जनकपुर- प्रदेश सरकारको समन्वयमा अगामी तीन वर्षभित्र प्रदेश २ का ४२ हजार युवाले रोजगारी पाउने सुनिश्चित भएको छ।
प्रदेश सरकार, डिफिड र सेवा प्रदायक ६ वटा संस्थाले आज एक कार्यक्रमबीच रोजगारीको अवसर सिर्जना गर्नेगरी सम्झौता गरेका हुन्।
प्रदेशमा रहेको बेरोजगारीको समस्यालाई क्रमशः समाधान गर्दै लैजाने प्रदेश सरकारको योजनाअनुरुप पहिलो चरणमा विभिन्न ६ वटा संस्थाले बेरोजगार युवाहरुलाई सिप प्रदान गर्दै रोजगारी उपलब्ध गराउने अथवा स्वरोजगार बनाउने सम्झौता गरेका हुन्।
प्रदेश सरकारको तर्फबाट मुख्यमन्त्री लालबाबु राउत, सिप कार्यक्रमका टिम लिडर बलजित बोहरा र सेवा प्रदायक संस्थाका प्रतिनिधिहरुले छुट्टाछुट्टै सम्झौता पत्रमा हस्ताक्षर गरेका छन्।
यो कार्यक्रम वैदेशिक रोजगारीमा जाने युवा तथा गरिब, दलित, महिलालाई लक्षित गरि सञ्चालन गरिने मुख्यमन्त्री लालबाबु राउतले बताए।
उनले एक वर्षको प्रयासपछि रोजगारी सिर्जनाको क्षेत्रमा प्रदेश सरकार एक कदम अगाडि बढेको उल्लेख गर्दै यस कार्यमा सघाउने डिफिडलगायत साझेदार संस्थाहरुलाई धन्यवादसमेत दिए।
सम्झौताअनुसार प्रभु बैंकले अगामी तीन वर्षभित्र वैदेशिक रोजगारीमा जाने ७ हजार ५ सय युवालाई बिना धितो सहुलियत ऋण उपलब्ध गराउने, वैदेशिक रोजगारीमा गएकामध्ये ३ हजार ५ सय परिवारका महिलालाई स्वरोजगार बन्न १० लाख बिना धितो सहुलियत ऋण उपलब्ध गराउने र वैदेशिक रोजगारीबाट फर्केका युवामध्ये ४ हजारलाई सिप अनुसारको स्वरोजगार बन्न १५ लाखसम्म बिना धितो सहुलियत ऋण उपलब्ध गराउने भएको छ।
त्यसैगरी नेपाल एसबिआई बैंकले अगामी तीन वर्षभित्र वैदेशिक रोजगारीमा जाने ७ हजार ७ सय ५० युवालाई बिना धितो सहुलियत ऋण उपलब्ध गराउने, वैदेशिक रोजगारीमा गएकामध्ये ३ हजार ५ सय परिवारका महिलालाई स्वरोजगार बन्न १० लाख बिना धितो सहुलियत ऋण उपलब्ध गराउने र वैदेशिक रोजगारीबाट फर्केका युवामध्ये ४ हजारलाई सिप अनुसारको स्वरोजगार बन्न १५ लाखसम्म बिना धितो सहुलियत ऋण उपलब्ध गराउने भएको छ। वैदेशिक रोजगारीमा जान चाहने तथा स्वरोजगार बन्न चाहने युवाहरुलाई सिप कार्यक्रमअन्तर्गत तालिम दिइनेछ।
यता 'मेरो जब्स'ले रोजगारी कार्यक्रमअन्तर्गत रोजगार पसलमार्फत अगामी ३ वर्षमा ७ हजार युवाहरुलाई रोजगारी उपलब्ध गराउने सम्झौता गरेको छ।
त्यसैगरी, 'एमाजोन'को सहकार्यमा 'जेनिस'ले ४ हजार युवालाई सिपसहित रोजगारी दिने तथा फ्युज मेसिनले आइसिटी क्षेत्रमा ४ हजार युवालाई रोजगार उपलब्ध गराउने सम्झौता गरेका हुन्।
प्रदेश सरकारले मोरङ अटो वर्क्ससँग पनि सम्झौता गरेको छ। जसअनुसार वर्क्सले जनकपुरमा हेभी गाडीको ड्राइभिङ तथा मेकानिकल ट्रेनिङ सेन्टरको स्थापना गर्ने र ३ वर्षभित्र ४ हजार युवाहरुलाई रोजगारी दिनेछ।
रोजगारदाता संस्थाहरुलाई प्रदेश सरकारले आवश्यक सुविधा उपलब्ध गराउने प्रतिबद्धता जनाएको छ। कार्यक्रममा मुख्यमन्त्री राउतले रोजगारदाताहरुलाई आवश्यक ऐनकानुन लगायतका अन्य सुविधा उपलब्ध गराउन प्रदेश सरकार सदैव तत्पर रहने प्रतिबद्धता जनाए।
प्रदेश नीति आयोगका उपाध्यक्ष डा हरिवंश झाको अध्यक्षतामा भएको उक्त कार्यक्रममा उद्योग, वन तथा पर्यटनमन्त्री रामनरेश राय, आर्थिक मामिला तथा योजना राज्यमन्त्री उषा यादव, भौतिक पूर्वाधार विकास राज्यमन्त्री डा डिम्पल झा, नेकपा संसदीय दलका नेता सत्यनारायण मण्डल, मुख्यन्यायधिवक्ता दिपेन्द्र झा, जनकपुरधाम उपमहानगर प्रमुख लालकिशोर साह, डिफिडका नेपाल प्रमुख लिसा हेनानसहितका वक्ताहरुले सम्बोधन गरेका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।