काठमाडौं- मूल्यवृद्धि नियन्त्रणमा सरकार असफल देखिएको छ। नेपाल राष्ट्र बैंकले सार्वजनिक गरेको तथ्यांकअनुसार सरकार आफैंले निर्धारण गरेको मूल्यवृद्धिको सीमा कायम राख्न नसकेको देखिएको हो।
सरकारले चालु आर्थिक वर्ष २०७६/७७ मा मूल्यवृद्धि ६ प्रतिशतभन्दा बढी हुन नदिने लक्ष्य राखेको छ। तर, राष्ट्र बैंकले सार्वजनिक गरेको तथ्यांकअनुसार यस आर्थिक वर्षको पहिलो ३ महिना अवधिमा मूल्यवृद्धि ६ प्रतिशत नाँघेको हो।
असोज मसान्तसम्ममा वार्षिक बिन्दुगत उपभोक्ता मुद्रास्फीति ६ दशमलव २१ प्रतिशत रहेको छ। अघिल्लो वर्षको सोही महिनामा यस्तो मुद्रास्फीति ४ दशमलव ६८ प्रतिशत रहेको थियो।
यस अवधिमा खाद्य तथा पेय पदार्थ समूहको मुद्रास्फीति ७ दशमलव ४ प्रतिशत र गैर-खाद्य तथा सेवा समूहको मुद्रास्फीति ५ दशमलव ५५ प्रतिशत रहेको छ।
असोज मसान्तसम्मको अवस्था हेर्दा खाद्य तथा पेय पदार्थ समूह अन्तर्गत मुख्यतः तरकारी, मासु तथा माछा, फलफूल र मसला उपसमूहको मूल्य वृद्धि उच्च रहेको छ।
त्यसैगरी, गैर–खाद्य तथा सेवा समूह अन्तर्गत मुख्यतः घरायसी उपयोगिताका वस्तु तथा सेवा, लुगा तथा जुत्ता र शिक्षा उपसमूहको मूल्य बढेको छ।
यो अवधिसम्ममा काठमाडौं उपत्यकामा ८ दशमलव १४ प्रतिशत, तराईमा ५ दशमलव ७५ प्रतिशत, पहाडमा ४ दशमलव ८९ प्रतिशत र हिमालमा ५ दशमलव ११ प्रतिशत मुद्रास्फीति रहेको छ। २०७५ असोजमा यी क्षेत्रहरुमा क्रमशः ४ दशमलव ४ प्रतिशत, ४ दशमलव ३४ प्रतिशत, ६ दशमलव १० प्रतिशत र ४ दशमलव २४ प्रतिशत मुद्रास्फीति रहेको थियो।
असोज मसान्त सम्ममा नेपालको वार्षिक बिन्दुगत उपभोक्ता मुद्रास्फीति ६ दशमलव २१ प्रतिशत रहेकोमा भारतमा यस्तो (अक्टोबर महिनाको) मुद्रास्फीति ४ दशमलव ६२ प्रतिशत रहेको छ। अघिल्लो वर्षको सोही महिनामा नेपाल र भारतको मुद्रास्फीति क्रमशः ४ दशलमव ६८ प्रतिशत र ३ दशमलव ३८ प्रतिशत रहेको थियो।
यस अवधिमा वार्षिक बिन्दुगत थोक मुद्रास्फीति ५ दशमलव १० प्रतिशत रहेको छ। अघिल्लो वर्षको सोही अवधिमा यस्तो मुद्रास्फीति ९ दशमलव १७ प्रतिशत रहेको थियो। खाद्य पदार्थ, यातायात उपकरण तथा पार्ट्स र टेक्सटाइल उपसमूहको थोक मूल्य वृद्धि उच्च रहेको देखिन्छ।
बृहत् आर्थिक वर्गीकरणको आधारमा उपभोग्य वस्तु, मध्यवर्ती वस्तु र पुँजीगत वस्तुको थोक मूल्यवृद्धि क्रमशः ११ दशलमव ९५ प्रतिशत, १ दशमलव ६१ प्रतिशत र २ दशलमव ४६ प्रतिशत रहेको छ। निर्माण सामाग्रीको थोक मूल्य भने २ दशमलव ४१ प्रतिशतले घटेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
