काठमाडौं- नयाँ सभामुखका रुपमा अग्नि सापकोटा चयन भएका छन्। प्रतिनिधिसभाको आइतबार बसेको बैठकले सापकोटालाई निर्विरोध सभामुखको रुपमा चयन गरेको हो।
सापकोटाको विरुद्धमा सर्वोच्च अदालतमा परेको रिटमाथि आजै सुनुवाइ थियो। तर, 'हेर्न नमिल्ने' हुँदै सो मुद्दा स्थगित भएको थियो।
नवनिर्वाचित प्रतिनिधिसभा सभामुख सापकोटाविरुद्ध दुई थरी मुद्दा सर्वोच्च अदालतमा विचाराधीन छन्। हत्या आरोपमा अनुसन्धान र सभामुखका रुपमा काम गर्न रोक्न माग गर्दै परेका अलगअलग २ मुद्दा सर्वोच्चमा पेसीमा चढेका छन्। आइतबार पेसीमा रहेको दोस्रो मुद्दा हेर्न नमिल्ने न्यायाधीशको इजलासमा पेसी गर्दै सोमबारका लागि सरेको छ।
सभामुख चयन भएपछि सापकोटाले लोकतन्त्रको मूल्य र मान्यता कायम राख्न तटस्त र सन्तुलित भूमिका निर्वाह गर्न लाग्ने प्रतिबद्धता व्यक्त गरेका छन्। ‘लोकतन्त्रको मूल्य, मान्यता तथा जनताको सार्वभौम संस्थाको ओज, गरिमा कायम राख्न तटस्थ निष्पक्ष र सन्तुलित भूमिका निर्वाह गर्न सधैंभरि लागिरहनेछु,' सभामुखमा चयन भएपछि संक्षिप्त प्रतिक्रिया दिँदै सापकोटाले भने।
सभामुखमा सापाकोटा चुनिएपछि अन्तर्राष्ट्रिय अधिकारवादी संस्थाहरू भने नकारात्मक देखिएका छन्। खासगरी अन्तर्राष्ट्रिय मानवअधिकारका क्षेत्रमा काम गर्दै आएका संस्थाहरू सभामुखमा सापकोटा निर्वाचित भएकोप्रति उदार देखिएका छैनन्।
इन्टरनेसनल कमिसन अफ जुरिस्ट (आइसिजे), एम्नेस्टी इन्टरनेसनल, ह्युमन राइट्स् वाच र ट्रायल इन्टरनेसनलले विज्ञप्ति निकालेर भनेका छन्, ‘पूर्ण र स्वतन्त्र अनुसन्धान नहुन्जेलसम्म नेकपाले संसदको सभामुखका रूपमा सापकोटाको मनोनयनलाई पुनर्विचार गर्नुपर्दछ।’
थप समाचार- अग्निका दिनभर : सर्वोच्चको पेसीदेखि तटस्थको वाचासम्म
प्रचण्डको जीत
नेकपामा आन्तरिक शक्ति संघर्ष पनि चलिरहेको छ। दुई ठूला कम्युनिस्ट पार्टी मिलेर नेकपा बनेको भएपनि नेकपामा अहिले मुख्यगरी तीन समूहको शक्तिसंघर्ष जारी छ। पहिलो समूहको नेतृत्व गरेका केपीशर्मा ओलीविरुद्ध दोस्रो समूहका नेतृत्व गरेका प्रचण्डले यसपटक जित हासिल गरेका छन्।
लामो समय सभामुख पद रिक्त रहेको केपी शर्मा ओलीले सो पदमा आफूनिकट व्यक्ति चुन्न चाहेका थिए। तर अन्तिम समयमा आएर सो पदमा आफूनिकट सापकोटालाई निर्विरोध निर्वाचित गराउन मुख्य भूमिका खेले। अग्नि समामुखमा चयन भएपछि नेकपामा शक्ति समीकरण समेत बदलिएको अनुमान लगाउन थालिएको छ। सभामुख समीकरणमा नेकपाका अर्का शक्तिकेन्द्र माधवकुमार नेपाल समूहले साथ दिएको छ।
थप समाचार: बाजीगर प्रचण्ड : जसले हारेको खेल जितमा बदले
घर बन्धकी राखेर ढुंगाको कारोबार, १८ लाखको लोभमा गुम्यो ८२ लाख
आफूसँग रकम नभएपछि घर नै बन्धकी राखेर ८२ लाखमा अलौकिक ढुंगा किन्न खोज्ने बच्चुराम गुरुङ १८ लाख नाफाको सपनामा फसेको पाइएको छ। उनले ८२ लाखमा उक्त ढुंगा किनेर १ करोडमा बेच्ने योजना बनाएका थिए। तर उनले सोचेजस्तो हुन सकेन बरू उनी आफैं ठूलो रकम ठगीमा परेको प्रहरीले सार्वजनिक गरेको छ।
