भैरहवा– भैरहवाका व्यवसायी हरिस सेठियामाथि गत फागुन २८ गते भएको गोली प्रहारका घटना हुण्डीको अवैध कारोबारसँग जोडिएको पाइएको छ।
गोली प्रहारको घटनाबारे प्रहरीले सोमबार पत्रकार सम्मेलन गरी विस्तृत विवरण सार्वजनिक गर्दै हुण्डी कारोबारकै कारण सेठियामाथि गोली प्रहार भएको बताएको छ।
एक भारतीय नागरिकले हुण्डी कारोबार वापत व्यवसायी सेठियालाई दिनुपर्ने ३५ लाख भारु दिनु नपरोस् भनेर निशाना साँधेको खुलेको छ।
‘भारतीय नागरिक सद्दाम भनिने मोहम्मद अफ्जलले सेठियालाई लक्षित गरी गोली प्रहार गर्न लगाएको अनुसन्धानबाट खुल्न आएको छ’, रुपन्देहीका एसपी श्यामलाल ज्ञवालीले बताए।
सेठियामाथि गत फागुन १ गते र २८ गते गरी २ पटक गोली प्रहार भएको थियो। फागुन १ को घटनामा सेठियाका ‘बिजनेस पाटर्नर’ भैरहवाका आलु व्यापारी मोहन बनियाँले चलाएको मोटरसाइकलको पछाडि बसेका सेठियामाथि सुटरले गोली प्रहार गरी फरार भएका थिए। उनको शरीरमा गोली छर्रा भेटिएको थियो। प्रहरीले घटना भएको ५ दिनपछि घटनाको जानकारी पाएर सेठियासँग घटनाबारे बुझ्न खोज्दा जानकारी दिन आनाकानी गरेर असहयोग गरेको रुपन्देहीका एसपी ज्ञवालीले बताए।
त्यसपछि फागुन २८ गते राति करिब ९ बजे आफ्नो घरतर्फ जाँदै गर्दा सेठियालाई लक्षित गरी गोली प्रहार भएको थियो। उनलाई गोली भने लागेन। घटनालगत्तै भाग्ने क्रममा मोटरसाइकलबाट लडेपछि स्थानीयको सहयोगमा प्रहरीले भारत महाराजगन्ज नौतनवाका ४६ वर्षीय रमजान मुसलमान (रोजन) लाई पक्राउ गरेको थियो। मोटरसाइकल चालक फरार भएका थिए। घटनाको दुई दिनपछि प्रहरीले मोटरसाइकल चालक भारत जिल्ला महराजगन्ज नौतनवाका ३० वर्षीय मन्जुर मुसलमानलाई पक्राउ गरेको थियो।
मन्जुरले प्रारम्भिक बयानमा सेठियाको हत्या गर्न उनकै ‘बिजनेस पार्टनर’ मोहन बनियाँले आफूलाई सुपारी दिएको दिएपछि प्रहरीले बनियाँलाई पक्राउ गरेको थियो। तर, बनियाँले सुपारी दिएको विषय अस्वीकार गरेपछि प्रहरीले मन्जुरलाई थप केरकार गर्दै अनुसन्धान अघि बढायो।
त्यस क्रममा मन्जुरले आफ्नो बयान फेर्दैै सेठियाको सुपारी बनियाँले नभई भारत जिल्ला महाराजगञ्ज नौतनवा का २७ वर्षीय सद्दाम भनिने मोहम्मद अफजलले दिएको बताएको एसपी ज्ञवालीले जानकारी दिए। प्रहरीले अफजललाई ९ चैतमा पक्राउ गर्न सक्यो।
अफजलले सेठियाको हत्या गर्न मन्जुरलाई १० लाख भारु दिनुका साथै हतियार, गोली, सुटर लगायत सम्पूर्ण जिम्मा दिएको पाइएको एसपीले ज्ञवालीले बताए।
हुण्डीको रहस्य गर्भमै
