लस एन्जलस– सिनेमाको दुनियाका लागि चर्चित मानिएको ओस्कार अवार्डमा पछिल्लो एक वर्षमा निधन भएका कलाकारलाई श्रद्धाञ्जली दिइएको छ। अमेरिकाको लस एन्जलसस्थित डल्बी थिएटरमा सम्पन्न सो अवार्ड सेरेमोनीमा बलिउडका चर्चित कलाकारद्वय शशि कपुर र श्रीदेवीलाई पनि श्रद्धाञ्जली दिइएको छ।
भारतीय सिनेमा क्षेत्रमा लामो समय क्रियाशिल यी दुई हस्तीलाई पछिल्लो एक वर्षभित्रमा बलिउडले गुमाएको थियो। अभिनेता तथा निर्देशक शशि कपुरको ७९ वर्षको उमेरमा सन् २०१७ को डिसेम्बर ४ मा भारतको मुम्बईस्थित कोकिलाबेन धिरुभाइ अम्बानी अस्पतालमा निधन भएको थियो।
शशि कपुरले आफ्नो फिल्मी जीवनमा १ सय ६८ भन्दा बढी चलचित्रमा अभिनय गरेका छन्। शशि कपुरले भारतीय सिनेमाका अलावा अंग्रजी चलचित्रहरु दि हाउसहोल्डर, सेक्सपियर वाला, दि गुरु, बम्बै टाल्की र इन कस्टडीलगायतमा मुख्य कलाकारको रुपमा अभिनय गरेका छन्।
उता गत फेब्रुअरी २४ मा दुबईमा एक विवाह समारोहमा सरिक हुन गएकी भारतीय चर्चित अभिनेत्री श्रीदेवीको बाथ टबमा डुबेर मृत्यु भएको थियो। सन् २०१३ मा भारतको प्रशिद्ध पध्मश्रीबाट सम्मानित श्रीदेवीलाई बलिउडकी ‘लेडी अमिताभ’को रुपमा लिइन्छ।
५४ वर्षको उमेरमा निधन भएकी श्रीदेवीले आफ्नो ४५ वर्ष लामो फिल्मी जीवनमा ३ सयभन्दा बढी चलचित्रमा अभिनय गरेकी छन्।
सो सेरेमोनीमा पछिल्लो एक वर्षमा निधन भएका कलाकारहरु रोगर मुर्रे, म्यारी गोल्डबर्ग, जोहान जोहानसन, जोन हेयर्ड तथा साम सेफर्डलगायतलाई समेत श्रद्धाञ्जली दिइएको थियो।
एकेडमी अवार्ड भनेरसमेत चिनिने ओस्कारको यो ९०औँ संस्करण हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
