काठमाडौं- बंगलादेशविरुद्धको टी २० सिरिजको तेस्रो खेलमा भारतका दीपक लोकेन्द्रसिंह चाहरले जस्तो खेल देखाए त्यसले क्रिकेट समर्थकमाझ उनको चर्चा चुलिएको छ। नयाँ बलमा पनि ‘स्वीङ’ गराउन सक्ने उनको क्षमता बंगलादेशविरुद्ध विशेष रुपमा देखिएको थियो।
चाहरले ३.२ ओभर बलिङ गरेर ७ रन दिँदै ६ विकेट लिए। त्यसमा १८ औँ ओभरको अन्तिम बलमा बंगलादेशका सफिउल इस्लामलाई आउट गरेका चाहरले २० औँ ओभरको पहिलो बलमा मुस्तफिजुर रहमान र दोस्रो बलमा अमिनुल इस्लामलाई आउट गर्दै ह्याट्रिक नै लिए।
चाहरको ७ रन दिएर ६ विकेट लिनु अन्तर्राष्ट्रिय टी २० क्रिकेटमा सबैभन्दा राम्रो बलिङ तथ्यांक हो। यसअघि २०१२ को सेप्टेम्बरमा जिम्बावेविरुद्ध श्रीलंकाका अजन्ता मेन्डिसले ८ रन दिएर लिएको ६ विकेट कीर्तिमानमा थियो। मेन्डिसले नै २०११ मा अस्ट्रेलियाविरुद्ध १६ रन दिएर ६ विकेट लिएका थिए। तर, अहिले यी सबै तथ्यांकलाई पछि पार्दै चाहर अगाडि देखिएका छन्।
बंगलादेशविरुद्ध पहिलो खेलमा चाहरले ३ ओभरमा २४ रन दिएर एक विकेट र दोस्रो खेलमा ४ ओभरमा २५ रन दिएर एक विकेट लिएका थिए। दुई खेलमा खासै नचले पनि तेस्रो खेलमा चाहरकै उत्कृष्ट बलिङमा भारतले टी २० श्रृङ्खला नै जित्यो। पहिलो खेलमा बंगलादेशसँग ७ विकेटले हारेको भारतले दोस्रो खेल ८ विकेटले जितेको थियो। तेस्रो खेलमा आइतबार राति ३० रनले जित्दै भारतले तीन खेलको श्रृङ्खला नै जितेको हो।
भारतीय टी २० टिममा पर्न सक्नुमा चाहरको क्षमता जसरी देखिएको थियो, बंगलादेशविरुद्ध उनले त्यसलाई प्रमाणित गरे। नयाँ बलमा उनले देखाएको क्षमताले १ सय ७५ रनको लक्ष्य बंगलादेश दबाबमा परेको थियो। तेस्रो ओभरमा लिन्टन दासलाई आउट पारेका उनले सौम्य सरकार र मोहम्मद मिथुनलाई पनि राम्ररी खेल्न दिएनन्।
यसअघि गएको अगस्टमा वेस्ट इन्डिजलाई ७ विकेटले हराएको खेलमा चाहरले तीन ओभरमा चार रन दिएर तीन विकेट लिएका थिए। त्यसबेला नै नयाँ बलमा आफ्नो बलिङ क्षमता देखाएका ‘मिडियम प्रेसर’ उनले बंगलादेशविरुद्ध त निकै राम्रो बलिङ गरे।
बंगलादेशविरुद्ध भारतको बलिङले १ सय ७४ रन जोगाउन सक्ला भन्ने प्रश्नमा चाहर खरो उत्रिए। पाँच जना मात्रै बलर राखेर खेलिरहेको भारतमा पाँचौ बलरमा पनि धेरै अनुभव नभएका शिबम दुबे थिए। आफ्नो तेस्रो टी २० अन्तर्राष्ट्रिय खेलिरहेका दुबे विशेष त ब्याटिङका लागि नै चिनिन्छन्। यस्तोमा लेगस्पिनर युजभेन्द्रर चाहलसँगै ७ अन्तर्राष्ट्रिय टी २० मात्रै खेले पनि चाहर नै अनुभवि बलरका रुपमा थिए।
बिशेष त ‘पावर प्ले’ बलरका रुपमा चिनिने चाहरलाई कप्तान रोहित शर्माले नयाँ रुपमा प्रस्तुत गर्नुले पनि उनको क्षमता खारिएको थियो। ‘मैले महत्वपूर्ण ओभरहरुमा बलिङ गर्नुपर्छ भनिएको थियो। विशेष त मैले नयाँ बलमा नै बलिङ गरिरहेको हुन्छु, तर रोहित दाइले अहिले महत्वपूर्ण हुने ओभरमा गराउने कुरा गर्नुभयो। ममाथि विश्वास गरेर दिइएको अवसरले म खुसी छु’ खेलपछि प्रतिक्रिया दिँदै चाहरले भने।
ओसका कारण बल चिप्लिएर अप्ठ्यारो भइरहेको मैदानमा चाहरले हरेक समय बल फाल्नुअघि रुमालले पुछिरहेका थिए। यसैले पावर प्लेमा पाएको एक ओभरमा नै उनले आफ्नो क्षमता देखाए। भिजेको बलमा उनले प्राय त ‘सट बल’ नै फालिरहेका थिए। उनले ‘फुल लेन्थ’मा एकै बल पनि फालेनन्।
उनले ‘गुड लेन्थ’मा फालेका बल पनि खुलेर खेल्न मिल्ने भने थिएन। अन्तिमतिरको ह्याट्रिकको धेरै चर्चा भइरहे पनि भारतको जितको आधार चाहरले त्यसअघि नै तयार पारिसकेका थिए।
खेलपछि चाहरको प्रतिक्रिया थियो– ‘यस्तो गर्न सकुँला भन्ने सपनामा पनि सोचेको थिइनँ। राम्रो खेल्नुपर्छ भनेर सानो बेलादेखि नै मेहनत गरिरहेको हुन्थेँ, जुन अहिले देखिएको छ।’
उनले भनेजस्तै आइतबार रातिको हरेक बल ध्यानपूर्वक हेरिरहेका चाहरका बुबा लोकेन्द्रसिंह चाहर पनि भन्छन्– ‘उनले सबै गरेर एक लाख भन्दा बढी पटक नेटमा बल फाल्दै गरेको अभ्यासले यस्तो खेल देखिन सकेको हो।’ भारतीय वायु सेनाका अवकाशप्राप्त कर्मचारी लोकेन्द्रसिंहले छोराको खेलले आफ्नो लामो समयको प्रतिक्षा पूरा भएको सुनाए।
अहिले २७ वर्ष पुगेका चाहर १८ वर्षको उमेरदेखि नै घरेलु क्रिकेटमा राम्रो चलिसकेका थिए। रञ्जी ट्रफी जस्ता प्रतियोगितामा चलिरहेका उनी केही समय भने घाइते भएर पछाडि बस्नुपरेको थियो। आइपिएलमार्फत पुनरागमन गर्न सकेपछि त चाहरले क्षमता धेरैले नियाले। राष्ट्रिय टिमका पूर्वकप्तना महेन्द्र सिंह धोनीको कप्तानीमा रहेको आइपिएल टिम चन्नई सुपर किंग्समा दुई सिजन खेलेपछि त उनको राष्ट्रिय टिमको बाटोसमेत खुल्यो।
(क्रिकेटर चाहरबारेको यो सामग्री क्रिकइन्फो, क्रिकबज र टाइम्स अफ इन्डियामा आधारित रहेर तयार पारिएको हो।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
