काठमाडौं- प्रधानमन्त्री तथा मन्त्रिपरिषद् कार्यालय र अन्य दुई प्रदेशमा कार्यरत सहसचिवहरुको अर्थ मन्त्रालयमा सरुवा भएको छ। प्रधानमन्त्री कार्यालयका प्रवक्तासमेत रहेका सहसचिव विनोदबहादुर कुँवर तथा प्रदेशमा रहेका सहसचिवहरू मुक्तिप्रसाद पाण्डे र ढुण्डिप्रसाद निरौलाको अर्थ मन्त्रालयमा सरुवा भएको छ।
सरकारले वरिष्ठ सहसचिवहरूलाई प्रदेशमा सरुवा गरेपछि रिक्त रहेका स्थानमा उनीहरूलाई ल्याइएको छ। अर्थ मन्त्रालय आएकामध्ये सहसचिव कुँवरलाई आन्तरिक राजस्व विभागको महानिर्देशक बनाउने संभावना छ। आन्तरिक राजस्व विभागका महानिर्देशक विष्णुप्रसाद नेपालको कर्णाली प्रदेशमा सरुवा भएपछि रिक्त रहेको स्थानमा कुँवरलाई ल्याइएको हो।
पाण्डे र निरौलाको भने पदस्थानको टुंगो भई नसकेको अर्थ मन्त्रालय सम्बद्ध स्रोतले जानकारी दिएको छ। पाण्डे अहिले गण्डकी प्रदेशको आर्थिक मामिला तथा योजना मन्त्रालयमा कार्यरत छन्। उनको ठाउँमा भन्सार विभागका महानिर्देशक रामेश्वर दंगाल जानेछन्। निरौला अहिले मुख्यमन्त्रीको कार्यालय प्रदेश नं ३ हेटौंडामा कार्यरत छन्। उनको ठाउँमा मधुसूदन बुर्लाकोटीलाई पठाइएको छ।
बजेटमा रामशरण, वित्तीयमा हरिशरण
अर्थ मन्त्रालयले दुई सहसचिवको जिम्मेवारी हेरफेर गरेको छ। सहसचिव रामशरण पुडासैनीलाई बजेट तथा कार्यक्रम महाशाखा प्रमुखको जिम्मेवारी दिइएको छ। एसियाली विकास बैंकको वैकल्पिक निर्देशकको कार्यकाल पूरा गरी फर्किएका उनले केही समय महाशाखाको जिम्मेवारी पाएका थिएनन्।
यसैगरी चीनको ग्वाङ्झाउका लागि महावाणिज्यदूतमा सिफारिस भएका हरिशरण पुडासैनीलाई वित्तीय क्षेत्र व्यवस्थापन तथा संस्थान समन्वय महाशाखा प्रमुखको जिम्मेवारी दिइएको छ। यो महाशाखाका प्रमुख तोयम रायाको बढुवा भएपछि रिक्त स्थानमा तत्कालका लागि हरिशरण पुडासैनीलाई जिम्मेवारी दिइएको हो।
हरिशरणलाई बजेटबाट वित्तीयमा पठाएर रामशरणलाई बजेटको जिम्मा दिइएको छ। रामशरण र हरिशरण सहोदर दाजुभाइ हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
