रौतहट, चन्द्रपुर- धुर्मुस-सुन्तली फाउन्डेसनले रौतहटमा निर्माण गरेको एकीकृत नमुना सन्तपुर बस्तीको आज हस्तान्तरण गरिएको छ। प्रमुख अतिथि राष्ट्रपति विद्यादेवी भण्डारीले रिबन काटेर बस्तीको उद्घाटन गरिन्।
कार्यक्रममा हास्यकलाकार मदनकृष्ण श्रेष्ठ र हरिवंश आचार्य लगायत अतिथिको रुपमा आमन्त्रित थिए।
बस्ती हस्तान्तरण समारोहमा राष्ट्रपति भण्डारीले कलाकारद्वय धुर्मुस–सुन्तलीले समुदायको विकासका लागि अतुलनीय काम गरेको भन्दै प्रशंसा गरिन्। 'देशलाई समृद्ध बनाउने काम सरकारको भए पनि धुर्मुस–सुन्तलीले राज्यले गर्नुपर्ने काम गर्नुभएको छ, यो एकदमै अतुलनीय छ।'
चन्द्रपुर नगरपालिका-८ स्थित सन्तपुरमा बनेको बस्तीमा ४७ घर छन्। फाउन्डेसनको चौथो परियोजना अन्तर्गतको बस्तीमा एक सामुदायिक भवन, मन्दिर, धारा, सार्वजनिक शौचालय, आधारभूत तहको स्कुल लगायतको संरचना तयार भएको छ। यहाँ भ्यु टावरका साथै बगैंचा पनि निर्माण गरिएको छ।
यो बस्तीमा अब मुसहर, दुसाध, लोहार र हजामका परिवारले आजबाट आश्रय पाउने भएका छन्। असोज ४ गते शिलान्यास गरिएको बस्ती ५ करोड ९५ लाखको लागतमा बनेको हो।
कलाकार सीताराम कट्टेल ‘धुर्मुस’ र कुन्जना घिमिरे ‘सुन्तली’को अगुवाइमा फाउन्डेसनमार्फत सामाजिक कार्यहरु भइरहेका छन्।
केही तस्बिर राससबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
