रसुवा– रसुवाको टिमुरेमा निर्माण गरिने भनिएको सुख्खा बन्दगाहले गति लिन सकेको छैन। नेपाल सरकारले सुख्खा बन्दगाह निर्माणको डिजाइन परिवर्तन गर्न खोजेसँगै निर्माणले गति लिन नसकेको हो।
डिजाइन परिवर्तन गर्न नेपाल सरकारले प्रस्ताव गरे पनि चिनियाँ पक्षले भने अस्वीकार गरेको थियो। अन्ततः पुरानै डिजाइनमा बन्दगाह निर्माण गने दुई पक्षबीच सहमति भयो। तर, बन्दगाह निर्माण गर्न चीनबाट टोली नआउँदा निर्माणमा ढिलाइ भएको रसुवाका प्रमुख जिल्ला अधिकारी चोमेन्द्र न्यौपानेले बताए।
जिल्लाको गोसाइँकुण्ड गाउँपालिका २ मा सुख्खा बन्दगाह निर्माणका लागि २०६९ सालदेखि चर्चा गरिएको थियो। बन्दगाह बनाउन नेपाल सरकारले चिनियाँ पक्षसँग २०७२ मंसिरमा हस्ताक्षर गदै २०७३ बैशाख ३१ मा मुआब्जा वितरण प्रक्रिया सुरु गर्यो।
बन्दरगाह निर्माणका लागि आवश्यक ८ हेक्टर जमिनमध्ये स्थानीयको ५८ रोपनी ७ आना जग्गा अधिग्रहण गर्नुपर्ने हुन्छ। मुआब्जाका लागि ४८ करोड ४९ लाख चार हजार दुई सय ७० रुपैया रकम आएकोमा ४८ करोड ४८ लाख ३६ हजार ८ सय ७८ रुपैयाँ वितरण भइसकेको जिल्ला प्रशासन कार्यालय रसुवाले जनाएको छ।
५ जना घरधनी र तीन जना जग्गाधनीलाई रकम अभावका कारण मुआब्जा वितरण गर्न बाँकी रहेको प्रमुख जिल्ला अधिकारी न्यौपानेले बताए। मुआब्जा पाउनेमा समावेश भएका ८ जनाको चार आना एक पैसा जग्गाका लागि ३० लाख ९२ हजार तीन सय ९२ रुपैयाँ अभाव भएको उनले जानकारी दिए। स्थानीय प्रशासनले रकमको माग गर्दै तीन महिनाअघि वाणिज्य मन्त्रालयमा पत्राचार गरे पनि हालसम्म पनि रकम आइपुगेको छैन।
त्यस्तै, मुआब्जा पाउनेमा समाबेश नभएका अन्य १० जना घरधनीले २२ वटा घरटहरा छुटेको भन्दै मुआब्जा पाउन जिल्ला प्रशासन कार्यालय रसुवामा निवेदन दिएका छन्।
यसैबीच, सुख्खा बन्दरगाह निर्माणको लागि प्रारम्भिक डिजाइन भइसक्दा समेत मुआब्जा नपाएको भन्दै स्थानीयहरुले वाणिज्यमन्त्री मीन विश्वकर्मालाई ज्ञापनपत्र बुझाएका छन्। बन्दरगाह निर्माणस्थलको अवलोकनका लागि रसुवा आएका मन्त्री विश्वकर्मालाई टिमुरेमा आयोजित एक कार्यक्रममा स्थानीयले ज्ञापनपत्र बुझाएका हुन्।
सुख्खा बन्दरगाह निर्माण प्रयोजनका लागि टिमुरेस्थित सडकमुनिको जग्गामा बनेका घरटहराको अधिग्रहण गरिए पनि मुआब्जा पाउन नसकेको स्थानीय फुर्पुदोर्जे घलेले बताए। उनले भने, ‘केहीले मुआब्जा पाए पनि कतिपयले पाउन सकेका छैनन्। नपाएकाहरुलाई तत्काल मुआब्जा बाँड्न माग गर्छौं।’,
बन्दरगाह निर्माण चार महिनाभित्रमा सुरु : वाणिज्यमन्त्री
टिमुरेमा अबको चार महिनाभित्रमा सुख्खा बन्दरगाह निर्माण सुरु हुने वाणिज्यमन्त्री विश्वकर्माले बताएका छन्।
शुक्रबार बन्दगाह निर्माण स्थलको अवलोकन गर्दै विश्वकर्माले पहिले सम्झौता भएको भन्दा बढी पूर्वाधार निर्माण गर्नुपर्ने देखिएको र चिनियाँ पक्षसँग छलफलको क्रम लम्बिएपछि निर्माणमा केही ढिलाइ भएको बताए।
बन्दरगाह निर्माणका लागि प्रारम्भिक डिजाइन स्वीकृत भइसकेको र विस्तृत डिजाइन कार्य अबको ३ महिनाभित्र सक्ने नेपाल इन्टरमोडल यातायात विकास समितिका कार्यकारी निर्देशक लक्ष्मणबहादुर बस्नेतले बताए।
‘डिटेल डिजाइन सकेको एक महिनाभित्र निर्माण कम्पनीको छनोट गरी काम सुरु गर्नेछौं’, उनले भने।
चिनियाँ पक्षले सुख्खा बन्दरगाह निर्माण सम्पन्न गरेपछि बन्दरगाह नेपाल सरकारलाई भाडामा दिने भएको छ।
बन्दरगाहको एउटा मुख्य भवनमा प्रशासनिक कार्यका लागि भन्सार, क्वारेनटाइन, बैंक, ल्याब, सुरक्षा लगायत कार्यालयहरू रहने रसुवागढी भन्सार कार्यालय टिमुरेले बताएको छ।
यस्तै, तीन सय १५ भन्दा बढी ट्रक तथा कन्टेनरहरू राख्न सकिने गरी पार्किङस्थल निर्माण हुनेछ। भन्सार कार्यालयका अनुसार, ७ सय ५० वर्गमिटरको क्षेत्रफलमा गोदामघर निर्माण हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107799.jpeg)
-1786602170.png)
