लुम्बिनी- लुम्बिनी प्रेस क्लब, रुपन्देहीको आयोजनामा भएको लुम्बिनी न्यूज फेस्टिवल १६ बुँदे निष्कर्षपत्र सार्वजनिक गर्दै सम्पन्न भएको छ।
“संघीयतामा सञ्चार, समृद्धिका लागि मोफसल नै मूलधार” भन्ने मूल नाराका साथ सम्पन्न न्यूज फेस्टिवलले नेपालको राष्ट्रियता, भौगोलिक अखण्डता तथा सार्वभौमिकताप्रति सदैव सहमति कायम गर्न सम्पूर्ण राजनीतिक दल, नागरिक समाज, प्राज्ञिक वर्ग, बुद्धिजीवि, पत्रकार, गैरसरकारी संस्था एवं सर्वसाधारणलाई आह्वान गरेको छ।
त्यस्तै समृद्धिका लागि सञ्चार क्षेत्रको पुर्नसंरचना गरी सूचना तथा ज्ञानयुक्त समाजको सिर्जना गरी नेपालीको जीवनस्तर उकास्ने, आर्थिक समृद्धि र विकास प्राप्ती गर्ने, विश्वमा नेपालको छवि उँचो बनाउने र गणतन्त्रलाई सुदृढ बनाउन सञ्चार क्षेत्रको तर्फबाट आवश्यक भूमिका निर्वाह गर्ने महोत्सवले प्रण गरेको छ।
त्यस्तै न्यूज फेस्टिवलले स्थानीय, सामुदायिक तथा जनताद्वारा सञ्चालित मिडियाहरुलाई संरक्षण र प्रोत्साहन गर्ने नीति अवलम्बन गर्न संघ, प्रदेश र स्थानीय तहका सरकारसमक्ष माग गरेको छ। नेपाली मिडियामा व्याप्त केन्द्र र मोसफल भन्ने अवधारणा समाप्त पार्दै आफू कार्यरत संघ, हरेक प्रदेश र स्थानीय तहलाई नै केन्द्र मान्दै आ–आफ्ना क्षेत्रका समाचार र विचार जनता, सरकार र सम्बन्धित निकायमा व्यापक रुपले पुर्याउने महोत्सवले प्रतिबद्धता व्यक्त गरेको छ।
त्यसैगरी पत्रकार आचारसंहिता दृढता पूर्वक पालना गर्दै व्यवसायिक पत्रकारिताप्रति प्रतिबद्ध रहने, राजनीतिक दलसंगको आबद्धता र सरकार निकट बन्ने सोचाँइबाट मुक्त हुने, पत्रकारिताको पेशाप्रति पूर्ण निष्ठावान भइ आफूलाई सबै प्रकारका प्रविधि एवं सीपबाट सुसज्जित बनाउँदै न्यू मिडिया न्यू मिडियम, ट्रेडिशनल मिडियम आदिको व्यापक प्रयोग गरी नेपाली पत्रकारितालाई स्मार्ट जर्नालिज्म उन्मुख गराउने, राष्ट्रको समृद्धिका साथसाथै राष्ट्रियता, जनजीविका, स्वाधिनतता र जनताको सक्रियतामा सञ्चालित न्यायपूर्ण आन्दोलनमा जनता केन्द्रीत मिडियाको रुपमा सक्रियतापूर्वक सहभागि हुने महोत्सवले अठोट गरेको छ।
डिजिटल र इलेक्ट्रोनिक मिडियासम्बन्धी प्रतिकूल कानूनहरुमा तत्काल परिमार्जन गरी समयसापेक्ष बनाउनुपर्ने, छापामाध्यम, एफएम रेडियो र टेलिभिजनजस्ता सञ्चारमाध्यम स्थापनापूर्व सम्भाव्यता अध्ययन गरी आवश्यक महसुस भएको खण्डमा मात्र स्थापना गर्न सम्बन्धित निकायहरुसमक्ष महोत्सवले अपिल गरेको छ।
लुम्बिनी बौद्ध विश्वविद्यालयका रजिष्टार डा.तिलकराम आचार्यको संयोजकत्वमा गठित निष्कर्ष लेखन समितिले यस्ताे निष्कर्ष निकालेको हो। बुद्ध जन्मस्थल लुम्बिनीमा आयोजित तीनदिने फेस्टिवलमा देशभरीका ३ सय बढी पत्रकारको सहभागिता रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
