कोरोना अपडेट

विराटनगरमा उपचाररत ६ जना कोरोना संक्रमित डिस्चार्ज

विनय बाह्रकोटी बुधबार, वैशाख २४, २०७७ १०:०७

इटहरी- विराटनगरस्थित कोशी कोरोना अस्पतालमा उपचार गराइरहेका ६ जना भारतीय नागरिक डिस्चार्ज भएका छन्।

गत वैशाख ५ गते उदयपुरको भुल्केस्थित मस्जिदमा रहेका उनीहरुलाई कोरोना संक्रमण देखिएपछि विराटनगरको कोरोना अस्पतालमा उपचाररत थिए । सोही दिन आएका १२ जनामध्ये ६ जना डिस्चार्ज भएका हुन्।

अस्पतालमा भर्ना भएको १४ दिनपछि गरिएको दोस्रो र तेस्रो पटकको स्वाब परीक्षणमा रिपोर्ट नेगेटिभ देखिएपछि उनीहरुलाई डिस्चार्ज गरिएको कोशी अस्पतालकी निर्देशक डा संगीता मिश्रले बताइन्।

कोरोना संक्रमणमुक्त हुनेमा ३० वर्षीय अनुस जैदी, २९ वर्षीय मोहम्मद अजिज, २८ वर्षीय मोहम्मद जावेद, २१ वर्षीय मोहम्मद अहमद साहेव, ३४ वर्षीय मोहम्मद अजिरवान र २६ वर्षीय मोहम्वद राशिद रहेका छन्।

डिस्चार्ज हुने सबैलाई विराटनगर रानीको एक मस्जिदमा निर्माण गरिएको क्वारेन्टाइनमा राखिने निर्णय भएको छ। पहिलो चरणमा अस्पताल भर्ना भएका १३ जनाको स्वाब परीक्षणमा ६ जनाको दोस्रो र तेस्रो पटक नेगेटिभ नतिजा आएकोले उनीहरुमा कोरोनामुक्त देखिएको थियो।

अन्य संक्रमितको पनि स्वाब परीक्षण भइहरेको छ र दोस्रो र तेस्रो परीक्षणमा नेगेटिभ देखिएकालाई डिस्चार्ज गरिने र पोजेटिभ देखिएकालाई अर्को १४ दिन अस्पतालमै राखिने डा मिश्रको भनाइ छ।

विराटनगरको कोभिड १९ उपचार केन्द्रमा उदयपुरका २८ सहित ३१ जना उपचाररत छन्। तीमध्ये १२ जना भारतीय हुन्। उपचारमा रहेका अन्य २ जना झापाका र १ जना भोजपुरका छन्। उपचाररत सबैको स्वास्थ अवस्था सामान्य रहेको अस्पताल प्रशासनले जनाएको छ।