काठमाडौं- राजश्वसम्बद्ध अधिकारीहरुले कर तथा भन्सारमा देखिएका समस्या समाधानका लागि नीतिगत सम्बोधन गर्न सरकार तयार रहेको बताएका छन्।
राष्ट्रिय कर दिवसका अवसरमा नेपाल उद्योग परिसंघमा आयोजित अन्तरक्रियामा राजश्व सचिव शिशिरकुमार ढुंगानाले करको संरचनागत सुधारका प्रयासहरु भइरहेको बताएका छन्। राजस्व परिचालनमा सरकार र निजी क्षेत्र सँगसँगै रहनुपर्ने उनको भनाइ छ। कर प्रणालीलाई पारदर्शी बनाउन कानुनी र प्राविधिक सुधारलाई सँगसँगै लगिएको सचिव ढुंगानाले बताए।
लगानी विस्तार तथा निर्यातकहरुलाई कर सहुलियत बढाउन सरकार प्रतिबद्ध रहेको भन्दै सचिव ढुगांनाले सामाजिक न्यायको प्रतिवद्धता पुरा गर्न तथा आम्दानी खर्चमा सन्तुलन ल्याउनु पर्ने भएकाले करबाट मात्र सहुलियत नखोजेर अन्य क्षेत्रमा सहयोग गर्न सरकार तत्पर रहेको उल्लेख गरे।
कार्यक्रममा अर्थ मन्त्रालय राजस्व महाशाखा प्रमुख धनिराम शर्मा तथा आन्तरिक राजस्व विभागमा उप–महानिर्देशक थानेश्वर गौतमले कर तिर्ने प्रक्रियामा रहेका झन्झट हटाउने उपायबारे अध्ययन भइरहेको र त्यसले दिने सुझावलाई कार्यान्वयनमा लैजाने प्रतिवद्धता व्यक्त गरे। मूल्य अभिवृद्धि कर फिर्तामा भइरहेको ढिलाइ सम्बोधन गर्न छिट्टै कार्यविधि तयार हुने जानकारी पनि उप–महानिर्देशक गौतमले गराए।
अन्तरक्रिया राजस्व तथा करको नीतिगत तथा संरचनागत अवस्थाबारे प्रस्तुति दिँदै अर्थविद् विश्व पौडेलले करमा अन्तःशुल्कको भार कम गर्दै लैजाने, करको दायरा विस्तार गर्ने तथा करलाई लगानीमैत्री बनाउन जरुरी रहेको औँल्याए। व्यवसायबाट प्राप्त नाफालाई सोही व्यवसाय विस्तारमा लगाएर रोजगारी सिर्जना तथा उत्पादकत्व बढाउने लगानीकर्तालाई सहुलियत दिएमा अर्थतन्त्रको आधार विस्तार हुनेतर्फ अर्थविद् पौडेलले नीति निर्माताको ध्यानपुग्नु पर्नेमा जोड दिए।
सो अवसरमा परिसंघका अध्यक्ष सतिशकुमार मोरले राजस्व तथा करका क्षेत्रका समसामयीक विषयमा नीतिगत सुधार तथा व्यवहारिक समस्या समाधानका लागि अन्तरक्रिया आयोजना गरेको बताए। अध्यक्ष मोरले कर प्रणालीमा संरचनात्मक सुधार गरी आयातमा रहेको निर्भरतालाई घटाइ क्रमशः आन्तरिक आर्थिक कृयाकलापमा आधारित तुल्याइ दिगो राजस्व प्रणालीमा रुपान्तरण गर्ने नीति लिइनुपर्ने उनको भनाइ छ।
अन्तरक्रियामा परिसंघमा आवद्ध उद्योगी व्यवसायीहरुले केही वस्तुहरुमा कच्चा पदार्थको आयातभन्दा तयारी वस्तु आयात गर्दा भन्सार दर सस्तो रहेको, पर्यटन क्षेत्रमा करको भार बढेको र कर फिर्तामा झन्झटहरु रहेकोतर्फ कर अधिकारीहरुको ध्यानाकर्षण गराएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
