बुटवल- रुपन्देहीकाे भैरहवा-बुटवल सडक खण्डमा पर्ने पड्सरी मणिग्राम औद्योगिक करिडोरमा रहेका २२ ठूला उद्योगहरुले नेपाल विद्युत् प्राधिकरणको लापरवाहिका कारण संकटमा परेकाे जनाएका छन्। विद्युत् प्राधिकरणले उद्योगीको माग र जानकारीबिना नै महंगो दरको ट्रंकलाइन जडान गरेर करोडौँ रकम भुक्तानीका लागि बिलिङ गरेपछि उद्योग संकटमा परेका हुन्।
उद्योगलाई ट्रंकलाइनमार्फत विद्युत् आपूर्ति गरिएको भन्दै विद्युत् प्राधिकरणले छुट महसुल बुझाउन ३५ दिने सूचना जारी गरेपछि उद्योगीहरुले आन्दोलनमा उत्रने चेतावनीसमेत दिएका छन्। प्राधिकरणले २०७५ को बैशाखदेखि २०७६ कात्तिकसम्मको ट्रंकलाइन बापतको छुट रकम बुझाउन फागुन ८ गते ३५ दिने सूचना पठाएको छ।
करिडोरका उद्योगीले माग्दै नमागेको ट्रंकलाइनको महसुल कुनै हालतमा तिर्न नसक्ने भन्दै जबर्जस्ती गरिए उद्योग कलकारखाना बन्द गरेर सडकमा निस्कने र उद्योगको चाँवी सरकारलाई बुझाउने चेतावनी दिएका छन्। विद्युत् प्राधिकरणका कारण यस करिडोरमा रहेका ३० अर्ब बढी लगानीका उद्योगहरु जोखिममा परेको उद्योगीहरुले गुनासो गरेका छन्।
सिद्धार्थ उद्योग वाणिज्य संघका अध्यक्ष कुलप्रसाद न्यौपानेले ट्रंकलाइनका नाममा प्राधिकरणले उद्योगी व्यवसायीलाई आतंकित पारेको बताए। प्राधिकरणका कर्मचारीले गरेका गल्ती कमजोरीको सोधभर्ना उद्योगीले गर्न नसक्ने भन्दै उनले अहिले पनि करिडोरका उद्योगका लागि ट्रंक लाइन आवश्यक नै नभएको बताए।
प्राधिकरणले करिडोरका उद्योगबाट साविककै समयमा औद्योगिक महसुल भने बुझिसकेको भएपनि सो अवधिमा ती उद्योगलाई ट्रंकलाइन मार्फत विद्युत् आपूर्ति गरिएको दाबी गर्दै साविकको भन्दा ६६ प्रतिशत बढी महसुल बुझाउन अल्टिमेटम दिएको हो। तर, करिडोरका उद्योगीले भने आफूहरूले ट्रंकलाइन माग्दै नमागेको र यस सम्बन्धमा प्राधिकारणसँग कुनै माग वा सम्झाैता पनि नगरिएको भन्दै थप रकम बुझाउन नसक्ने बताएका छन्।
उद्योगमा जडान गरिएको मेसिन।
उद्योगहरुमा ट्रंकलाइन प्रयोग गरेबापत विद्युत् प्राधिकरणले भुक्तानीका लागि ३५ करोडभन्दा बढी बक्यौताको बिल पठाएको उद्योगीहरुले जनाएका छन्। विद्युत् प्राधिकरणले करिडोरमा रहेका २२ वटा उद्योगमा महंगो लाइन जडान गरेर सामान्यभन्दा ६६ दशमलव ६७ प्रतिशत बढी विद्युत् महसुल माग गरेको उनीहरुले बताए।
करिडोरका उद्योगी चन्द्रमान श्रेष्ठले प्राधिकरणसँग ट्रंकलाइन जडानका लागि यस क्षेत्रका उद्योगीहरुले कुनै माग वा सम्भौता नगरेका कारण बक्यौता रकम तिर्न नसकिने बताए। ‘हामीले माग्दै नमागेको ट्रंकलाइन कसरी जोडियो, किन जोडियो? हामीलाई कुनै जानकारी छैन, ट्रंक लाइनमार्फत विद्युत् दिइएको भए त्यतिबेला हामीलाई किन जानकारी गराइएन?' उनले भने. '२/३ वर्षपछि आएर महशुल माग्दा हामीले तिर्न सक्दैनौं। प्राधिकरणले २०७४ मा जोडेको ट्रङक लाइनको बिल २०७६ मा आएर गरेको छ।'
विगतमा ३३ केभिए लाइनबाट संचालित हुँदै आएका ती उद्योगहरुमा प्राधिकरणले ०७४ चैतदेखि उच्च दररेटको ट्रंकलाइन मार्फत आफूसी विद्युत आपूर्ति गर्दै आएको र अहिले आएर एक्कासी पुरानो बक्यौता भुक्तानी गर्न पत्राचार गरेको उनीहरुको गुनासो छ।
विद्युत् प्राधिकरणका अनुसार उद्योगहरुको न्यूनतम ९० लाखदेखि ५ करोड ७० लाख रुपैयाँसम्म बक्यौता रहेको छ। प्राधिकरणले ती उद्योगहरुमा अमुवास्थित पुरानो फिडरबाट लाइन वितरण गर्दै आएको थियो, तर आफ्नो आन्तिरक लोड मिलान तथा फेज सिक्वेन्स ब्यालेन्स गर्न भरवलिया केन्द्रबाट उक्त लाइन जडान गरिदिएका कारण आफूहरु मर्कामा परेको उद्योगीहरुले बताए।
उद्योगी नवराज श्रेष्ठले विगत ४० वर्षदेखि साधारण लाइनबाटै निर्वादरूपमा सञ्चालन भइरहेका करिडोरका उद्योगमाथि प्राधिकरणले ट्रंक लाइनको बहानामा रकम असुल्न खाजेको आरोप लगाए। उनले विद्युत् प्राधिकरणले उद्योगी माथि ज्यादती गरेको बताए।
अनियमित विद्युत्का कारण बिग्रिएका (स्क्याव) छड।
गत मंसिर महिनामा एकाएक उच्च दररेटमा हालसम्म प्रयोग गरेको ट्रंक लाइनको करोडौँ बक्यौताको भुक्तानी गर्न भन्दै बिल आएपछि आफूहरु उद्योग बन्द गर्ने अवस्थामा पुगेको उनीहरुले बताए।
पञ्चकन्या समूहका महाप्रबन्धक देवेन्द्र शाहुले प्राधिकरणले ट्रंकलाइन मार्फत विद्युत् आपूर्ति भएको भनिएको समयमा पनि गुणस्तरीय विद्युत् नआएको बताए। उनले सो समयमा पनि अनियमित विद्युत् आपूर्ति तथा ट्रिपिङकै कारण झन्डै साढे तीन करोडभन्दा बढीको क्षति बेर्होनुपरेको दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
