राजविराज- मंसिर १४ गते हुने उप–निर्वाचन अन्तर्गत सप्तरीमा एक मात्र रिक्त स्थानका लागि चुनाव हुने भएको छ। छिन्नमस्ता गाउँपालिका–७ का निर्वाचित अध्यक्ष प्रभाकर यादव जिल्ला समन्वय समितिको प्रमुख भएपछि त्यहाँ उप–निर्वाचन हुन लागेको हो।
निर्वाचनका लागि समय नजिकिँदा पनि धेरैजसो राजनीतिक दलहरूले उम्मेदवार भने टुंगो लगाउन सकेका छैनन्।
श्रीमान्को ठाउँमा श्रीमती उम्मेदवार
उम्मेदवार छनोट गर्ने मामलामा राष्ट्रिय जनता पार्टी नेपाल (राजपा) पहिलो भएको छ। रिक्त अध्यक्ष पदका लागि हुने निर्वाचनमा सो पार्टीले प्रमिला यादवलाई उम्मेदवार बनाउने निर्णय गरेको पार्टीका केन्द्रीय सह–महासचिव गजेन्द्रकुमार मण्डलले बताए।
प्रमिला प्रभाकरकै पत्नी हुन्। उनलाई समाजवादी पार्टी समेतको समर्थनमा साझा उम्मेदवार बनाइने सह–महासचिव मण्डलले दाबी गरे। तर, समाजवादी पार्टीका प्रदेश–२ का सचिव दिनेश कुमार यादवले पार्टीले आफ्नै उमेदवार उठाउने बढी सम्भावना रहेको बताए।
पार्टीको केही दिन भित्र बस्ने प्रदेश कमिटीको बैठकले यसवारे टुंगो लगाउने यादवले बताए। समाजवादीमा सकलदेव साह, वीरेन्द्र मण्डल र शत्रुधन यादवमध्ये एकजना उम्मेदवार बन्ने सम्भावना रहेको उनको भनाइ छ।
उम्मेदवारका बारेमा नेपाली कांग्रेसले पनि अहिलेसम्म निर्णय लिन सकेको छैन। कांग्रेसका जिल्ला सचिव रामकुमार यादवले पनि केही दिनपछि छलफल गरेर निर्णयमा पुगिने बताए। कांग्रेसमा कृष्णकुमार यादव, उदयनारायण मण्डल र शिवनारायण मण्डल मध्ये एक जना उम्मेदवार बन्ने सचिव यादवले जानकारी दिए।
नेपाल कम्युनिष्ट पार्टी (नेकपा)को पनि आधिकाकारिक निर्णय भइसकेको छैन। जिल्ला अध्यक्ष अशोक कुमार मण्डलले दुई दिनभित्रै उमेदवारको टुंगो लाग्ने बताए।
निर्वाचनको तयारी सुरु
राजनीतिक दलहरूले उम्मेदवारको टुंगो लगाउन नसके पनि जिल्ला निर्वाचन कार्यालयले भने निर्वाचनको तयारी सुरु गरेको छ। छिन्नमस्ता गाउँपालिकास्थित श्री भूपेन्द्र नारायाण संस्कृत माध्यमिक विद्यालयमा मुख्य निर्वाचन अधिकृतको कार्यालय स्थापना गरिएको छ। जिल्ला न्यायाधीश चन्द्रमणि ज्ञवालीलाई मुख्य निर्वाचन अधिकृतको जिम्मेवारी दिइएको छ।
जिल्ला निर्वाचन अधिकारी दिलिपकुमार यादवका अनुसार कार्तिक २७ गते उम्मेदवारहरूको मनोनयन दर्ता गरी सूची प्रकाशन, कार्तिक २८ गते उम्मेदवारको विरोधमा उजुरी दिने, कार्तिक २९ गते मनोनयन पत्र र उजुरीको विषयमा जाँचबुझ गरी मनोनयन भएका उम्मेदवारको नामावली प्रकाशन गर्ने तालिका छ।
कार्तिक ३० गते उम्मेदवारको नाम फिर्ता र सोही दिन उम्मदेवारको अन्तिम नामावली प्रकाशन गर्ने, मंसिर १ गते उम्मेदवारहरूलाई निर्वाचन चिह्न प्रदान गर्ने र मंसिर १४ गते बिहान ७ बजेदेखि साँझ ५ बजेसम्म मतदान हुनेछ।
छिन्नमस्ता–७ हाटीस्थित राष्ट्रिय प्राथमिक विद्यालयमा क र ख गरी २ वटा मतदान केन्द्र कायम गरिएको जिल्ला निर्वाचन कार्यालय सप्तरीले जनाएको छ।
२ सय ८८ मतदाता थपिए
उक्त वडामा ७ सय ५७ पुरुष र ६ सय ४६ महिला गरी १ हजार ४ सय ३ मतदाता छन्। पहिलो स्थानीय तहको निर्वाचनमा सो वडामा एक हजार १ सय ७५ मतदाता थिए। अहिले २ सय २८ मतदाता थपिएर मतदाता संख्या १ हजार ४ सय ३ पुगेको जिल्ला निर्वाचन कार्यालयले जनाएको छ।
मंसिर १ गतेदेखि मतदाता शिक्षा लगायतको काम अघि बढाइने छ। मतपत्र र मतदान गर्ने तरिका, मतसदर र बदर हुने अवस्था र मतपत्र पट्टयाउने लगायतका तरिकाहरू सिकाउन मतदाता शिक्षा पनि सञ्चालन गरिने जिल्ला निर्वाचन अधिकारी यादवले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
