काठमाडौं- वि. सं. २०७५ जेठ ३ गते तत्कालीन नेपाल कम्युनिस्ट पार्टी (माओवादी केन्द्र) र नेपाल कम्युनिस्ट पार्टी (एमाले) मिलेर नेपाल कम्युनिस्ट पार्टी (नेकपा)को घोषणा भयो।
दुई पार्टी एक भएसँगै सहज बहुमतको नेकपा बन्यो। नेकपाको बहुमत प्राप्त सरकारले दुई नजिर समेत निर्माण गरेको छ।
अदालतमा विचाराधीन मुद्दा हुँदाहुँदै आफ्ना नेतालाई पदमा पुर्याउने नयाँ नजिर नेकपाले निर्माण गरेको हो।
दुई दुई नेतालाई अदालतमा मुद्दा विचाराधीन भएकै अवस्थामा नेकपाले सम्मानित पदमा पुर्याएको हो।
नेकपाको सभामुख पदमा सिफारिस गरेका अग्नि सापकोटा यस्तो सिफारिसमा दोस्रो नजिर हुन्।
यसअघि दोलखाबाट प्रतिनिधिसभा निर्वाचित महिला तथा बालबालिका मन्त्री पार्वत गुरुङ हुन्।
प्रधानमन्त्री केपी शर्मा ओलीले तेस्रो पटक मन्त्री पदमा विस्तार गर्दा गुरुङ अटाएका थिए। २०७६ मंसिर ८ गते गुरुङ महिला बालबालिकामन्त्री भएका छन्।
नजिर-२
अन्तिम सुनुवाई चल्दाचल्दै सभामुख
नेकपाले सर्वोच्च अदालतमा अन्तिम सुनुवाई चलिरहेका नेता अग्नि सापकोटालाई सभामुख पदमा उम्मेदवार बनाउने निर्णय गर्दै दोस्रो नजिर निर्माण गरेको छ।
काभ्रेका अर्जुन लामाको हत्या प्रकरणमा अनुसन्धान हुनुपर्ने र कर्तव्य ज्यान जस्तो जघन्य अपराधको मुद्दा लागेको व्यक्तिलाई मन्त्री वा अन्य सार्वजनिक पद दिन नहुने जिकीर गर्दै दायर भएको मुद्दा सर्वाेच्च अदालतको संवैधानिक इजलासमा विचाराधीन छ।
पुस २५ गते सुनुवाइमा रहेको मुद्दा स्थगित हुँदै माघ २२ गते सुनुवाई हुने भएको छ। २०६८ सालदेखि विचाराधीन मुद्दामा अन्तिम सुनुवाई चलिरहेका बेला उनको नाम सभामुखका लागि सिफारिस भएको हो।
द्वन्द्वकालमा विद्यालय व्यवस्थापन समितिको विवादमा काभ्रेका अर्जुन लामाको तत्कालीन विद्रोही नेकपा (माओवादी)ले अपहरण गरी हत्या गरेका थियो।
चन्दा नदिएको, सुराकी गरेर र माओवादीलाई अटेर गरेको भन्दै उनको हत्या भएको थियो। हत्यापछि लामाकी श्रीमती पूर्णिमाया लामाले सापकोटाविरुद्ध किटानी जाहेरी दिएकी थिइन्।
उनको जाहेरीमाथि अनुसन्धान नभएपछि उनले सर्वोच्च अदालतमा मुद्दासमेत दायर गरिन्। उक्त मुद्दामा सर्वोच्चले अनुसन्धान प्रतिवेदन पेस गर्न आदेश दिएको छ।
सर्वोच्चको आदेशअनुसार काभ्रे प्रहरीले एक/एक महिनामा अनुसन्धान प्रगति प्रतिवेदन पेस गर्दै आएको छ। अपहरणमा परेको एक महिनापछि असार दोस्रो साता गाडेको अवस्थामा लामाको शव फेला परेका थियो।
श्रीमती पूर्णिमायाले सापकोटा र दोङसहित माओवादी कार्यकर्ताहरू यादव पौडेल, भोला अर्याल, कर्णाखर गौतम, नोर्बु मोक्तानले हत्या गरेको किटानी जाहेरी दिएकी थिइन्।
हालसम्म प्रहरीले गरेको काम अनुसन्धान अधिकृत तोक्ने, कृष्ण माविका शिक्षकहरू शिवनारायण यादव, भीमबहादुर तामाङ, मुकुन्दप्रसाद अधिकारी र राधेश्याम श्रेष्ठसँग बकपत्र गर्ने कार्य भएको विवरण सर्वोच्चलाई प्रहरीले उपलब्ध गराएको छ।
नजिर-१
साधारण तारेखमा छुटेको एक महिनामै मन्त्री
जिल्ला अदालत काठमाडौंले कात्तिक ३ गते दोलखाका सांसद पार्वत गुरुङलाई ज्यान मार्ने उद्योगको मुद्दामा साधारण तारेखमा रिहा गर्ने आदेश गर्यो।
दोलखाबाट प्रतिनिधिसभा सदस्यमा निर्वाचित गुरुङलाई ज्यान मार्ने उद्योगको मुद्दामा जिल्ला अदालत काठमाडौंले ३५ दिने म्याद जारी गरेपछि उनी अदालत उपस्थित भएका थिए।
अदालतले पक्राउ गर्ने सूचनापछि अदालत उपस्थित हुँदै उनी तारेखमा रिहा भएका थिए। अदालतबाट साधारण तारेखमा रिहा भएका उनी मंसिर ४ गते महिला बालबालिका मन्त्री भएका थिए।
अदालतमा म्याद जारी गरेपछि सांसद गुरुङले कात्तिक ३ गते अदालतमा उपस्थित भएर बयान दिएका थिए।
उनको बयान सकिएपछि साधारण तारेखमा छाड्ने आदेश दिएको जिल्ला अदालतले दिएको थियो।
अदालतले जारी गरेको म्याद जिल्ला प्रहरी कार्यालय दोलखाले तामेली गरेको थियो।
सांसद गुरुङसहित ७ जनाविरुद्ध अदालतले म्याद जारी गरेको थियो। उनीहरूमाथि निर्वाचनका समयमा एक व्यक्तिमाथि ज्यान मार्ने उद्देश्यले सांघातिक आक्रमण गरेको भन्दै मुद्दा दायर भएको थियो।
गुरुङविरुद्ध दोलखाका वीरध्वज खड्काले किटानी जाहेरी दिएका थिए। उक्त जाहेरीका आधारमा नेकपाका केन्द्रीय सदस्यसमेत रहेका सांसद गुरुङसहित ७ जनाविरुद्ध २९ वैशाख ०७६ मा काठमाडौँ जिल्ला अदालतमा कर्तव्य ज्यान मुद्दा दायर भएको थियो।
०७४ वैशाखमा भएको स्थानीय तहको निर्वाचनमा खड्कामाथि काठमाडौँमा आक्रमण भएको थियो। त्यसमा गुरुङको पनि संलग्नता रहेको भन्दै उनीविरुद्ध खड्काले ज्यान मार्ने उद्योगमा जाहेरी दिएका थिए।
सम्बन्धित समाचारः
अग्नि सापकोटाविरुद्ध ३ थान मुद्दा सर्वोच्चमा विचाराधीन, अब के होला?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
