काठमाडौं- भारतबाट पेट्रोलियम पदार्थ ल्याउँदा बीच बाटोमै चोरी गरी करिब ८ करोड रुपैयाँ बराबर नेपाल आयोग निगमलाई नोक्सान पुर्या एको भन्दै ९८ जना विरुद्ध दायर गरिएको भ्रष्टाचार मुद्दा तीन वर्षदेखि विशेष अदालतमै अल्झिएको छ। अख्तियार दुरुपयोग अनुसन्धान आयोगले दायर गरेको मुद्दाको सबै अंग पुगे पनि पक्षका कानुन व्यवसायीहरुले स्थगित गर्दा अझैसम्म फैसला हुन सकेको छैन।
मंगलबार उक्त मुद्दा विशेष अदालतका अध्यक्ष बाबुराम रेग्मी र सदस्यद्वय चण्डीराज ढकाल र प्रमोदकुमार श्रेष्ठ वैद्यको इजलासमा पेशी परेको थियो। तर, पक्षको कानुन व्यवसायीले उपस्थित हुन नसक्ने निवेदन दिएपछि अदालतले पेशी स्थगित गरेको छ।
तेल चोरी प्रकरणमा आयल निगमको क्षेत्रीय कार्यालयका प्रमुखसहित ट्याङ्कर चालक र ट्याङ्कर धनी गरी ९८ जनाको मिलेमतो भएको दाबी गर्दै २०७१ भदौ ३१ गते विशेषमा भ्रष्टाचार मुद्दा दायर भएको थियो। अख्तियारले पेट्रोलियम पदार्थ बीच बाटोबाटै चोरी गर्ने कार्यमा संलग्न भएको अभियोगमा निगमको क्षेत्रीय कार्यालय रुपन्देहीका तत्कालीन उप-निर्देशक समेतलाई विपक्षी बनाएको थियो।
भारतको बेतालपुरबाट रुपन्देहीको भलवारीमा रहेको निगमको डिपोमा पेट्रोलियम पदार्थ आयात गर्ने क्रममा निगमकै संलग्नतामा बीच बाटोबाटै इन्धन चोरी हुने गरेको अख्तियारको अनुसन्धानमा देखिएको थियो। अख्तियारले तेल चोरीमा संलग्न भएको भन्दै आयल निगमका ८ कर्मचारी, पेट्रोलियम व्यवसायी ४, ट्याङ्कर धनी ६६ र चालक १९ जना विरुद्ध मुद्दा दायर गरेको थियो। अख्तियारले उनीहरुबाट ७ करोड ७७ लाख ८४ हजार बिगो असुल हुनुपर्ने माग गरेको थियो।
अख्तियारले तेल चोरीमा निगमको क्षेत्रीय कार्यालयका उप–निर्देशक नागेन्द्रकुमार कुर्मी, प्रबन्धक दिपेन्द्र बस्नेतसहित ३ जना सहायक प्रबन्धक र २ उपप्रबन्धक रहेको दाबी आरोपपत्रमा गरेको छ। यस्तै, व्यवसायीमा शंकर भट्टराई, सुरेशप्रसाद उमर, राजु न्यौपाने र लोकप्रसाद भुषाल तेल चोरीमा संलग्न रहेको अख्तियारको आरोपपत्रमा उल्लेख छ।
त्यस्तै, अख्तियारले विपक्षी बनाएका ट्याङ्कर धनीमा हरिबहादुर कुँवर, राकेश कसौधन, पशुपति कशौधन, प्रिया गुरुङ, पप्पु कशौधन, चोपनारायण श्रेष्ठ, बालकृष्ण गैरे, प्रेमराज गैरे र पशुपति भारी छन्। भ्रष्टाचारको मुद्दा लाग्ने अधिकांश रुपन्देहीका व्यापारी हुन्। अख्तियारले डिपोका कर्मचारी, सम्बद्ध व्यवसायी र ट्याङ्कर धनीको मिलेमतोमा भारतबाट पेट्रोलियम पदार्थ ढुवानीको क्रममा कम परिमाण देखाई राजस्व हिनामिना गर्ने, बाटैमा पेट्रोलियम पदार्थ झिक्ने, निर्धारित परिमाणभन्दा बढी तेल आयात गर्ने जस्ता कार्य गरी राजस्व ठगी हुने गरेको दाबी आरोपत्रमा गरेको छ।
