नेपालगन्ज- नेपालगन्जकी गण्डकी घर्तीको मोबाइलमा मेसेज आयो– तपाईंले २५ लाख रुपैयाँ जित्नुभएको छ नेपाल सरकारको तर्फबाट। तपाईं र तपाईंको परिवारलाई नयाँ वर्षको पनि शुभकामना। के तपाईं त्यो रकम लिन चाहनुहुन्छ?
अचानक नयाँ नम्बरबाट २५ लाख पुरस्कार पाएको सन्देश आएपछि घर्ती आश्चर्यमा परिन्। त्यसको केही दिनमै उनलाई फोनसमेत आउन थाल्यो।
हिन्दी भाषामा एक पुरुषले फोनमा भने, 'त्यो पुरस्कारको पैसा पठाइदिनका लागि तपाईंको बैंकमा एकाउन्ट छ?'
घर्तीले बैंकमा खाता थिएन। उनले साथीको खाता नम्बर टिपाइन्। जुन थियो नेपाल इनभेस्टमेन्ट बैंकको।
एकैपटक लाखौं रकम पाइने भएपछि घर्ती मक्ख परेकी थिइन्। फोन गर्ने पुरुषले फेरि भने, 'तर तपाईंले पाउने रकमको करबापत केही पैसा दिनुपर्छ।'
'मैले पाउने पैसाबाटै कर काटेर बाँकी मलाई पठाइदिनुस् न,' घर्तीले भनिन्। तर उनले मानेनन्। भने, 'पैसा लिने भए अहिलेलाई २५ हजार जम्मा गरिदिनु। त्यसपछि तपाईंको प्रक्रिया सुरु हुन्छ।'
घर्तीलो यो कुरा साथीहरुसँग राखिन्। साथीहरुले सचेत गराए, 'त्यसरी नचिनेको नम्बरबाट फोन गर्ने त ठग पनि हुन सक्छन् है।'
नभन्दै घर्ती साथीसहित बैंक पुगिन् र खाता चेक गरिन्। धन्न, पैसा निकालिएको रहेनछ। उनीहरु ढुक्क भए।
बैंकका कर्मचारीसँग सल्लाह गरेर केही समयका लागि खाताबाट हुने कारोबार नै बन्द गरेर उनीहरु फर्किए।
यो त भयो मोबाइल सन्देशमार्फत ठगी गर्ने शैलीको उदाहरण। यस्तै रिचार्ज कार्डको सहारा लिई सर्वसाधारणलाई झुक्कएर ठग्ने गरेको पनि पाइएको छ। फोन रिचार्ज गर्दा लक्की नम्बर पर्यो भन्दै २५ लाख रुपैयाँ पुरस्कार बापत जितेको भ्रम फैलाएर ठगी गर्नेहरुको बिगबिगी नेपालगन्जमा बढेको छ।
बाँके प्रहरीले चिठ्ठामा नगद २५ लाख र कार परेको प्रलोभन देखाएर विभिन्न व्यक्तिलाई ठगी गर्ने ७ जनालाई पक्राउ गरी ठगी मुद्दा चलाइसकेको छ। जिल्ला प्रहरी कार्यालयका प्रहरी निरीक्षक रणबहादुर बिष्टले बताए।
अपरिचित व्यक्तिले विभिन्न प्रलोभन देखाएर ठगी गर्न सक्ने भएकाले आफ्नो बैंक एकाउन्ट तथा नगद अपरिचित व्यक्ति वा उसले भनेको च्यानलमार्फत नदिन प्रहरीले आग्रह गरेको छ।
प्रहरीको प्रारम्भिक अनुसन्धानमा ठगी गिरोहका मुख्य मानिस पाकिस्तानमा रहेको र उसले भारतीय र नेपाली सहितको नेटवर्क बनाएर ठगी गर्दै आएको देखिएको छ।
सम्बन्धित समाचार- चिठ्ठाका नाममा ठग्ने युवक मनिट्रान्सफरमै समातिए
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
