फुटबल

सागलाई तयार हुँदैछ रंगशाला, रातमा यस्तो देखिन्छ दृश्य

ऋग्वेद शर्मा शुक्रबार, कात्तिक २९, २०७६ १६:५१

काठमाडौं- नेपालमा आयोजना हुन लागेको १३ औँ दक्षिण एसियाली खेलकुद (साग) सुरु हुन १६ दिन मात्रै बाँकी छ। तर, उद्घाटनका लागि दशरथ रंगशाला नै तयार भइसकेको छैन।

सागमा काठमाडौंमा १९, पोखरामा ९ र जनकपुरमा १ खेल हुँदै छन्। यसैले उद्घाटन मात्रै होइन दशरथ रंगशालाले सागका महत्वपूर्ण खेलहरुलाई पनि समेट्नु पर्नेछ। अझ मंसिर १५ देखि २४ सम्म हुने सागका लागि मात्रै होइन विश्वकप फुटबलको छनोटका लागि कुवेतविरुद्ध ३ गते हुने खेलकै लागि रंगशाला तयार पार्ने काम भइरहेको थियो। तर, रंगशालाको काम सकिएन।

दशरथ रंगशाला तयार नभएर विश्वकप छनोटमा कुवेतविरुद्धको खेल भुटानमा हुने भए पनि सागका लागि भने रंगशालाको मुहार फेरिँदै छ। राष्ट्रिय खेलकुद परिषद (राखेप)का सदस्यसचिव रमेश सिलवालदेखि युवा तथा खेलकुद मन्त्री जगतबहादुर विश्वकर्मासमेत भौतिक संरचना साग अगावै तयार पार्ने दौडधुपमा लागिरहेका छन्। ‘देशको प्रतिष्ठासँग जोडिएको खेल महोत्सव हामी राम्ररी आयोजन गर्नेछौँ। तयारी लगभग पूरा भएका छन्। १० दिनमा सबै कुरा तयार हुनेछ’ मन्त्री विश्वकर्माले बताए।

सदस्यसचिव सिलवालले पनि मंसिर ५ गतेभित्र रंगशाला तयार हुने कुरामा जोड दिइरहेका छन्। ‘मंसिर ५ सम्मका हामी जसरी पनि तयार पारिसक्छौँ। १६ हजार सिट लगाउनुपर्नेमा ८ हजार लगाइसकेका छौँ। भिआइपी प्याराफिटमा केही समय लागेको हो। त्यसको काम पनि तीव्र गतिमा भइरहेको छ। साउण्ड सिस्टम र अरु कामहरु पनि समयमै सक्ने छौँ।’

रंगशालामा राखेपले पूर्वाधार तथा अखिल नेपाल फुटबल संघ (एन्फा)ले मैदानको जिम्मा लिएर काम अघि बढाए पनि समयमै काम हुन नसकेको हो। २०७२ को वैशाखमा गएको भूकम्पले क्षतिग्रस्त भएको रंगशालाको पुनर्निर्माणको मिति सर्दै जाँदा अन्तिम समयमा चटारो थपिएको छ।
सागको उद्घाटनकै बेला रंगशालामा झण्डै १५ हजार मानिस उतारेर कला प्रदर्शन गरिने तयारीसमेत भइरहेको छ। निर्माणकै क्रममा रहेको रंगशालामा रातको समय दुईतिरका केही ‘फ्लड लाइट’ बाल्दा यस्तो देखिन्छ,