१ करोड ९ लाख ३६ हजार बराबर पेट्रोलियम पदार्थको राजस्व नतिरेको, ६ करोड १७ लाख रुपैयाँको पेट्रोलियम पदार्थ झिकेको र कर्मचारीले ५१ लाख ४५ हजार रुपैयाँ घुस लिएको गरी राज्यलाई झन्डै ८ करोडको नोक्सान भएकाले त्यसको असुल उनीहरुबाट गरिनुपर्ने अख्तियारको आरोपपत्रमा उल्लेख छ।
२०७१ बैशाख १६ गते रुपन्देही प्रहरी र राष्ट्रिय सतर्कता केन्द्रले संयुक्त रुपमा छापा मार्दै तेल चोरिरहेको अवस्थामा करिब ३ दर्जनलाई पक्राउ गरेको थियो। पक्राउ परेकाहरु रुपन्देही जिल्ला अदालत र पुनरावेदन अदालत बुटवलको आदेशमा धरौटीमा रिहा भएका थिए।
निगमका कर्मचारी र ट्याङ्कर धनीलाई सफाइ, चालक दोषी !
२०७१ जेठ ८ गते रुपन्देही जिल्ला अदालतले रुपन्देहीमा भएको तेल चोरी काण्डमा संलग्न भनिएका ट्याङ्करका चालकहरुलाई दोषी ठहर गर्दै ट्याङ्कर धनी र नेपाल आयल निगमका कर्मचारीलाई निर्दोष रहेको फैसला सुनाएको थियो। जिल्ला अदालतको उक्त फैसलापछि चालक दोषी भएका थिए भने कर्मचारी र ट्याङ्कर मालिकहरुले सफाइ पाएका थिए।
जिल्ला अदालतले ४ जना चालकलाई जनही १ महिना कैद सजाय र जरिवाना गर्ने फैसला सुनाएको थियो। चालकलाई दोषी ठहर गरे पनि सहचालकलाई भने अदालतले सफाइ दिएको थियो। जिल्ला न्यायाधीश कविप्रसाद न्यौपानेको इजलासले चालकहरु रामचन्द्र चौधरी, शिवकुमार चौधरी र सुदीप कार्कीलाई १ महिना कैद र ६ हजार सय ४० रुपैयाँ जनही जरिवाना हुने फैसला सुनाएको थियो। त्यस्तै, चालक नेत्रबहादुर खड्कालाई १ महिना कैद र ४ हजार १ सय ६० रुपैयाँ जरिवाना हुने तत्कालीन फैसलामा भनिएको थियो।
रामचन्द्र, शिव र सुदीपमाथि ६०–६० लिटर तेल चोरेको अभियोग थियो भने नेत्रमाथि ४० लिटर तेल चोरेको अभियोग थियो। तेल चोरी मुद्दा लागेका ट्याङ्कर धनीहरु हरिबहादुर कुँवर, पप्पुकुमार कसौधन, राजेश कसौधन, रुद्रप्रसाद शर्मा, प्रिया गुरुङ र श्रवण गुरुङलाई अदालतले सफाइ दिएको थियो।
यस्तै, चोरीमा सघाएको अभियोग लागेका नेपाल आयल निगम रुपन्देही भलवारी डिपोका तत्कालीन प्रमुख नागेन्द्र कुर्मीसहित कर्मचारीहरु दिपेन्द्र बस्नेत र रिवनकुमार राउतले पनि सफाइ पाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107799.jpeg)
-1786602170.png)
