इटहरी- स्थानीय तहको निर्वाचनमा नेकपाबाट गाउँपालिकाको अध्यक्षको टिकटका लागि १५ लाख मागिएको विषय पार्टी अध्यक्ष केपी शर्मा ओलीसम्मलाई जानकारी गराउँदा समेत कुनै कारवाही नभएको भेषराज काफ्लेले दावी गरेका छन्। २०७४ सालको स्थानीय तहको निर्वाचनमा तत्कालीन नेकपा एमाले केन्द्रीय सदस्य रुपनारायण श्रेष्ठले मोरङको मिक्लाजुङ गाउँपालीकाको अध्यक्षमा टिकट मिलाइदिने भन्दै पैसा मागेको अडियो सार्वजनिक भइसकेको छ।
अडियोमा श्रेष्ठले नेकपा प्रदेश १ इन्जार्च एवं नेकपा स्थायी कमिटी सदस्यसमेत रहेका भीम आचार्यले पैसा माग्न लगाएको भन्दै टिकटका प्रत्यासी काफ्लेसँग १५ लाख माग गरेका थिए। काफ्लेले नेपाल लाइभसँग गरेको दावी अनुसार श्रेष्ठले पैसा मागेको विषयमा आचार्यसँगै अहिलेका प्रदेश १ का सामाजिक विकासमन्त्री जीवन घिमिरेलाई समेत जानकारी गराएका थिए।
तर, दुवैले पछि हेरौंला भनेर पन्छाएपछि अहिलेका रक्षामन्त्री इश्वर पोखरेलमार्फत पार्टी अध्यक्ष केपी शर्मा ओलीसम्म यो विषयबारे जानकारी गराए पनि टिकटका लागि पैसा बार्गेनिङ गर्नेहरुमाथि छानबिन नभएको उनले दावी गरे। ‘पार्टी अध्यक्षसम्म पनि यो कुरा पुर्याएको थिएँ, तर खै केही भएन। पछि राजनीति यस्तै रैछ! भन्ने लाग्यो’ उनले भने।
लिक भएको अडियोमा श्रेष्ठले पहिला ‘आचार्यले २१ लाख मागेका छन्। १५ लाखमा कुरा मिलाएको छु’ भन्दै बारम्बार पैसको बार्गेनिङ्ग गरेका थिए। यो विषय सार्वजनिक भएपछि पार्टीले श्रेष्ठलाई कारवाही गर्दै तत्कालीन एमाले केन्द्रीय सदस्यबाट हटाएको थियो। तर, यो प्रकरणमा नाम जोडीएका भीम आचार्यबारे छानबिनै भएन।
काफ्लेको दावी अनुसार उनले सो विषय तत्कालीन एमाले केन्द्रीय सदस्य जीवन घिमिरेलाई सुनाए। उनले पहिला पछि कुरा गरौंला भनेर पन्छिएका थिए। दोस्रो पटक मलाई पैसा मागेर टिकट नदिने खेल भयो कमरेड न्याय चाहियो भन्दा घिमिरेले प्रक्रिया संगत रुपमा निवेदन लिएर आउन सुझाएको उनले बताए।
घिमिरेले वास्ता नगरेपछि प्रदेश कार्यलयमा गएर भीम आचार्यसँग कुरा गर्न खोज्दा आचार्यले पछि कुरा गरौंला भन्दै पठाइदिएको र पछि काफ्लेले आचार्यलाई आफू अन्यायमा परेको फोनमार्फत बताउँदा पनि वास्ता नगरेको उनको दावी छ। ‘कमरेड भीम आचार्यलाई प्रदेश कार्यलय गएर भेटेको थिएँ। तर, उनले खासै वास्ता गरेनन्। चासो राखेनन्', उनले भने, ‘जीवन घिमिरेसँग पनि भेटेँ। उनले लिखित निवेदन माग गर्ने काम गरे। यहीँ कुरा ईश्वर पोखरेलमार्फत पार्टी अध्यक्ष केपी शर्मा ओलीसम्म पुग्यो। तर खै केही भएन। पछि राजनीति यस्तै रैछ! भन्ने लाग्यो।’
उनका अनुसार उनले आचार्यलाई श्रेष्ठलाई बोलाएर यसबारे कुरा गरौं भन्दा समेत आचार्यले आँट गरेनन्।
स्थानीय निर्वाचनमा उनले टिकट पाएनन्। उनको ठाउँमा देवीप्रसाद आचार्यले टिकट पाए। हाल उनै आचार्य मिक्लाजुङ गाउँपालिकाको अध्यक्ष छन्। यस विषयमा जिज्ञासा राख्दा आचार्यले आफ्नो नाम जोडेर श्रेष्ठले बदमासी गर्न खोजेको दावी गरे। यो सबै थाहा पाएपछि आफूले काफ्लेलाई पैसा नदिन भनेको र पैसाको लेनदेन हुन नपाएको उनको दावी छ। काफ्लेलाई वास्ता नगरेको बिषयमा भने उनले खुलस्त बोल्न चाहेनन्।
आचार्यले आफूले फोन गरेर पैसा नदिनु भनेको दावी गरे पनि काफ्लेले आचार्यले आफूलाई कहिल्यै फोन नगरेको दावी गर्छन्। पैसा मागेको आरोप लागेका श्रेष्ठले यो पुरानो कुरा भएकोले कोट्याउन नचाहेको प्रतिक्रिया दिए। पार्टीभित्र बसेर मिलाई सकेको बिषयमा बोल्न नचाहने उनले बताए।
तत्कालीन नेकपा एमाले केन्द्रीय सदस्यसमेत रहेका जीवन घिमिरेले आफूलाई यो विषय थाहा नभएको दावी गरे। घिमिरेले भने, 'यो पुरानो कुरा भएकोले याद आएन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
