काठमाडौं-अर्थमन्त्री युवराज खतिवडाको सांसद पदको अवधि मंगलबार राति १२ बजेदेखि सकिदैछ। उनको सांसद पदावधि अन्त्यसँगै मन्त्रीबाट समेत पदमुक्त हुनेछन्।
सांसद नरहँदा मन्त्री पदबाट स्वतः मुक्त भइहाल्ने संवैधानिक व्यवस्था रहेको संविधान सभा अध्यक्ष एवं नेकपा संसदीय दलका उपनेता सुवास नेम्वाङ बताउँछन्। उनले भने, ‘माननीय सदस्य नरहेपछि पदमुक्त भइहालिन्छ। यही कारण देखाउँदै सायद उहाँले राजीनामा दिनुहोला।’
संविधानको धारा ७७ मा मन्त्री पद रिक्त हुने अवस्था उल्लेख छ । उपधारा १ को 'ग' मा प्रतिनिधि सभाको सदस्य नरहेमा मन्त्री पद रिक्त हुने उल्लेख छ । राष्ट्रिय सभा सदस्यका हकमा छुट्टै व्यवस्था नभएकाले यही धारा आकर्षित हुन्छ।
प्रधानमन्त्री केपी शर्मा ओलीले खतिवडालाई अर्थमन्त्रीमा निरन्तरता दिन चाहेका छन्। प्रधानमन्त्रीले चाहेमा फेरि मन्त्रीमा नियुक्त गर्न सक्ने नेम्वाङले बताए। पूरा कार्यकालका लागि मन्त्री हुन खतिवडाले फेरि राष्ट्रपतिबाट सिफारिस भएर राष्ट्रिय सभा सदस्य बन्नुपर्छ।
उक्त कोटामा नेकपामा विवाद छ। नेकपा सचिवालयले उपाध्यक्ष वामदेव गौतमलाई राष्ट्रिय सभामा लैजाने निर्णय गरेको छ। प्रधानमन्त्री ओलीचाहिँ खतिवडालाई अर्थमन्त्रीका रुपमा निरन्तरता दिनुपर्ने भएकाले उनलाई सिफारिस गर्ने मनसायमा छन्। नेम्वाङले भने, ‘अब एउटा सिट खाली छ। वामदेव गौतमको पनि चर्चा छ। हेरिराछु भन्ने उहाँको (प्रधानमन्त्रीको) भनाइ थियो।’
उक्त खाली सिटमा तत्काल नियुक्त गरिहाल्नु पर्ने नभएकाले सांसद नहुँदा पनि खतिवडालाई पुनः मन्त्री बनाउन सकिने नेम्वाङ बताउँछन्। संविधानमा ६ महिना सांसद नभए पनि मन्त्री हुन सक्ने प्रावधान रहेकाले खतिवडालाई प्रधानमन्त्री ओलीले पुनः अर्थमन्त्री बनाउन सक्छन्।
संविधानको धारा ७८ मा संघीय संसदको सदस्य नभएको व्यक्ति मन्त्री हुने व्यवस्था छ। राष्ट्रपतिले प्रधानमन्त्रीको सिफारिसमा संघीय संसदको सदस्य नभएको कुनै व्यक्तिलाई मन्त्री पदमा नियुक्त गर्न सक्ने उल्लेख छ तर मन्त्रीले शपथ ग्रहण गरेको मितिले ६ महिनाभित्र संघीय संसदको सदस्यता प्राप्त गर्नुपर्ने व्यवस्था गरिएको छ।
डा खतिवडाले अर्थ मन्त्रालयका साथै सूचना, सञ्चार तथा प्रविधि मन्त्रालयको जिम्मेवारी सम्हालिरहेका छन्।
मंगलबारदेखि अर्थमन्त्री खतिवडासहित १९ जना सांसदको पनि पदावधि सकिएको छ। राष्ट्रिय सभा सदस्यका लागि भएको गोलाप्रथा निर्वाचनमा उनीहरुलाई दुई वर्षमात्रै परेको थियो।
राष्ट्रिय सभाले १९ जनाको बिदाइमा सामूहिक फोटो सेसनका साथै संसदमा अनुभव सुनाउने अवसर दिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768546075.png)
-1764146706.png)
-1768395492.png)
