छ भने ५ गते २० वटा बुलेटमा ३ सय ५० मेट्रिक टन ग्यास आएको आयल निगम भलवारीले जनाएको छ। एउटा एलपीजी ग्याँस बुलेटबाट १ हजार २ सय ६५ वटा सिलिन्डरमा ग्याँस भरिन्छ।

भलवारी डिपो प्रमुख शाहका अनुसार भारतको बैतालपुर, मुगलशराय, केही मात्रामा गोयन्ड र अमलेखगंजको पाइपलाइनबाटमा समेत डिजेल, पेट्रोल आयात भइरहेको छ। भारतमा औसतमा डिजेल दैनिक ४० ट्यांकर र पेट्रोल १५ ट्यांकर आयात भइरहेको छ।

काठमाडौंमा पनि पेट्रोलियम पदार्थको अभाव हुन नदिनका लागि दैनिकजसो ८० हजार लिटर पेट्रोल काठमाडौं पठाउने गरेको शाहले बताए। निगमको भलवारी डिपोमा १ लाख १३ हजार लिटर पेट्रोल र २६ लाख लिटर डिजेल मौज्दात रहेको प्रमुख शाहले बताए।

डिपो बाहिर पनि १४ सय ८० केएल डिजेल र ४ सय ८० केएल पेट्रोल स्ड्याण्डबाई रुपमा रहेको कार्यालयले जनाएको छ। डिपोको क्षमता डिजेलमा ३० लाख लिटर र पेट्रोलमा एक लाख ४० हजार लिटर रहेको छ। ‘भारतमा ट्यांकरमा आइरहेको इन्धन ट्यांकरबाटै विक्री गरिरहेका छौँ,’उनले भने,‘मौज्दात गरिएको इन्धनबाट विक्री गर्नुपरेको छैन।’अहिले पनि निर्वाध रुपमा पेट्रोलियम पदार्थको लोड भइरहेको छ।

कोरोनाको त्रासले सर्वसाधरणको माग बढ्दा व्यवसायिहरुले बढी मात्रामा माग गरेको उनले बताए। शाहले डिपोबाट पनि अन्य दिनको तुलनामा पछिल्ला केही दिन यता बढी बिक्री हुने गरेको बताए। उनले इन्धनको विषयमा अफवाहको पछाडी नलाग्न र आवश्यकताभन्दा बढी इन्धन भण्डारण नगर्न सर्बसाधरण सबैलाई आग्रह गरे। पेट्रोल, डिजेलसँगै सर्वसाधरणले आवश्यकता भन्दा बढी भण्डारण गर्दा अनावश्यक रूपमा अभाव देखिन सक्छ भने उनले भने नेपालमा अहिले पेट्रोलियम पदार्थको अभाव हुने कुनै सम्भावना देखिदैन त्यसैले हल्लाका पछाडि नलाग्न आग्रह गर्दछु।

भारतबाट एलपिजी ग्याँसका बुलेट पनि निरन्तर रुपमा आइरहेकाले ग्यासको पनि अभाव नहुने भलवारी डिपोले जनाएको छ । भैरहवा नाकाबाट आयात हुने डिजेल, पेट्रोल भलवारी डिपोले रुपन्देही, पश्चिम नवलपरासी, कपिलवस्तु, बाग्लुङ, स्याङ्जा (केही भाग), पाल्पा, गुल्मी, अर्घाखाँची जिल्लामा बिक्री गर्ने गर्दछ। यीबाहेक अति आवश्यकता परेको खण्डमा काठमाण्डौँ, पोखरालगायत अन्य जिल्लामा पनि पठाउने गरिएको छ।