काठमाडौं- जर्मन विलासी कार उत्पादक कम्पनी बिएमडब्लूले भारतमा मिनी ब्रान्डमा इलेक्ट्रिक कार सार्वजनिक गर्ने भएको छ। बिएमडब्लूले पहिलो इलेक्ट्रिक कार आइथ्री ल्याएको थियो। अब भने बिएमडब्लूले भारतीय बजारमा मिनी ब्रान्डमा इलेक्ट्रिक कार ल्याउने भएको छ।
विश्वभर इलेक्ट्रिक सवारीको माग तथा प्रयोग बढ्दै गएकाले सबैजसो सवारी उत्पादकहरु इलेक्ट्रिक सवारी उत्पादनमा केन्द्रित भएका छन्। त्यस्तै धेरैजसो सवारी उत्पादकले पनि भारतलाई नै आधार बनाएर एसियाली क्षेत्रसहित विश्वभर सवारी बिक्री गर्ने योजना बनाइ प्लान्ट स्थापना गरिरहेका छन्।
बिएमडब्लू ग्रुपले पनि भारतमा मिनी ब्रान्डमा इलेक्ट्रिक कार ल्याउने भएको हो। कम्पनीले भारतसहित एसियाली बजारलक्षित प्लान्ट स्थापना गर्न लागेको जनाएको छ। कम्पनीले भारतमा उत्पादन गर्ने मोडल एसियाली बजारका उपभोक्ताको रोजाइअनुसार हुने मिनीको एसिया प्यासिफिक हेड फ्रास्वाँ रोकको भनाइ छ। भारतमा सरकारले इलेक्ट्रिक सवारीलाई प्राथमिकता दिने नीतिसहित पूर्वाधारको विकासमा जोड दिएकाले यो बजार कम्पनीका लागि अवसर हुने उनले बताए।
बिएमडब्लूको स्वामित्वमा रहेको बेलायती ब्रान्ड मिनीले पहिलो पटक मिनी कुपर एसई विश्व बजारमा सार्वजनिक गरेको थियो। यो कारको मूल्य २९ हजार ९ सय अमेरिकी डलर राखिएको छ। भारतीय बजारमा मिनीले २०२० को पहिलो त्रैमासमा नयाँ क्लबम्यान सार्वजनिक गर्ने तयारी गरेको छ। भारतीय बजारमा उत्पादन भएपछि बिएमडब्लूका सवारी नेपाली बजारमा समेत सहज तथा केही सस्तो मूल्यमा आउने छ।
त्यस्तै, नेपाली बजारमा बिएमडब्लू ब्रान्ड औपचारिक रुपमा बिक्री सुरु हुने भएको छ। २०२० को जनवरीमा आधिकारिक बिक्रेतासहित बिएमडब्लूका कार बिक्री हुने भएका हुन्। यसअघि पनि बिएमडब्लूका कार बिक्री भए पनि आधिकारिक बिक्रेताविना नै आएको थियो। अब भने बिक्रेताले सर्भिस सेन्टरसहित सवारी बिक्री गर्ने भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
