काठमाडौं- च्याम्पियन्स लिगमा रियल मड्रिडविरुद्धको जित म्यानचेस्टर सिटीको लागि सम्झनलायक नतिजा हो। युरोपियन प्रतिस्पर्धामा लागेको प्रतिबन्धका कारण पनि म्यानचेस्टर सिटी रियल मड्रिड जानुअघि दबाबमा थियो।
यस्तोमा रियल मड्रिडकै मैदानमा २–१ ले हराउन सक्नु म्यानचेस्टर सिटीका प्रशिक्षक पेप गार्डिओलाको योजना रियल मड्रिड प्रशिक्षक जिनेदिने जिदानको योजनामाथि हाबी देखियो। सर्जियो अग्युरो बिना मैदान प्रवेश गर्ने दबाबमा रहेका गार्डिओला सम्हालिएर अघि बढ्न सके।
सिटीको जितमा केभिन डि ब्रायन, गाब्रियल जिसस र रहिम स्टर्लिङको खेल विशेष रह्यो। कारण विभिन्न छन् तर इतिहासमा पहिलो पटक रियल मड्रिडलाई हराएको म्यानचेस्टर सिटीको खेलमा गार्डिओलाको विशेष योजना स्पष्ट देखिन्थ्यो। उनको शैलीमा मैदानमा नियाल्न हरेक पटक भिन्न हुन्छ प्रिमियर लिगमा होस् या बाहिर।
गार्डिओलाको शैलीले रियल मड्रिडका खेलाडीलाई विपक्षी खेलाडी ‘मार्क’ गरेर खेल्न मुस्किल देखिन्थ्यो। ‘फल्स नाइन’ को जस्तै शैली देखिए पनि रियल मड्रिडविरुद्ध गार्डिओलाले के गरेका थिए, त्यो उनीबाहेक अरुले स्पष्ट भन्न सकिँदैन।
गोललाइनमा एडरसनपछि डिफेन्समा मेन्डी, लापोर्ते, ओटामेन्डी र वाल्करलाई राखेका उनले मिडफिल्डमा जिसस, रोड्रि, गुन्डोगन र महरेजलाई खेलाए। स्ट्राइकरमा बर्नान्डो र डि ब्रायनलाई फरक शैलीमा खेलाएका उनले लगभग ‘फल्स नाइन’ शैली नै अपनाएको बताउन सकिन्छ।
पहिलो हाफको केहीबेरसम्म देब्रेतिर बर्नान्डो सिल्भा थिए भने बीचमा जिसस थिए। तर त्यसको केहीबेरमा नै जिसस अर्को कुनामा देखिन थालेका थिए। रियाद महरेज मिडफिल्डमा भए पनि निकै अघि बढेर खेलिरहेका थिए भने बर्नान्डो र डि ब्रायनले धेरै समय मिडफिल्डको खेलाडीले जस्तो रोल निभाइरहेका थिए। उनीहरुभन्दा अघि रोड्रि र गुन्डोगन बढिरहेका थिए।
जनवरीमा काराबाओ कपको सेमिफाइनलमा वल्ड ट्राफोडमा पनि गार्डिओलाले लगभग यस्तै शैली अपनाएका थिए, स्ट्राइकरविहीन जस्तो देखिने लाइनअप। सेन्टर फरवार्डबिना खेलिरहेको म्यानचेस्टर सिटीलाई रोक्ने स्पष्ट योजना जिदानले तत्काल बनाउन सकेनन्। जसले गर्दा रामोस र भारानेले मार्क गर्नुपर्ने खेलाडी पाएनन्।
यदि अग्युरो या जिसस सेन्टर फरवार्डका रुपमा हुन्थे भने रियल मड्रिडका अनुभवी सर्जियो रामोस र राफेल भारानले उनीहरुलाई खुलेर खेल्न पक्कै दिने थिएनन्। खेलमा पोसेसन बराबरी जस्तै रहे पनि पोस्टको दिशामा धेरै प्रहार म्यानचेस्टर सिटीले गर्न गर्न सक्यो। खेलमा सिटीले १६ प्रहार गरेको थियो भने मड्रिडले ९ प्रहार मात्रै गर्न सक्यो।
खेलमा पहिलो केही समय बिग्रिएका पासक कारण म्यानचेस्टर सिटी केही समस्यामा परे जस्तो देखिन्थ्यो। तर रियल मड्रिडसँग बल भएर अट्याकमा बढ्दा म्यानचेस्टर सिटी सन्तुलिनत बनेर खेलिरहेको थियो।
खेलको ६०औँ मिनेटमा इस्कोको गोलमार्फत अग्रता बनाएपछि रियल मड्रिडले सिटीलाई रोक्न केही भिन्न योजना पक्कै बनाएको हुनुपर्छ। तर त्यो मैदानमा भने देखिएन। त्यसमा खेलको ७३औँ मिनेटमा बर्नान्डोको स्थानमा स्टर्लिङ ल्याएपछि म्यानचेस्टर सिटी विशेष देखिएको थियो।
स्टर्लिङको तिब्रता रियल मड्रिड डिफेन्डरका लागि डर बनेको स्पष्ट देखिन्थ्यो। उनको पेसलाई रोक्न सक्ने खेलाडीको अभाव मड्रिडमा देखियो। ७८औँ मिनेटमा म्यानचेस्टर सिटीले बराबरी गोल गर्दा पनि स्टर्लिङको खेलको प्रभाव महत्वपूर्ण थियो। देब्रेतिर बलसँगै बढेका स्टर्लिङले डि ब्रायनलाई जिसससम्म बल बढाउने अवसर सिर्जना गरिदिएका थिए। जहाँ जिसस सेन्टर फरवार्ड जसरी अघि बढेर हेड गर्न सफल भए।
दोस्रो गोल पेनाल्टीमार्फत हुँदा पनि स्टर्लिङको तिब्रताले नै काम गरेको थियो। सँगै बलमा दौडिन नसक्दा नै कार्भाजल फोउल गर्न पुगेका थिए। जसमा पाएको पेनाल्टीमा डि ब्रायनले राम्रो गोल गरे।
अन्तिम १६ को दोस्रो लेगमा मार्च १८ मा रियल मड्रिडलाई म्यानचेस्टर सिटीले आफ्नो मैदानमा स्वागत गर्नेछ। अहिले अवे मैदानमा भएको दुई गोल सिटीका लागि त्यतिबेला विशेष बन्नेछ या गार्डिओलालाई हराउन जिदानले केही भिन्न योजना बनाउने छन्। खेल रोमाञ्चक पक्का बन्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1767770856.png)
