काठमाडौं- राप्रपा र राप्रपा (संयुक्त) ले बुधबार राष्ट्रिय सभागृहमा धुमधामका साथ पार्टी एकता भएको घोषणा गरे। एकतापछि गठन भएको राप्रपाका तीन अध्यक्षहरु कमल थापा, पशुपति शमशेर राणा र प्रकाशचन्द्र लोहनीले धार्मिक पुस्तक गीता छुँदै पार्टी नफुट्ने र नफुटाउने वाचा गरे।
उत्साहका साथ सम्पन्न एकता सभामा राप्रपा (संयुक्त)का प्रभावशाली नेता तथा पूर्वमन्त्री सुनीलबहादुर थापा सहभागी भएनन्। सुनील राप्रपाका संस्थापक नेता सूर्यबहादुर थापाका छोरा हुन्।
उनी निकट एक नेताले बताए अनुसार, एकतापछि पार्टीले लिएको राजसंस्थाको लाइनप्रति असहमति जनाउँदै उनले सभा बहिष्कार गरेका हुन्।
कमल थापा नेतृत्वको राप्रपा निरन्तर रुपमा राजसंस्थाको पक्षधर रहँदै आएको थियो। पूर्व पञ्च आबद्ध अन्य पार्टीले भने त्यसप्रतिको मोह त्यागिसकेका थिए।
एकताका कुरा सल्टाउँदै गर्दा सुनील थापाको मत थियो- राजतन्त्र ब्युँताउने लक्ष्य पार्टीले त्याग्नुपर्छ।
गणतन्त्र र संघीयतालाई आफूले स्वीकार गरेको मात्रै नभई संविधानसभाबाट जारी गरिएको संविधानमा हस्ताक्षर समेत गरेकाले त्यस विरुद्ध जानु अनैतिक हुने तर्क छ, सुनील थापाको।
सुनील निकट एक राप्रपा नेताले भने- दोस्रो संविधानसभाले नेपालमा संविधान घोषणा गर्यो। त्यो संविधानसभाको सदस्यका साथै त्यस बेलाको सरकारको उहाँ (सुनील) मन्त्री हुनुहुन्थ्यो। त्यसैले राजसंस्थाको पक्षमा पार्टी आउनुलाई अनैतिक मान्नुभएको छ।’
तत्कालीन संविधानसभामा उनी धनकुटा २ बाट प्रतिनिधित्व गर्दथे। साथै, संविधानसभाबाट संविधान जारी गर्ने बेलाको सुशील कोइराला नेतृत्वको सरकारमा उनी वाणिज्य तथा आपूर्ति मन्त्री थिए। संविधानको नयाँ संरचना अनुसार आम निर्वाचन गराउने शेरबहादुर देउवा सरकारमा उद्योग मन्त्री थिए।
सुनील आबद्ध तत्कालीन जनशक्ति पार्टीले गणतन्त्रको पक्षमा मतदान गरेको थियो। यति मात्रै होइन, एकतापछि गठन भएको राप्रपाले समेत गाणतन्त्र स्वीकारेको थियो।
त्यस समयमा सूर्य बहादुर थापाको भनाइ सम्झिदै ती राप्रपा नेता भन्छन्- ‘परिवर्तनलाई आत्मसात् गर्नुपर्छ भन्ने मान्यता सूर्यबहादुरको थियो।'
२०७२ बैशाखमा स्वर्गीय हुनुअघि सूर्यबहादुरले मुख्य पार्टीका शीर्ष नेतालाई घरमै बोलाएर 'डिनर' गराउँदै सहमतिको वातावरण बनाउन भूमिका खेलेको सो परिवार निकट राप्रपाका नेताहरु बताउँछन्। त्यस्ता भेटमा पनि उनले गणतन्त्रप्रति प्रतिबद्धता जनाउने गरेका थिए। ‘यो सकारात्मक परिवर्तन हो। हामीले स्वीकार्नुपर्छ,' उनको भनाइ हुने गर्थ्यो।
सूर्यबहादुर थापाको त्यस्तै प्रतिबद्धता र स्कुलिङको प्रभाव सुनीलमा पनि परेको उनी निकट ती नेता बताउँछन्। उनी सूर्यबहादुरलाई आफ्ना पिता मात्रै होइन, राजनीतिक गुरु समेत मान्थे।
पाटी एक हुनुअघि निकटस्थसँग सुनीलले भनेका थिए- ‘सैद्धान्तिक रुपमा फड्को मारेर संविधानमा गणतन्त्र लेखियो। लागू गरिसक्यो। अहिले त्यो परिवर्तन कसरी उल्टाउने? यसमा सहमति हुन सक्दिनँ।’
आफूले सहमति गरेर ल्याएको प्रणालीका विरुद्ध आफैं जान नसक्ने उनले भनाइ थियो। ‘एक दुई नेताको गल्तीका कारण प्रणाली नमान्ने हुँदैन’, उनी भन्थे।
पार्टी एक हुँदै गर्दा उनको गणतान्त्रिक एजेन्डा राप्रपामा अल्पमतमा परिसकेको छ। तर सुनीलबहादुर भने आफ्नो पितालाई नै सम्झिँदै ढुक्क देखिएका छन्। उनको भनाई उद्धृत गर्दै एक नेता भन्छन्- बुबा पनि बेलाबेलामा अल्पमतमा पर्नुहुन्थ्यो। तर, जित भने सधैं सही एजेन्डाकै हुन्थ्यो।
त्यसो त, राजतन्त्र सहितको पार्टी विधान नै निर्वाचन आयोगमा दर्ता नहुनेमा ढुक्क छन्।
कांग्रेस प्रवेश गर्दै
यसैबीच, सुनीलबहादुर थापा सहितको समूह कांग्रेस प्रवेश गर्ने बुझिएको छ। राप्रपामा थापा निकट एक नेताले जानकारी दिए अनुसार, कांग्रेस प्रवेशका लागि अन्तिम तयारी सकिएको छ।
तत्कालका लागि पदीय हैसियत स्पष्ट नगरी प्रवेश गर्न लागेको बुझिएको छ।
'सुनीलबहादुर एक्लै प्रवेश गर्ने होइन। सूर्य बहादुरलाई नेता मान्ने उनी निकटको समूह नै प्रवेश गर्ने हो', ती नेताले भने।
थापाको समूहले लामो समयदेखि कांग्रेसका कतिपय नेताहरुसँग छलफल चलाइरहेका थिए। तर, आफ्नै घर झगडामा अलमलिएको कांग्रेसका नेताहरुले निष्कर्ष दिएका थिएनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778036869.gif)
-1764146706.png)
