राजविराज– हिन्दी, नेपाली, मैथिली तथा भोजपुरी भाषाका चर्चित गायक उदितनारायण झाले झन्डै २ दशकपछि जन्मस्थल सप्तरीको भारदहमा होली मनाएका छन्।
भारतको मुम्बईमा बसोबास गर्दै आएका झा गत फागुन ७ मा पारिवारिक कामका लागि नेपाल आएका हुन्। ०५७/०५८ पछि भारदह आएका उनले शुक्रबार सहपाठीहरुसँग होली खेलेर रमाइलो गरे। उदित तथा उनका सहपाठीहरु दुर्गाप्रसाद खड्गा, प्रमोद झा लगायतले होलीको चर्चित गित ‘जोगिरा सरर...’ होली मनाएका हुन्।
भारदहमा स्थानीयहरुसँग होली मनाउँदै उदित नारायण
उदित आफूले नै गाएको ‘यो गाउँको ठिटो म, कान्छा मेरो नाम, आउँदै जाँदै गर्नु है सबलाई राम राम...’ भन्ने गीत गाउँदै नाचगानमा सहभागी भएका थिए। उनले यो गीत गाउँदा गाउँले युवा उत्सुक र भावुक बनेका थिए।
नाचगान गरेर होली मनाउने बाहेक उदित कंकालिनी मन्दिरमा पूजाआजा गरी घरमै भेटघाटनमा ब्यस्त हुने गरेको छिमेकीहरुले बताए। उनले सञ्चारकर्मीहरुसँग भने कुरा गर्न मानेका छैनन्।
०५७/०५८ अघि उदित बर्सेनि गाउँ आउँथे। प्रायः दशैंका बेला उदितको आगमन भारदहाबासीका लागि उल्लासमय हुन्थ्यो। मधवापुर, मैनाकडेरी, कञ्चनपुर, बरमझिया, तिलाठी, राजविराज, सिमापारी कुनौली कमलपुर, डगमारा, निर्मली लगायतका गाउँबाट प्रशंसकहरु उनलाई भेट्न जम्मा हुन्थे।
घरमा आएका गाउँलेसँग भलाकुसारी गर्दै उदित नारायण
सन् १९५५ डिसेम्बर १ मा तत्कालीन भारदह १ मा जन्मेका उदितको बाल्यकाल अभाव र कष्टमै बितेको स्थानीयहरु वबाउँछन्। हाल उनको घर भारदह–४ (हनुमाननगर कंकालिनी नगरपालिका–१) मा छ। युवाअवस्थामा उदितले भारदहमा इलाका प्रहरी कार्यालय र कंकालिनी मन्दिर स्थापनामा ठूलो सहयोग गरेको भारदहका पूर्व गाविस अध्यक्ष पवन मण्डलले बताए।
भारदहस्थित उदित नारायण झाको घर
उदितले मैथिली, नेपाली, हिन्दी लगायतका भाषमा झन्डै १५ हजारभन्दा बढी गीत गाएका छन्। उनलाई नेपालमा गोरखा दक्षिण बाहु र भारतमा पद्मश्री सम्मान प्रदान गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
