काठमाडौं- कुनै समय १ हजार ८ सय ८० को अंकसम्म पुगेको नेपालको पुँजीबजार पछिल्ला वर्षहरुमा १ हजार २ देखि १ हजार ४ अंकको हाराहारीमा रुमलिरहेको छ।
तीनवटै तहमा निर्वाचन भएर नयाँ सरकार गठन हुनु अगाडि मुलुकको राजनीतिक अस्थिरतालाई पुँजी बजारको अस्थिरताको कारणसँग पनि दाँजेर हेरिन्थ्यो। तर, निर्वाचनपछि दुई तिहाइको सरकार गठन भई मुलुक एक किसिमले राजनीतिक स्थिरताको बाटोतर्फ लाग्दा पनि पुँजीबजारमा उल्लेख्य सुधार भएको भने देखिँदैन।
पुँजीबजारमा आर्थिक वर्ष २०७४/०७५ र २०७५/०७६ को तुलनात्मक विश्षेण गर्दा अघिल्लो आर्थिक वर्षभन्दा गत आर्थिक वर्षमा कारोबार घटेको देखिन्छ। तर, नेप्से पुँजीकरण र इन्डेक्स भने बढेको छ।
आर्थिक वर्ष २०७४/०७५ मा १ सय २१ दशमलब २९ अर्बको कारोबार भएकोमा गत आर्थिक वर्ष २०७५/०७६ मा १ सय १० दशमलब २६ अर्बको कारोबार भएको छ। गत आर्थिक वर्षमा भएको कारोबार अघिल्लो आर्थिक वर्षको तुलनामा ९ दशमलब २७ प्रतिशतले कम हो।
नेप्से परिसूचक अघिल्लो आर्थिक वर्षमा औसतमा १ हजार २ सय १२ दशलमब ३६ अंकमा रहेको थियो भने गत आर्थिक वर्षमा १ हजार २ सय ५९ दशमलब २ अंक कायम भएको थियो।
नेपाल स्टक एक्सचेन्ज (नेप्से)का अनुसार गत आर्थिक वर्ष २०७५/०७६ मा २ सय ४६ दिन कारोबार भएको देखिन्छ भने औसत दैनिक कारोबार ४४ करोड ७४ लाख रुपैयाँ बराबर भएको छ। अघिल्लो आर्थिक वर्षमा औसत दैनिक कारोबार ५२ करोड रुपैयाँ बराबर थियो।
कारोबार घटे पनि बजार पुँजीकरण भने बढेको छ। २०७४/७५ मा १४ अर्ब ३५ अर्ब रुपैयाँ बराबरको सेयर पुँजीकरण भएकोमा गत आर्थिक वर्षमा १५ खर्ब ६७ अर्ब पुगेको छ। यो अघिल्लो आर्थिक वर्षको तुलनामा ९ दशमलब २२ प्रतिशतले बढी हो।
बजारमा सूचीकरण भएका कम्पनीहरुको संख्या अघिल्लो आर्थिक वर्षमा १ सय ९६ रहेकोमा गत असार मसान्तसम्ममा २ सय १५ वटा पुगेको छ। गत आर्थिक वर्षमा सूचीकरण भएका धेरैजसो कम्पनीहरु जलविद्युत कम्पनी र लघुवित्त संस्था रहेका छन् भने एउटा उत्पादनमुलक कम्पनी सूचीकृत भएको देखिन्छ।
अघिल्लो आर्थिक वर्षको तुलनामा गत आर्थिक वर्षमा पुँजीबजारको प्राथमिक बजारमा केही संरचनागत सुधार भएको धितोपत्र बोर्डका अध्यक्ष डा रेवत बहादुर कार्की बताउँछन्।
धितोपत्र बजार भनेको सेयर बजारमात्र नभई ऋणपत्र बजार पनि हो। अघिल्ला आर्थिक वर्षहरुको तुलनामा गत आर्थिक वर्षमा बैंक तथा वित्तीय संस्थाले तुलनात्मक रुपमा बढी ऋणपत्र जारी भएका कारण पनि धितोपत्र बजारमा सकारात्मक सुधार देखिएको कार्कीको बुझाई छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।