राजविराज– हत्या, बलात्कार, भ्रष्टाचार, कुटपिटलगायतका अपराधिक घटना छानबिन हुन थालेपछि पछिल्लो समय निर्वाचित जनप्रतिनिधि समेत पक्राउ पर्न थालेका छन्।
संघीय संसद सचिवालयमा कार्यरत कर्मचारी रोशनी शाहीमाथि यौन दुर्व्यवहार गरेको आरोपमा असोज १९ गते पक्राउ परेका प्रतिनिधि सभाका तत्कालीन सभामुख कृष्णबहादुर महरा र चुनाव बिथोल्न बनाइएको बम विस्फोटमा परेर घाइते भएकाहरुलाई जिउँदै जलाएको आरोपमा असोज २६ गते पक्राउ परेका प्रतिनिधिसभा सदस्य तथा नेपाली कांग्रेसका नेता मोहम्मद अफताब आलम यसको उदाहरण हुन्।
योसँगै जनकपुर विमानस्थलस्थित बुद्ध एयरको कार्यालयमा तोडफोड गरेको आरोपमा संघीय सांसद तथा राष्ट्रिय जनता पार्टी (राजपा)का नेता प्रमोद शाह र विकास निर्माणका काममा हेलचक्र्याँई गरेको आरोपमा पप्पु कन्स्ट्रक्सनका सञ्चालकसमेत रहेका सांसद हरिनारायण रौनियारसमेत पक्राउ परे।
यी घटनाले एकातर्फ जनप्रतिनिधिको असली अनुहार प्रस्तुत भइरहेको छ भने अर्कोतर्फ नैतिकता र आचरणविरुद्ध भएका घटनामा छानबिन र कारबाहीको प्रक्रिया सुरु हुन खोजेको अवस्थालाई देखाएको छ।
तर, जनप्रतिनिधि नै संलग्न भएका घटना यतिमा मात्रै सीमित छैनन्। प्रहरीको अनुसन्धान जिल्ला र स्थानीय तहसम्म केन्द्रित हुन सकेको छैन। दबाब र प्रभावमा परेर प्रहरीले नै त्यस्ता व्यक्तिलाई पक्राउ गर्न नसकेका उदाहरण प्रसस्त छन्।
पक्राउपुर्जी जारी भएका तर पक्राउ नपरेका सप्तरीका जनप्रतिनिधि
सप्तरीमा दुई जना जनप्रतिनिधि विरुद्ध पक्राउ पुर्जी जारी भएको छ। ज्यान मार्ने उद्योगमा तिलाठी कोईलाडी गाउँपालिका–४ की वडा सदस्य ४१ वर्षीया गीतादेवी मण्डल र वन पैदावारमा हानीनोक्सानी गरेको आरोपमा सप्तकोशी नगरपालिका–१ का वडाध्यक्ष नारायण आचार्यलाई पक्राउ गर्न पुर्जी जारी भएको छ। तर उनीहरू दुवैजना हालसम्म पक्राउ परेका छैनन्।
गीतादेवी मण्डल
सप्तरी जिल्ला अदालतले वडा सदस्य मण्डलविरुद्ध असोज ६ गते नै पक्राउ पुर्जी जारी गरेको थियो।
हिराई मण्डलको जाहेरीपछि दर्ता भएको ज्यान मार्ने उद्योगको मुद्दामा मण्डलसहित ५ जना विरुद्ध पक्राउ पुर्जी जारी भएको छ।
बाटाको म्यादबाहेक ७ दिनभित्र सम्बन्धित व्यक्तिलाई अदालतमा उपस्थित गराउन र सो अवधिमा उपस्थित गराउन नसके खोजतलास गरी जहाँ फेला परे पनि पक्राउ गरी अदालतमा दाखिल गर्न भनिएको छ। तर, एक महिना बितिसक्दा समेत प्रहरीले मण्डललाई पक्राउ गर्न नसकेको हो।
राजनीतिक दल र केही नेताको प्रभावमा परेर प्रहरीले मुद्दालाई ओझेलमा पारेको स्थानीयको आरोप छ।
यसैगरी, वन पैदावार हानी–नोक्सानी गरेको आरोपमा सप्तकोशी नगरपालिका–१ का वडाअध्यक्ष नारायण आचार्यविरुद्ध करिब १ वर्ष अघि नै डिभिजन वन कार्यालय राजविराजले पक्राउ पुर्जी जारी गरेको थियो।
राष्ट्रिय वन क्षेत्रबाट बालुवा–गिटी तस्करी गरेको अभियोगमा आचार्यसहित उनका छोरा सुशीलका नाममा गत वर्ष पुष ४ गते नै पक्राउ पुर्जी जारी भएको छ।
.jpg)
उनीहरूले सप्तकोसी-१ को अमाहा खोलाबाट गैरकानुनी रूपमा बालुवा–गिटी उत्खनन तथा ओसार–पसार गरेको वन कार्यालयको आरोप छ। गत पुस ३ गते बालुवा–गिटी तस्करीमा संलग्न आचार्यको ना ४ त १८४५ नम्बरको ट्याक्टर खोलाबाटै नियन्त्रणमा लिइएको थियो।
.jpg)
नारायण आचार्य
डिभिजन वन कार्यालय राजविराजले प्रहरीको असहयोगका कारण आचार्य बाबुछोरालाई पक्राउ गर्न नसकिएको बताउँदै आएको छ।
‘अहिलेको राजनीतिक अवस्थामा हाम्रो बलबुताले पक्राउ गर्न सकिएन,’डिभिजन वन अधिकृत सन्तोषकुमार झा भन्छन्,‘प्रहरी/प्रशासनलाई पत्र काटेर पक्राउ गरिदिन आग्रह गरेका छौं। तर, सहयोग पाइएन।’
के भन्छ प्रहरी?
जिल्ला प्रहरी कार्यालय सप्तरीले भने पक्राउ पुर्जी जारी भएका जनप्रतिनिधिको विषयमा स्पष्ट जवाफ दिन आनाकानी गरेको छ। सप्तरीका डिएसपी तथा सूचना अधिकारी तिलक भारती भन्छन्, ‘हामी त्यस विषयमा बुझ्दैछौं। के गर्ने भन्ने विषयमा निचोडमा पुगिएको छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
