काठमाडौं- निकै लामो माथापच्छिपछि सत्तारुढ नेपाल कम्युनिस्ट पार्टी (नेकपा)का २ अध्यक्ष सभामुख बनाउने व्यक्तिको नाम चुन्न सहमत भएका छन्।
आइतबार बिहान नेकपा अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच बालुवाटारमा भएको छलफलपछि नयाँ सभामुख टुंगो लागेको हो।
प्रचण्ड निकट एक नेताका अनुसार नेकपा नेता अग्नि सापकोटालाई सभामुख बनाउन दुई अध्यक्ष सहमत भएका छन्। दुई अध्यक्षको सहमतिलाई दिउँसो ४ बजे बालुवाटारमै बोलाइएको नेकपाको सचिवाले बैठकले अनुमोदन गर्नेछ।
सापकोटालाई खासगरी प्रचण्डले सभामुखका लागि अघि सारेका थिए भने ओलीले सुवास नेम्वाङलाई सभामुख बनाउन चाहेका थिए। दुई नेताको परस्परविरोधी चाहानाकै कारण ४ पुसमा बोलाएको प्रतिनिधिसभाको बैठक पटकपटक स्थगित हुन पुग्यो।
‘राजनीतिक गतिरोध’कै कारण पुस ११, १६ र २७ गतेको प्रतिनिधिसभाको बैठक सूचना टाँस गरेर स्थगित भएको थियो। अन्ततः ओली नेम्वाङलाई सभामुख बनाई छाड्ने मोहबाट पछि हटेपछि सापकोटाको नाममा सहमति भएको हो।
ओली र प्रचण्डबीच सापकोटालाई नै सहमति बनाउनुअघि २ पृष्ठ भूमिलाई भने भुल्न सकिँदैन। नेकपा स्रोतका अनुसार ‘भैंसेपाटी भेला’मा द्वन्द्वकालीन दुई आयोगमा पठाउने नामको टुंगो लगाएपछि मात्रै अग्निलाई सभामुख बनाउने सहमतिले सहज स्वरुप पाएको हो।
सभामुखबारे ओलीलाई दबाब दिन प्रचण्डको अगुवाइमा वामदेव गौतम निवास भैंसेपाटीमा भेला भएको थियो, जहाँ प्रचण्डसहित नेताहरू झलनाथ खनाल, माधव नेपाल, गौतम र नारायणकाजी श्रेष्ठ सहभागी थिए।
पार्टीभित्रकै प्रभावशाली नेताहरू नेम्वाङलाई सभामुख बनाउने आफ्नो चाहनाविपरीत उभिएको देखेपछि ओलीले केही समय सभामुख चयनको विषयलाई पार्टी बैठकबाट ‘बाइकट’ गरेका थिए।
‘भैंसेपाटीको भेलामा सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोगमा को–को नेतालाई पठाउने भन्ने टुंगो लगाइयो,’ नेकपाका एक नेता भन्छन्, ‘सापकोटालाई अप्ठ्यारो नपार्ने मान्छे पठाउने निश्चित भएपछि सभामुखमा सहमति भयो।’
शनिबार बसेको सिफारिस समितिको बैठकले दुई आयोगमा दलीय भागबन्डाका आधारमा नाम सिफारिस गरेको छ।
सत्य निरुपण तथा मेलमिलाप आयोगको अध्यक्षमा कांग्रेसका तर्फबाट गणेशदत्त भट्ट तथा सदस्यमा प्रचण्डमान श्रेष्ठ र नेपाल कम्युनिस्ट पार्टी (नेकपा)का तर्फबाट सदस्यहरूमा गोविन्द गौतम, मन दाहाल र विष्णु पोखरेलको नाम सिफारिस गरिएको छ।
त्यस्तै दलीय भागबन्डाकै आधारमा बेपत्ता व्यक्तिको छानबिन आयोग अध्यक्षमा नेकपातर्फका युवराज सुवेदी तथा सदस्यमा विष्णु भण्डारी एवं कांग्रेसका तर्फबाट सदस्यहरूमा सुनीलरञ्जन सिंह, डा. गंगाधर अधिकारी र सरिता थापाको नाम सिफारिस भएको छ।
प्रमुख दुई दलको शनिबार बालुवाटारमा बसेको बैठकले ऐन संशोधनको काम अघि बढाउने र सिफारिस समितिलाई नाम सिफारिस गर्न आग्रह गर्ने निर्णय गरेको थियो।
द्वन्द्वपीडितहरूले भने दुई आयोगमा ‘दलका खेताला’ ल्याएको आरोप लगाएका छन्।
‘हिजो (विगतमा) आयोग असफल हुनुको एक प्रमुख कारण त्रुटिपूर्ण ऐन हो भन्ने जान्दाजान्दै ऐन संशोधन र आयोग गठन प्रक्रियामा पीडितलगायत सरोकारवालाहरूको विरोधका बाबजुद बिना कुनै प्रक्रिया र मापदण्ड दलका खेताला सत्य र बेपत्ता आयोगमा जागिर खुवाउनका लागि विगत ४ वर्षका आयोगको असफलताको कुनै समीक्षासमेत नगरी सिफारिस भएको छ,’ द्वन्द्वपीडित साझा चौतारीले आइतबार विज्ञप्ति निकाल्दै भनेको छ, ‘यी आयोगहरूले नेपालको संक्रमणकालीन न्याय प्रक्रियालाई निष्पक्ष र स्वतन्त्र ढंगबाट अघि बढाउन नसक्ने भएकाले यसबाट सत्य, न्याय र परिपूरणजस्ता पीडितका आधारभूत अधिकारको सुनिश्चिता हुन नसक्ने फेरि पनि निश्चितप्रायः भएको छ।’
सापकोटाविरुद्ध कर्तव्य ज्यानसम्बन्धी मुद्दा विचाराधीन
काभ्रेका अर्जुन लामाको हत्यामा सापकोटाको हात रहेकाले तत्काल कर्तव्य ज्यान मुद्दा अघि बढाउन माग गर्दै उनकी श्रीमती पूर्णिमाया लामाले २०६९ मंसिर ७ गते रिट निवेदन दायर गरेकी थिइन्।
कतिपयले कर्तव्य ज्यानसम्बन्धी मुद्दा लागेका व्यक्तिलाई सभामुख बनाउन नहुने आवाज उठाउँदै आएका थिए।
द्वन्द्वकालीन आयोगले यो मुद्दामा सापकोटालाई अप्ठयारो नपार्ने अवस्था सिर्जना गरिएपछि उनलाई सभामुख बनाउन सहमति जुरेको नेकपा नेताकै भनाइ छ।
स्रोतका अनुसार बालुवाटारमा ‘कुरा टुंग्याएर’ प्रचण्ड सिधै माधव नेपाललाई भेट्न कोटेश्वर पुगेका थिए। त्यहाँ ‘भैंसेपाटी भेला’ सार्थक रहेको भन्दै दुई नेताले खुसी साटासाट गरेका थिए।
सम्बन्धित समाचारः
अग्नि सापकोटाविरुद्ध ३ थान मुद्दा सर्वोच्चमा विचाराधीन, अब के होला?
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
![Nepal Live Samachar नेपाल लाइभ समाचार, जेठ २९ [भिडियाे]](https://nepallive.net/uploads/posts/500X300/samachar++-299-1718118150.jpg)
![Nepal Live Samachar नेपाल लाइभ समाचार, जेठ २७ [भिडियाे]](https://nepallive.net/uploads/posts/500X300/samachar++-1717941479.jpg)
-1732370421.png)
