काठमाडौं- सरकारले आयातितभन्दा नेपालमै एसेम्बल हुने सवारीलाई प्राथमिकता दिने भएको छ। नाडा अटो शो २०१९ को उद्घाटन गर्दै अर्थमन्त्री डा युवराज खतिवडाले विद्युतीय सवारीको एसेम्बललाई प्राथमिकता दिने नीति सरकारले लिएको बताए।
संसारभर उद्योगको विकास एसेम्बलबाटै हुने भन्दै अर्थमन्त्री खतिवडाले सिकेडी (कम्प्लिट नक डाउन) युनिट ल्याएर एसेम्बल थाल्न सवारी व्यवसायीलाई आग्रह गरे। सवारी एसेम्बलमा पनि विद्युतीय सवारीलाई प्राथमिकता दिन उनले जोड दिए।
‘व्यवसायीहरुले सुरुमा विद्युतीय अटो रिक्सा, मोटरसाइकल हुँदै कार एसेम्बल थाल्नु राम्रो हुन्छ,’ खतिवडाले भने, ‘यसरी एसेम्बल गर्दा २० प्रतिशतभन्दा बढी मूल्य अभिवृद्धि गर्ने कम्पनीलाई अनुपात हेरेर छुट/सहुलियत दिन सकिन्छ।’
व्यवसायीले मात्र नभई राज्यले समेत घाटाको व्यापार नगर्ने भन्दै खतिवडाले १० प्रतिशत पनि मूल्य अभिवृद्धि नगर्नेलाई सरकारले सहुलियत दिन नसक्ने बताए। ‘२० प्रतिशतभन्दा कम मूल्य अभिवृद्धि हुने कुरामा छलफल नै नगर्दा राम्रो हुन्छ,’ उनले भने।
त्यस्तै ब्याट्रीबाट स्टार्ट मात्र हुने र पेट्रोलबाट चल्ने सावरीलाई हाइब्रिड मानेर छुट दिन नसकिने खतिवडाको तर्क छ। ‘हामीले पेट्रोलियम पदार्थ खपत कम गर्ने र वातावरण प्रदुषण कम गर्ने हाइब्रिड सवारीलाई छुट दिन खोजिएको हो। न कि स्टार्टमात्र हुने हाइब्रिडलाई,’ उनले भने, 'पेट्रोलबाटै चल्नेलाई छुट दिन खोजिएको होइन। त्यसका लागि हामी कानुन संशोधन गर्ने तयार छौं।’
अहिले सवारीमा लाग्ने राजश्व बढी नै भएको र आगामी दिनमा सरकारको राजश्वको स्रोत विस्तार भएपछि सवारीमा लाग्ने राजश्व घट्ने उनको भनाइ छ।
सवारी सुरक्षा तथा सडक पूर्वाधारको विकासमा सरकार केन्द्रित रहेको अर्थमन्त्रीले बताए। सरकारको मर्म र भावनाअनुसार काम गर्न उनले व्यवसायीलाई आग्रह गरे। पूर्वाधार निर्माणका लागि इतिहासमै सबैभन्दा बढी बजेट छुट्टाएको भन्दै उनले सडक सुरक्षाबापत उठेको कर त्यही क्षेत्रमा खर्च गर्न सरकार लागी परेको बताए।
अटो शोको उद्घाटनका क्रममा नाडाका अध्यक्ष शम्भुप्रसाद दाहालले सवारीसाधन १० प्रतिशत डाउन पेमेन्ट र ९० प्रतिशत फाइनान्समा पाइने व्यवस्था मिलाउन माग गरे। त्यस्तै उनले भन्सार मूल्यांकन उचित नभएको भन्दै सन्दर्भ मूल्यसूची खारेज गर्नुपर्ने समेत बताए।
सरकारले प्रदुषण मापदण्ड लागू गर्न लागेको भन्दै उनले भने, ‘नयाँ मापदण्ड लागू गर्दा करिब १ वर्षको समय आवश्यक पर्छ,’ उनले भने, ‘व्यवसायीले अडर गरेको सवारी ल्याउन पाउने गरी नयाँ मापदण्ड लागू हुनुपर्छ।’सरकारले सवारीसाधनलाई आवश्यकताका वस्तुका रुपमा व्याख्या पर्नुपर्नेमा उनले जोड दिए।
त्यस्तै नेपाल उद्योग वाणिज्य महासंघका वरिष्ठ उपाध्यक्ष तथा नाडाका पूर्वअध्यक्ष शेखर गोल्छाले सवारीलाई मोबिलिटी बढाउने साधनका रुपमा लिन नसके विकास पनि हुन नसक्ने बताए।
मंगलबारबाट सुरु भएको नाडा अटो शो ६ दिनसम्म चल्ने छ। मेलामा विभिन्न कम्पनीले नयाँ-नयाँ उत्पादन सार्वजनिक गरेका छन्। यो वर्षको अटो शोमा हाइब्रिड कार तथा इलेक्ट्रिक कार मुख्य प्राथमिकतामा परेको देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
