काठमाडौं– वैदेशिक रोजगारलाई सुरक्षित, व्यवस्थित र पारदर्शी बनाउने उद्देश्यले सञ्चालित डिजिटल प्लेटफर्म माइग्रेन्ट रिक्रुटमेन्ट एड्भाइजर (एमआरए) ले अब वेबसाइटबाटै म्यानपावर कम्पनीहरुको स्तर निर्धारण गर्न सकिने व्यवस्था गरेको छ।
वैदेशिक रोजगारीमा पुगिसकेका र जाने प्रक्रिया पूरा गरिसकेका कामदारहरुले आफूले सेवा लिएको म्यानपावर कम्पनीप्रति दिने प्रतिक्रियाका आधारमा म्यानपावर कम्पनीको स्तर निर्धारण गर्न सकिने व्यवस्था गरिएको हो।
एमआरए परियोजनाका नेपाल संयोजक सुनिल न्यौपानेले एमआरएको डिजिटल प्लेटफर्ममाले वैदेशिक रोजगारीलाई थप व्यवस्थित बनाउन मद्दत पुग्ने बताएका छन्। एमआरए अन्तर्गत सन् २०१६ देखि www.recruitmentadvisor.org वेबसाइट सञ्चालनमा छ। विभिन्न भाषामा रहेको यो वेबसाइटमा नेपाली पेजका लागि भने www.recruitmentadvisor.org/ne रहेको छ।
यो वेबसाइट नेपाल ट्रेड युनियन महासंघ (जिफन्ट), अन्तर्राष्ट्रिय ट्रेड युनियन महासंघ (आइटियुसी) तथा अन्तर्राष्ट्रिय श्रम संगठन (आइएलओ) को साझेदारीमा सञ्चालन गरिएको हो।
‘यस वेबसाइटमा वैदेशिक रोजगारीमा गएका वा जाने प्रक्रिया पूरा गरिका श्रमिकले म्यानपावरले दिएको सेवाका आधारमा म्यानपावरको मूल्यांकन गर्न सक्ने व्यवस्था छ,’ काठमाडौंमा आयोजित एक कार्यक्रममा संयोजक सुनिल न्यौपानेले भने ‘श्रमिकहरुको मूल्यांकनकै आधारमा म्यानपावर कम्पनीहरुको स्तर निर्धारण गरिन्छ।’
कार्यक्रममा बोल्दै संयुक्त ट्रेड युनियन समन्वय केन्द्र (जेटिइसिसी) का अध्यक्ष तथा जिफन्ट अध्यक्ष विनोद श्रेष्ठले वैदेशिक रोजगारीमा जाने योजना बनाइरहेकाहरु तथा वैदेशिक रोजगारको क्रममा रहेकाहरुलाई मद्दत गर्ने उद्देश्यले रिक्रुटमेन्ट एड्भाइजर मार्फत काम गरिएको बताए।
अध्यक्ष श्रेष्ठले वैदेशिक रोजगार नेपालका लागि दीर्घकालीन नभई अल्पकालीन रोजगारीको मात्र भएको भन्दै यसलाई सुरक्षित, व्यवस्थित र मर्यादित बनाउन ट्रेड युनियनहरु, सरकार तथा गैरसरकारी संघसंस्था बीचमा मजबुत सहकार्यको खाँचो औंल्याए।
कार्यक्रममा सुरक्षित आप्रवासनका लागि राष्ट्रिय सञ्जाल (एनएनएसएम) का अध्यक्ष कुलप्रसाद कार्कीले वैदेशिक रोजगारलाई मर्यादित र उपलब्धिमूलक बनाउन एकीकृत ढंगमा काम गर्नुपर्ने बताए।
सरकार, ट्रेड युनियनहरु, गैरसरकारी संस्थाहरु, रोजगारदाताहरु मिलेर नै ग्लोबल कम्प्याक्ट फर माइग्रेसन (जिसिएम) को लक्ष्य हासिल गर्न सकिने उनको भनाइ छ।
जिफन्टका महासचिव जनक चौधरीले वैदेशिक रोजगारलाई सुरक्षित बनाउन तथा श्रमिकका लागि उपलब्धिमूलक बनाउन महासंघले झन्डै तीन दशकदेखि काम गरिरहेको बताए। उनले यस क्षेत्रमा क्रियाशील सबैको सहकार्यमा श्रमिकको जीवनलाई उन्नत बनाउन र रोजगारीलाई मर्यादित बनाउन सकिने धारणा राखे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।