काठमाडौं- चालु आर्थिक वर्षको पहिलो महिना साउनमा लक्ष्यअनुसार राजस्व संकलन गर्न सरकार असफल भएको छ। साउनभर ८५ अर्ब ८ करोड रुपैयाँ राजस्व संकलनको लक्ष्य राखिएकोमा ७२ अर्ब ६० करोड रुपैयाँ मात्रै संकलन भएको छ।
अर्थ मन्त्रालयका अनुसार साउनमा भन्सार राजस्व ११ अर्ब २४ करोड रुपैयाँ संकलन भएको छ। यो शीर्षकमा १६ अर्ब ५० करोड रुपैयाँ लक्ष्य तोकिएको थियो। यसैगरी आर्थिक वर्षको पहिलो महिनामा २५ अर्ब ३० करोड रुपैयाँ मूल्य अभिवृद्धि कर संकलन भएको छ। साउनमा २९ अर्ब ७७ करोड रुपैयाँ मूल्य अभिवृद्धि कर संकलनको लक्ष्य राखिएको थियो।
यसैगरी, यो महिनामा ९ अर्ब १९ करोड रुपैयाँ अन्तशुल्क संकलन भएको छ। साउनमा ११ अर्ब ५८ करोड रुपैयाँ अन्तशुल्क संकलनको लक्ष्य राखिएको थियो। सरकारले आयकर पनि लक्ष्यअनुसार संकलन गर्न सकेको छैन।
साउनमा १५ अर्ब ८० करोड रुपैयाँ आयकर संकलन भएको छ। यो महिना १८ अर्ब २१ करोड रुपैयाँ आयकर संकलनको लक्ष्य राखिएको थियो।
एक महिनाको अवधिमा गैरकर मात्रै लक्ष्यअनुसार संकलन भएको छ। साउनमा ६ अर्ब १७ अर्ब रुपैयाँ गैरकर संकलनको लक्ष्य राखिएकोमा ९ अर्ब २० करोड रुपैयाँ संकलन भएको अर्थमन्त्रालयले जनाएको छ। साउनमा संकलित राजस्व गत आर्थिक वर्षको यही अवधिको तुलनामा १८.७४ प्रतिशतले धेरै हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
