काठमाडौं- नवनियुक्त भौतिक पूर्वाधार तथा यातायात मन्त्री बसन्तकुमार नेम्वाङले पूर्वाधारको क्षेत्रमा धेरै काम गर्नु पर्ने भएकाले सबैको सहयोग गर्ने विश्वास व्यक्त गरेका छन्। सपथ ग्रहणपछि पदभार ग्रहण गर्दै उनले यस्तो बताएका हुन्।
काठमाडौंको बाटोको अवस्था आफूले पनि देखेको भन्दै उनले भने, ‘एउटा सामान्य मान्छेको रुपमा मैले पनि काठमाडौंको बाटोको अवस्था देखेको छु। यसलाई राम्रो बनाउन म लाग्ने छु।’
यो मन्त्रालयले गर्ने काम र यस मातहतका विभागबाट हुने कामलाई प्रभावकारी बनाउन आफू लागि पर्ने उनको भनाइ छ। ‘मन्त्रीको रुपमा आइसकेपछि स्थाइ सरकारको रुपमा रहेको व्युरोक्रेसीसँग ब्रिफिङ लिएर आवश्यक कदम चाल्ने छु,’ उनले भने, ‘मन्त्रालयले गर्नुपर्ने कामहरु र भइरहेको काम बारे बुझेपछि मात्र के गर्न सकिन्छ र कसरी गर्न सकिन्छ भन्ने स्पष्ट हुनेछ।’
प्रधानमन्त्रीको अभियानमा सहयोग गर्न भौतिक पूर्वाधार मन्त्रालयमा आएको नेम्वाङको भनाइ छ। मन्त्रीले चाहेर मात्र सबै काम नहुने भन्दै उनले कर्मचारीतन्त्रको ठूलो सहयोग आवश्यक पर्ने र यसमा पूर्ण सहयोगको अपेक्षासमेत गरेको नेम्वाङले बताए।
‘नयाँ र परिवर्तित सोचअनुसार काम गरेन भने समृद्धिको बाटो पहिल्याउन गाह्रो छ। परिवर्तित सन्दर्भमा नयाँ कानुनहरु बनाउनु पर्ने छ। त्यसमा कति बनेका होलान् कति बन्दै होलान्। ऐन, नियम, नियमावलीहरु बनाएर कामलाई तिब्रता दिइने छ,’ पदभार ग्रहण गर्दै उनले भने।
भौतिक पूर्वाधारको क्षेत्रमा ठूला-ठूला आयोजनाहरु बन्ने क्रममा छन् भने अति बनाउनुपर्ने छ। त्यसमा सबैको साथ र सहयोग भएन भने बनाउन नसकिने भन्दै सबै क्षेत्रले हातेमालो गरेर लाग्नुपर्ने बताए।
त्यस्तै निवर्तमान मन्त्री रघुवीर महासेठले प्रधानमन्त्रीको अभियानलाई मन्त्री हुँदा र अब बाहिर हुँदा पनि सहयोग जारी रहने बताए। ‘नयाँ मन्त्रीको रुपमा भौतिक पूर्वाधार तथा यातायात मन्त्रालयमा उहाँ (नेम्वाङ) आउनु भएको छ,’ महासेठले भने, ‘उहाँले सहयोग माग्नु भयो भने म पक्कै सहयोग गर्छु। राजनीतिक रुपम सहयोग गर्दै आएको हो। मेरा मित्र पनि भएकाले अब मन्त्रालयको विषयमा पनि सहयो गर्ने नै छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
