काठमाडौं- अर्थ मन्त्रालयका दुई सहसचिवको सरुवा भएको छ।
सहसचिवहरु मुकुन्द पौड्याल र हरिशरण पुडासैनीको केही दिनअघि बसेको मन्त्रिपरिषद् बैठकले सरुवा गरेको हो।
अर्थ मन्त्रालय बजेट तथा कार्यक्रम महाशाखा प्रमुख पुडासैनीलाई परराष्ट्र मन्त्रालयमा सरुवा गरिएको छ। परराष्ट्रले उनलाई चीनको गवाङ्झाउमा महावाणिज्यदूत नियुक्त गर्ने तयारी गरेको छ। भारतको नयाँदिल्लीमा रहेको नेपाली दूतावासमा इकोनोमिक मिनिस्टरको दाबी गरिरहेका पुडासैनीलाई महावाणिज्यदूत बनाउने तयारी सरकारको छ।
नयाँदिल्लीमा भने परराष्ट्रकी सहसचिव नीता पोखरेल अर्याललाई पठाउने तयारी गरिएको छ। चीनबाट एग्रिमो प्राप्त भएपछि पुडासैनी त्यसतर्फ जानेछन्।
यसैगरी पौड्याललाई प्रदेश नं ३ को आर्थिक मामिला तथा योजना मन्त्रालय पठाइएको छ। अर्थ मन्त्रालयको आर्थिक नीति विश्लेषण महाशाखा प्रमुख रहेका पौड्याललाई हेटौंडा पठाइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।