बुटवल- लुम्बिनी सांस्कृतिक नगरपालिकाले यान्त्रिक उपकरण खरिदका क्रममा आर्थिक अनियमितता गरेको खुलेको छ। ब्याकहो लोडरको आपूर्तिका लागि आह्वान गरिएको बोलपत्रमा सार्वजनिक खरिद ऐनविपरीत बोलपत्र स्वीकृत गरी नगरपालिकाले आशयपत्र जारी गरेको छ।
बोलपत्र घटाघट नियमानुसार कम मूल्यको बोलपत्रदाताको बोलपत्र स्वीकृत गर्ने आशयको सूचना जारी गर्नुपर्नेमा बढी मूल्य दाखिला गरेको कम्पनीको नाम नगरपालिकाले स्वीकृत गरेको छ। कानुन र अख्तियारको धज्जी उडाउँदै बोलपत्र प्रतिवेदनमा उल्लेख गरेका विषयवस्तुलाई फरक पारी नगरपालिकाले मूल्यांकन प्रतिवेदन तयार पारेको हो।
नगरपालिकाको प्रथम नगरसभाले आर्थिक वर्ष २०७४/०७५ का लागि ब्याकहो लोडर एक थान खरिद गर्ने निर्णय गरेको थियो। त्यही निर्णयलाई टेक्दै नगरपालिकाले २०७४ माघ १० गते बुटवलबाट निस्कने एक राष्ट्रिय दैनिकमा बोलपत्र आह्वानको सूचना प्रकाशित गर्यो। पत्रिकाको सूचनाअनुसार भैरहवाको अम्बु मार्केटिङ र बुटवलको बिएस मोटर्स प्रालिले बोलपत्र फाराम भरेका थिए। नगरपालिकाले भ्याटसहित ४० लाख भित्र ब्याकहो लोडर खरिद गर्न सकिने गरी टेन्डर आह्वान गरेको थियो। अम्बुले ३६ लाख ५५ हजारमा लोडर बिक्री गर्न सक्ने गरी बोलपत्र भरेर पठाएको थियो भने बिएसले ३९ लाख ३९ हजारमा बिक्री गर्न सक्ने गरी बोलपत्र भरेको थियो।
यसरी हेर्दा अम्बुले टेन्डर पर्नुपर्ने हो। तर नगरपालिकाले २ लाख ८९ हजार कम रकम हालेको अम्बु बिएस प्रालिका नाममा बोलपत्र स्वीकृत गर्ने आशयको सूचना जारी गरेको छ। नगरपालिकाले तयार गरेको मूल्यांकन रिपोर्टमा अम्बुले टेन्डर प्रतिवेदनमा लेखेको भन्दा गलत कुरालाई उतारेर बिएस प्रालिलाई टेन्डर स्वीकृतको आशयपत्र जारी गरेको खुलेको छ।
बोलपत्र मूल्यांकन समितिको प्रतिवेदनमा अम्बुले मेनिफेक्चर्स अथोराइजेसन, पावर अफ एर्टोनी, बोलपत्र दाखिला पत्र, लिफलेट र क्याटलग उपलब्ध नगराएको भनी उल्लेख गरेको छ। तर टेन्डर प्रतिवेदनमा सबै कुरा उपलब्ध गराइएको अम्बुको दाबी छ।
मूल्यांकन समितिले आफूले तयार पारेको प्रतिवेदनमा बोलपत्रदाताले पेश गरेको प्राविधक स्पेसिफिकेसनभन्दा फरक कुरा उल्लेख गरी जबर्जस्ती आफूहरुलाई अयोग्य ठहर गरेको अम्बु मार्केटिङका सञ्चालक पर्शुराम पराजुलीले बताए। 'नगरपालिकाले आर्थिक प्रलोभनमा परेर हामीलाई टेन्डर दिएन,' उनले भने, 'बिएस मोटर्स प्रालिसँग नै सम्झौता गर्ने उसको नियत देखिन्छ।'
नगरपालिकाको गलत कदमविरुद्ध निवेदन दर्ता गर्ने तयारी रहेको समेत उनले बताए। 'जनप्रतिनिधि आएपछि पनि नगरपालिकामा सुनियोजित रुपमा यस्ता घटना हुनु दु:खद हो,' पराजुलीले भने।
नगरपालिकाका प्रशासकीय प्रमुख मोहन पौडेल भने आफूहरुले तयार पारेको मूल्यांकन प्रतिवेदनमा बोलपत्र दाताले दिएको विवरणभन्दा गलत भएको पाइए सच्याउने भन्दै पन्छिए। 'सबै प्राविधिक कुरा हामीलाई थाहा नहुन सक्छ,' उनले भने, 'मेकानिकल इन्जिनियरसँग बुझेर मात्रै थप प्रतिक्रिया दिन सकिन्छ।'
उनले बोलपत्रदाता अम्बु मार्केटिङले नगरपालिकामा निवेदन दिएपछि मेकानिकल इन्जिनियरलाई बोलाएर स्पष्टीकरण लिएपछि मात्रै बाँकी थप भन्न सकिने बताए।
नगरपालिकाले तयार पारेको मूल्यांकन प्रतिवेदनमा प्रशासकीय प्रमुख पौडेलसहित मेकानिकल व्यवस्थापन डिभिजन कार्यालय वीरगन्जका मेकानिकल इन्जीनियर सन्दीप अग्रवाल, लेखा अधिकृत आलोक अग्रहरि, इन्जिनियर राजेश कोहार र नासु चिरञ्जीवी घिमिरेले हस्ताक्षर गरेका छन्।
इन्जिनियर अग्रवालले अम्बु मार्केटिङले लिफलेट र क्याटलग नदिएको तथा आफूहरुले माग गरेको मापदण्ड अनुसार नभएका कारण बढी मूल्य भएर पनि अर्को कम्पनीको नाममा आशयपत्र जारी गर्नु परेको जिकिर गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