गोली प्रहार भएको घटना अवैध हुण्डी कारोबारसँग जोडिए पनि प्रहरीले हुण्डीको विषयमा केही सार्वजनिक गर्न चाहेन। प्रहरीका अनुसार, विगत दुई वर्षदेखि व्यवसायी सेठिया र अफजलबीच हुण्डी मार्फत आर्थिक कारोबार हुँदै आएको थियो। त्यस्तै, बनियाँ पनि हुण्डी कारोबारी रहेको प्रहरीको अनुसन्धानमा देखिएको छ। यी तीनै जना हुण्डी कारोबारमा ‘पार्टनर’ रहेको र हुण्डी कारोबारकै कारण घटना भए पनि प्रहरीले भारतीय नागरिक अफजललाई मात्र पक्राउ गरेर कारबाही प्रक्रिया अगाडि बढाएको छ।
पक्राउ परेका अफजल र व्यवसायी सेठिया हुण्डी कारोबारी रहेको विवरण मात्र सार्वजनिक गरेको प्रहरीले पक्राउ परेका अर्का हुण्डी कारोबारी बानियाँ निर्दोष देखिएकाले उनलाई तत्काल छाड्ने तयारी गरिएको बताए।
‘पक्राउ परेका बनियाँ निर्दोष देखिएका छन्। उनलाई छाड्ने तयारी हुँदै छ’, एसपी ज्ञवालीले भने। प्रहरीले उनीमाथि ज्यान मार्ने उद्योग मुद्दामा म्याद थप गर्दै थुनामा राखेको छ।
घटनामा संलग्न रहेको भन्दै हचुवाको भरमा पक्राउ गर्ने र पछि बयान फेरिएको भन्दै छाड्ने खेलमा ठूलो रकमको चलखेल भएको स्रोत बताउँछ। पक्राउ परेका बनियाँ भैरहवाका धनाड्यका व्यक्ति हुन्। स्रोतका अनुसार, उनी पक्राउ परे लगत्तै उनलाई छुटाउन चलखेल सुरु भएको र त्यो सफल हुने क्रममा छ।
हुण्डी कारोबारी अफजलको बयानको आधारमा प्रहरीले अनुसन्धान गरेको भए मुद्रा सहटी काउन्टर व्यवसायीदेखि भैरहवाका ठूला उद्योगी व्यवसायीहरु समेत पक्राउ पर्ने प्रहरी स्रोतको दाबी छ। तर, प्रहरीले हुण्डी कारोबारको विषयमा प्रवेश नै नगरी गोली प्रहारको घटना मात्र सार्वजनिक गरेको छ।
पक्राउ परेका अफजलले नेपालको को–कोसँग अवैध हुण्डी कारोबार गरिरहेका थिए, कारोबारमा को–को संलग्न छन् भन्नेबारे दिएको बयान सम्बन्धमा प्रहरीले मुख खोल्न चाहेको छैन।
नाम ६ जनाको, सार्वजनिक ४ जना
गोली प्रहार घटनामा ६ जना संलग्न रहेको प्रहरीले प्रेस विज्ञप्ति मार्फत जानकारी गराए पनि पत्रकार सम्मेलनमा चार जना आरोपितलाई मात्र सार्वजनिक गरेको छ।
प्रहरीले गोली प्रहारका लागि सुपारी दिने मोहम्मद अफजल, घटनामा संलग्न रहेको भनी दोस्रो गोली घटनाका सुटर भारतीय नागरिक रमजान मुसलमान, पहिलो र दोस्रो घटनाका मोटरसाइकल एवं घटनाको सुपारी लिने मन्जुर मुसलमान, दोस्रो घटनामा प्रयोग भएको हतियार र गोली घरमा राखेको भैरहवाका नजाबुद्दिन मुसलमानलाई सार्वजनिक गरेको छ।
त्यस्तै, पहिलो गोली घटनाका सुटर भारतीय नागरिक अजय जयसवाल फरार रहेको प्रहरीले जनाएको छ। यस्तै, अभियोग नखुलाइएका मोहन बनियाँको नाम र तस्बिर प्रेस विज्ञप्ति मार्फत मात्रै सार्वजनिक गरियो।
सार्वजनिक गरिएका चारै जनामाथि ज्यान मार्ने उद्योग र हातहतियार खरखजानामा मुद्दा दायर भएको तथा घटनाको थप अनुसन्धान भइरहेको जिल्ला प्रहरी कार्यालय रुपन्देहीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