‘बच्चुरामले १ करोडमा उक्त ढुंगा किन्ने मान्छे समेत खोजिसकेका रहेछन्,’ प्रहरी स्रोतले भन्यो, ‘१८ लाख फाइदा गर्ने लोभमा उनी आफैं लुटिएको देखिन्छ।’
८२ लाख रुपैयाँ फसेपछि उनले नेपाल लाइभसँग भने, ‘९५ लाखको कागज गरेर ५१ लाख मात्रै लिए। यसअघि पनि ढुंगा किन्ने भन्दै ३२ लाख दिइसकेको थियौं। घर नै मेरो ३/४ करोडको छ। अब घर न घाटको भइयो। ढुंगाको लोभले सडकमा ल्यायो।’
थप समाचार : घर बन्धकी राखेर ढुंगाको कारोबार, १८ लाखको लोभमा गुम्यो ८२ लाख
६ हजार धरौटीमा छुटे सांसद् मनाङे
सार्वजनिक स्थलमा एन्फा कास्की अध्यक्ष मिलन गुरुङ गुरुङमाथि हातपात गरेको आरोपमा पक्राउ परेका गण्डकी प्रदेश सांसद राजीव गुरुङ (दीपक मनाङे) धरौटीमा रिहा भएका छन्।
जिल्ला प्रशासन कार्यालय, कास्कीले मनाङेलाई आइतबार ६ हजार धरौटी माग गरेपछि उक्त रकम बुझाएर उनी रिहा भएका हुन्।
रिहा भएपछि प्रतिक्रिया दिँदै मनाङेले ठग मिलन गुरुङविरुद्ध सफल भएको प्रतिक्रिया दिए।
यस्तै आफूमाथि दुर्व्यवहार भएको भन्दै सांसद् मनाङेविरुद्ध उजुरी दिएका अखिल नेपाल फुटबल संघ (एन्फा) कास्कीका अध्यक्ष मिलन गुरुङलाई थप ७ दिन थुनामा राखेर अनुसन्धान गर्न उच्च अदालतले अनुमति दिएको छ।
थप समाचार : ६ हजार धरौटीमा छुटे सांसद मनाङे
प्रदेश २ को स्थायी राजधानी जनकपुर राख्न संसदीय समितिमा सहमति
प्रदेश २ को नाम तथा राजधानी टुंगो लगाउन गठित सर्वदलीय संसदीय समितिले स्थायी राजधानी जनकपुरधाम तोक्ने विषयमा सर्वसम्मतिले निर्णय गरेको छ।
समितिले उक्त निर्णय गरेको समितिका संयोजकसमेत रहेका प्रदेशसभा २ का सभामुख सरोजकुमार यादवले जानकारी दिए।
'राजधानीको चार किल्ला तोकेर प्रदेश २ को राजधानी जनकपुरधाम तोक्ने विषयमा समितिका पदाधिकारीबीच सर्वसम्मति भएको छ,' सभामुख यादवले भने।
प्रदेशसभाले नै विभिन्न दलको सहभागितामा गठन गरेको समितिमा राजधानीको विषयमा फरक मत राखेकाहरूले प्रस्ताव फिर्ता लिएपछि सर्वसम्मति भएको संयोजक यादवले जानकारी दिए।
थप समाचार : प्रदेश २ को स्थायी राजधानी जनकपुरधाम
सदस्य सचिव नियुक्त गर्ने तयारी पर्यटन बोर्ड, अन्योलमा सिइओ
नेपाल पर्यटन बोर्डको कार्यकारी समिति (सञ्चालक बोर्ड)ले सिइओ (प्रमुख कार्यकारी अधिकृत) छनोटलाई पछि सार्दै सदस्य सचिव नियुक्ति गर्ने तयारी गरेको छ।
सञ्चालक बोर्डका अध्यक्ष तथा संस्कृति, पर्यटन तथा नागरिक उड्डयन मन्त्रालयका सचिव केदारबहादुर अधिकारीले आइतबार सदस्य सचिव नियुक्तिको लागि बोर्ड बैठक डाकेका थिए।
अध्यक्ष अधिकारीले सदस्य सचिव नभएको अवस्था सिइओ नियुक्ति गर्न नमिल्ने भन्दै सदस्य सचिव नियुक्तिका लागि बोर्ड बैठक डाकेको एक सञ्चालकले जानकारी दिए।
‘कानुनमा सदस्य सचिव नभएको अवस्थामा बोर्डको सिइओ नियुक्ति गर्न नमिल्ने विषय उल्लेख त छैन,’ ती सञ्चालकले भने, ‘सिइओ नियुक्तिलाई पछाडि धकेल्ने यो प्रपञ्च रचिएको हुन सक्छ।’ बोर्डको सदस्य सचिव सिइओ हुने हो। तर, सिइओ नभएको अवस्थामा कसैलाई जिम्मेवारी दिने तयारी भएको छ।
थप समाचार : पर्यटन बोर्ड सञ्चालक समितिले सदस्य सचिव नियुक्त गर्दै, सिइओ नियुक्ति अन्योलमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
