काठमाडौं - बुटवल पावर कम्पनी (बीपीसी)ले सोमबारदेखि फर्दर पब्लिक अफरिङ(एफपिओ) बिक्री शुरू गरेको छ। सरकारकोसमेत सेयर स्वामित्व भएको बीपीसीको एफपिओमा लगानीकर्ताको भने चौतर्फी विरोध आएको छ।
यसैक्रममा सेयर लगानीकर्ताहरुको संगठन नेपाल इन्भेष्टर फोरमले विज्ञप्ती जारी गर्दै नेपाल धितोपत्र बोर्डले नियम विपरित एफपिओ निष्कासन अनुमति दिएकोमा आपत्ति जनाएको छ। विज्ञप्तीमा कम्पनीले साधारण सेयर(आइपिओ) नै जारी नगरी उच्च मूल्यमा एफपिओ जारी गर्न लागेको प्रति फोरमको गम्भिर ध्यानाकषर्ण भएको जनाएको छ। उक्त स्विकृति परिमार्जन नगरीए बोर्डविरूद्ध संघष गर्ने फोरमले चेतावनी दिएको छ।
नियमक निकाय धितोपत्र बोर्डले भने धितोपत्र ऐनअनुसार नै कम्पनीको एफपिओ निष्कासन भएकाले विरोध गर्न आवश्यक नरहेको बताएको छ। ‘हामीले नियमअनुसार नै बुटवल पावरलाई एफपिओ निष्कासन अनुमति दिएका छौं।’, बोर्डका प्रवक्ता निरज गिरीले भने,‘विरोध गर्न पाउने सबैको आफ्नो अधिकार हो। तर नियमअनुसारकै काम गरिएकोले यसमा विरोध गर्नुको कुन अर्थ छैन।’
बुटवल पावरले माघ १५ गतेदेखि २ अर्ब ४ करोड ४५ लाख रुपैयाँ बराबरको एफपिओ जारी गरेको छ। कम्पनीले १ सय रुपैयाँ फेस भ्यालुमा ४ सय १ रुपैयाँ प्रिमियम जोडेर प्रति कित्ता ५ सय १ रुपैयाँमा एफपिओ बिक्री गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
