शनिबार छठ पर्वको अवसरमा काठमाडौँको कमलपोखरीमा पुगी सूर्यलाई अर्घ्य दिँदै राष्ट्रपति विद्यादेवी भण्डारी। तस्बिरः प्रदीपराज वन्त/रासस
काठमाडौं- राष्ट्रपति विद्यादेवी भण्डारी छठपर्वको उपलक्ष्यमा गुह्येश्वरीमा गई बाग्मती नदीबीचमा स्थापित छठी माताको मन्दिरमा पूजाअर्चना गरी सूर्यलाई अर्घ्य दिएकी छन्।
छठपर्व मनाउन गौरीघाटदेखि गुह्येश्वरीसम्मको इलाकामा बाग्मती नदीको पानीको बहाव रोकेर निर्माण गरिएको तलाउको बीचमा स्थापित छठी माताको मन्दिरमा पुगेर राष्ट्रपति भण्डारीले पूजाअर्चनाका साथ अर्घ्य दिएकी हुन्।
उनले कमलपोखरीमा समेत पुगेर सूर्यको आराधना गरी अर्घ्य दिएकी छन्।
छठपर्वको मुख्य दिन शनिबार साँझ अस्ताउँदो सूर्यलाई पूजाआराधना गरी अर्घ्य दिने गरिन्छ।
उक्त ठाउँमा नदीको दुवै किनारमा ६५० भन्दा बढी छठी माताको पूजाका लागि पूजाघाट निर्माण गरिएको छ। नदीका दुवै किनार बिजुली बत्तीले झकिझकाउ पारिएको छ।
कात्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको छठपर्व बिहीबारदेखि शुरु भएको हो।
‘महाभारत’मा उल्लेख भएअनुसार द्रौपदीसहित पाँच पाण्डवबाट अज्ञातवासमा रहँदा गुप्तवास सफल होस् भनी सूर्यदेवलाई आराधना गरिएको थियो।
उक्त समयमा पाण्डव विराट राजाको दरबारमा आश्रय लिएको उल्लेख छ। लोककथनबमोजिम सोही समयदेखि छठ मनाउने परम्पराको थालनी भएको हो।
सूर्य पुराणानुसार सर्वप्रथम अत्रिमुनिकी पत्नी अनुसुया छठ व्रत बसेकी थिइन्। फलस्वरूप उनले अटल सौभाग्य र पतिप्रेम प्राप्त गरिन्।
त्यही बेलादेखि ‘छठपर्व’ मनाउने परम्पराको शुरुआत भएको विश्वास गरिन्छ । छठपर्वमा व्रत बसे दुःख र दरिद्रताबाट मुक्ति पाइन्छ भन्ने जनविश्वास छ। छठी मातालाई झुप्पा–झुप्पा फल चढाउँदा सूर्य प्रशन्न भई व्रतालुका कुटुम्बसहित सबै सन्तानको भलो हुन्छ भन्ने मान्यताअनुरुप भक्तजनले सिङ्गो केराको घरी, भोगटे, बिमिरो, उखु, नरिवलजस्ता माटो माथि र माटोमुनि फल्ने मौसमअनुसारको फलफूल चढाउने गर्दछन्।
तराई–मधेशमा स्थायी घर भई काठमाडौँ उपत्यकामा विभिन्न पेशा व्यवसायमा संलग्न व्रतालु छठपर्व मनाउन र छठी माताको दर्शनका लागि ठूलो सङ्ख्यामा गुह्येश्वरी क्षेत्रमा पुगेका छन्।
राजधानीका गुह्येश्वरी, गहनापोखरी, कमलपोखरी, बाग्मती, बल्खु, नख्खु, विष्णुमतीलगायत नदी किनारमा पनि भव्यरूपमा छठपर्व मनाइँदै छ।
यसैबीच विराटनगरका मेयर भीम पराजुली सूर्यलाई अर्घ्य दिन घस्रँदै घाटसम्म पुगेका छन्। विगतमा पनि उनी घस्रँदै घाटसम्म पुगेर सूर्य र छठीमाताको पूजा अर्चना गर्ने गरेका थिए।
राजधानीका साथै तराईका विभिन्न जिल्लामा पनि अस्ताउँदो सूर्यलाई अर्घ्य दिइएको छ।
आइतबार बिहान उदाउँदो सूर्यलाई पुनः अर्घ्य दिएपछि छठ पर्वको समापन हुन्छ।
हेरौं देशका विभिन्न स्थानका दृश्यहरू। तस्बिरहरू-रासस
.jpg)
.jpg)
.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
