काठमाडौं- तत्कालीन किस्ट बैंक घोटाला प्रकरणमा उच्च अदालतको फैसलापछि थुनामा रहेका बैंकर कमल ज्ञवालीको मुद्दा सर्वोच्च अदालतले सुनुवाई गर्ने तयारी गरेको छ। बिहीबार प्रधानन्यायाधीश चोलेन्द्र सम्सेर राणासहितको इजलासले उनको पुनरावेदन निवेदनमा सुनवाई गर्ने निर्णय सुनाएको हो।
तीन न्यायाधीशको इजलासले ज्ञवालीको बन्दीप्रत्यक्षीकरण निवेदन सुनुवाई गर्न अनुमति दिएको हो। उच्च अदालत पाटनको वाणिज्य इजलासले ज्ञवालीलाई दोषी ठहर गर्दे कैद सजाय पनि सुनाएको थियो।
वाणिज्य इजलासले यस्तो फैसला सुनाउँदा उनी फरार थिए। फरार रहेका उनलाई प्रहरीले पक्राउ गरेर कैदमा राखेको छ। आफूले मुद्दाको म्याद नै नपाएको जिकीर गर्दै ज्ञवाली सर्वोच्च आएका थिए।
उच्च अदालतको मुद्दा र फैसलाबारे आफूलाई जानकारी नै नदिइएकाले उक्त म्याद बदर भई गैरकानुनी थुनाबाट आफू मुक्त हुनुपर्ने उनको दाबी थियो।
सुरुमा सर्वोच्चले ज्ञवालीको तर्क अस्वीकार गर्दै आदेश दिन अस्वीकार गरेको थियो। तर उनले उक्त आदेश पुनरवलोकन हुनुपर्ने निवेदन दिएपछि प्रधानन्यायाधीश राणा, न्यायाधीश प्रकाशमान सिंह राउत र सपना प्रधान मल्लको इजलासले २०७६ असोज २ गते हालेको निवेदनमा फैसला सुनाउँदै यस्तो आदेश गरेको हो।
सर्वोच्चको यो आदेशपछि ज्ञवालीलाई थुनामा राखिएका विषयमा अब पुनः परीक्षण हुनेछ। ज्ञवालीले म्याद बुझे/नबुझेको बारेमा पनि सर्वोच्चले निर्णय गर्नेछ।
यस्तो थियो घटना
ज्ञवालीले सिद्धार्थबाट लिएको ऋणको सावाब्याज तिर्न नसकेको समयमा उनीमाथि राष्ट्र बैंकमा बैंककै कर्जा दुरुपयोगको उजुरी दर्ता भएको थियो।
उक्त उजुरीलाई आधार मान्दै राष्ट्र बैंकले ०६९ मा उनीमाथि छानबिन गर्दा १२ करोड रुपैयाँ पर्ने धितोमा साढे १५ करोड रुपैयाँ ऋण दिएको रहस्य खुलेको थियो। राष्ट्र बैंकले जम्को मिडिया प्रालि नामक कम्पनीबाट साढे ३ करोड रुपैयाँ तत्काल उठाउन निर्देशन दियो। सो काण्डमा राष्ट्र बैंकले ज्ञवालीलाई ५ लाख रुपैयाँ जरिवाना समेत गर्यो।
उनीको साक्षी बसेका किशोर ढकालमाथि बैंकिङ कसुरअन्तर्गत नेपाल प्रहरीको केन्द्रीय अनुसन्धान ब्युरो (सिआइबी)ले अनुसन्धान थाल्यो। बयानका क्रममा ढकालले उक्त रकम ज्ञवालीले नै चलाएको र आफू ऋणीमात्र भएको बयान दिए। ढकाललाई दिएको ऋण ज्ञवालीले नै प्रयोग गरेको खुलेपछि २०७० जेठ २२ मा ज्ञवाली पत्नी गौरी ज्ञवालीलाई महाराजगञ्जस्थित निवासबाटै प्रहरीले पक्राउ गर्यो। कमल भेटिएनन्। गौरी केही समयपछि धरौटीमा छुटिन् र फरार भइन्। यो प्रकरणमा उच्च अदालतमा बैंकिङ कसुर मुद्दा दायर भयो। पुनरावेदन अदालत पाटनले कम मूल्यांकनको जग्गा धितो राखी ऋण प्रवाह र अपचलन मुद्दामा ज्ञवालीसहित ९ जनालाई दोषी ठहर गर्ने फैसला सुनायो।
वाणिज्य इजलासले बैंकका तत्कालीन सिइओ कमल ज्ञवाली, ऋणी ढकाल, जमानीकर्ता देवकी बस्ताकोटी र मूल्यांकनकर्ता कोमानन्द अधिकारी लगायतले मिलेमतोमा बैंक ऋण अपचलन गरेको ठहर गरेको थियो।
सिइओ ज्ञवालीलाई ४ करोड २७ लाख रुपैयाँ जरिवाना र ४ वर्ष कैद, ऋणी ढकाल र जमानीकर्ता बस्ताकोटीलाई समेत मुख्य दोषी ठहर गर्दै ४ वर्ष कैद र ४ करोड २७ लाख जरिवाना असुल उपर गर्न आदेश गर्यो। न्यायाधीशद्वय किशोरकुमार सिलवाल र चण्डीराज ढकालको संयुक्त इजलासले ज्ञवाली, ढकाल र बस्ताकोटीलाई बैंकिङ कसुरमा दोषी ठहर गर्दै उनीहरूबाट दामासाही रुपमा १२ करोड ८० लाख ५० हजार बिगो भराउने र जनही ४ वर्ष कैद फैसला सुनायो।
यस्तै मूल्यांकनकर्ता कोमानन्द अधिकारीलाई २ करोड ३६ लाख जरिवाना र ४ वर्ष कैद हुने फैसला उच्चले सुनायो। अदालतले उक्त मुद्दामा बैंकका तत्कालीन सहायक महाप्रबन्धक बालनरसिंह घर्ती, व्यवस्थापन समूहका प्रगुण श्रेष्ठ, मधुसुदन शर्मा र ईश्वर गुरुङलाई पनि जनही २ वर्ष कैद फैसला सुनाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
