काठमाडौं- संस्कृति, पर्यटन तथा नागरिक उड्डयन मन्त्री योगेश भट्टराईले युरोपेली युनियनको आकाशमा छिट्टै नेपाली विमानले उडान भर्ने विश्वास व्यक्त गरेका छन्।
नेपाल चेम्बर अफ कमर्शले बुधबार राजधानीमा गरेको कार्यक्रममा बोल्दै मत्री भट्टराईले अन्तराष्ट्रिय उड्डयन सुरक्षा मापदण्ड पालना गर्नुको साथै उड्डयन अडिटमा नेपालको अवस्था निकै राम्रो रहेकाले अब उडानमा रोक लगाइरहनुपर्ने आवश्यकता नरहेको बताएका हुन्।
उडानमा लगाइएको रोक फुकुवा गराउने सम्बन्धमा आफूले छलफल र वार्ता गरिरहेको भन्दै उनले छिट्टै युरोपेली मुलुकको आकाशमा नेपाली विमानले उडान भर्ने विश्वास व्यक्त गरे। उनले अन्तर्राष्ट्रिय नागरिक उड्डयन संगठनको उडान सुरक्षा मापदण्ड विश्वमा सरदर ६० प्रतिशत रहेकोमा नेपालको ६६ दशमलब ५ प्रतिशत रहेकाले अब उडानमा रोक लगाउनुपर्ने कुनै औचित्य नरहेको उनको तर्क छ।
इयूले सन् २०१३ देखि नेपाली वायु सेवा कम्पनीलाई युरोप उडानमा रोक लगाउँदै आएको छ। मन्त्री भट्टराईले हालैमात्र हिमालयन एयरलाइन्सलाई चीनका थप गन्तव्यका लागि र श्री एयरलाई दिल्ली, कोलकात्ता, अहमदावाद र ढाका उडानका लागि अनुमति दिएको जानकारी दिँदै सरकार सधैं निजी क्षेत्रलाई प्रोत्साहित गर्दै नीतिगत अप्ठ्याराहरु खोल्न तयार रहेको बताए।
उनले आन्तरिक उडानमा विदेशीले तिर्नुपर्ने शुल्कका बारेमा मन्त्रालयले छिट्टै सरोकारवालासँग छलफल गर्ने तयारी गरेको जानकारी पनि दिए।
मन्त्री भट्टराईले नेपाल आउने पर्यटकको साथै सबै यात्रुको सम्मान होस् भन्नका लागि सबैमा सकारात्मक सोचको विकास गराउने उद्देश्यले त्रिभुवन अन्तराष्ट्रिय विमानस्थलमा खटिने सबै क्षेत्र र तहका कर्मचारीलाई तालिम दिने तयारी मन्त्रालले गरेको बताए।
कार्यक्रममा चेम्बर अफ कमर्शका अध्यक्ष राजेश काजी श्रेष्ठले ट्राफिकका कारण विमानलाई धेरै समय आकाशमा होल्ड गराउने र लगेज लिन समय लाग्ने समस्याको सम्बोधन गर्न मन्त्रीको ध्यानाकर्षण गराएका थिए। त्यसैगरी विमानस्थल भित्र रहेको ड्युटी फ्रीलाई प्रभावकारी बनाउन पनि आग्रह गरे।
चेम्बरले पर्यटन वर्ष नजिकिँदै गर्दा पर्यटन प्रवर्द्धनमा निजी क्षेत्रको भूमिका विषयमा अन्तरक्रिया गरेको हो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।