काठमाडौं- इलेक्ट्रिक सवारीमा सरकारले न्यून भन्सार र अन्य करसमेत छुट गर्ने व्यवस्था गरेपछि नेपालमा इलेक्ट्रिक कार भित्रने क्रम बढेको छ। महंगो प्रविधिमा आधारित इलेक्ट्रिक कार वातावरणमैत्री हुने भएकाले सरकारले कर छुट गर्ने नीतिका कारण तुलनात्मक रुपमा सस्ता मूल्यमा भित्रिइ रहेका छन्।
पछिल्लो समय विभिन्न ब्रान्ड तथा कम्पनीका इलेक्ट्रिक सवारी साधन भित्रने क्रम बढेको छ। नेपाली बजारमा महिन्द्रा, किया, बिवाईडी, हुन्डाई, दायलगायत ब्रान्डका इलेक्ट्रिक कार उपलब्ध छन् भने एमजी, टाटालगायतले नाडा अटो शोमा सार्वजनिक गर्ने तयारी गरेका छन्।
दक्षिण कोरियाका दुई ब्रान्ड किया र हुन्डाईले उत्पादन गरेका इलेक्ट्रिक कार बारेमा उल्लेख गरिएको छ। यी दुबै ब्रान्डका सवारी साधन नेपाली बजारमा विगत लामो समयदेखि बिक्री हुँदै आएका छन्।
नेपाली बजारमा हुन्डाईका गाडी लक्ष्मी ग्रुप अन्तर्गतको लक्ष्मी इन्टरकन्टिनेन्टल्सले र कियाका गाडी कन्टिनेन्टल्स ट्रेडिङले बिक्री गर्दै आएका छन्।
हुन्डाईको इलेक्ट्रिक कार कोना केही महिनाअघि नेपाल भित्रिएको थियो। हुन्डाईको आयोनिक इलेक्ट्रिक कार भने गत वर्षको नाडा अटो शोमा सार्वजनिक भएको थियो। त्यस्तै कियाले केही वर्षअघि सोल इभी नेपाली बजारमा ल्याएको थियो। यही साउनमा कियाले विश्व बजारमा निक्कै चर्चा बटुलेको निरो इलेक्ट्रिक कार भित्र्याएको छ।
नेपाली बजारमा हुन्डाईको कोनामा ३९.२ किलोवाट आवर र ६४ किलोवाट आवरको ब्याट्री अप्सनमा उपलब्ध रहेको छ। त्यस्तै कियाको निरो ६४ किलोवाट आवर भएको ब्याट्री अप्सनमा रहेको छ।
यहाँ कुन गाडी उपयुक्त भन्दा पनि निरो र कोनाका विशेषता उल्लेख गरिएको छ।
यी दुवै इलेक्ट्रिक कार क्रसओभर सेगमेन्टका हुन्। यी गाडीमा प्रयोग भएको ब्याट्रीले एक पटकको फुल चार्जमा ४५० किलोमिटर भन्दा बढी माइलेज दिने कम्पनीहरुको दाबी छ। किया निरो र हुन्डाई कोना दुबैमा १५० किलोवाटको मोटर जडान गरिएको छ। उक्त मोटरले २०४ पीएस पावर र ३९५ एनएम टर्क जेनेरेट गर्ने क्षमता राख्छ। कोना र निरोको अधिकतम गति १ सय ७० किलोमिटर प्रतिघन्टा छ।
किया निरोको लेन्थ ४३ सय ५५ एमएम, वाइड १८ सय ५ एमएम, हाइट १५ सय ४४ एमएम रहेको छ। त्यस्तै निरोको ह्विलबेस २७ सय एमएम र ग्राउन्ड क्लियरेन्स १ सय ६० एमएम रहेको छ। होन्डाई कोनाको लेन्थ ४१ सय ६५ एमएम, वाइड १८ सय एमएम र हाइट १५ सय ६५ एमएम रहेको छ। साथै कोनाको ह्विलबेस २६ सय एमएम र ग्राउन्ड क्लियरेन्स १ सय ७० एमएम रहेको छ।
इन्टेरियर
इन्टेरियरको कुरा गर्दा कियाको निरोमा अगाडि र पछाडि बस्ने यात्रीलाई केही बढी लेगरुम तथा हेडरुम उपलब्ध छ। यद्यपि, कोनाको क्याबिनमा निरोको दाँजोमा केही नयाँपन पाउन सकिन्छ।
कोनाको ड्यासबोर्डमा प्रयोग भएको इन्फोटेन्मेन्ट सिस्टम निरोभन्दा केही सानो भएपनि फ्लटिङ भएकाले ड्यासबोर्ड कोनाको उत्कृष्ट देखिन्छ। दुबै क्रसओभरमा डिजिटल ओडोमिटरको प्रयोग गरिएको छ।
एक्सटेरियर
किया निरोको आउटलुक परम्परागत अन्य कार जस्तै छ भने, हुन्डाई कोनामा अगाडिको हेडल्याम्प र पछाडिको टेलल्याम्प स्प्रिट तथा एलइडी रहेकोले ट्रेन्डी देखिएको छ।
निरोको तुलनामा कोनामा प्रयोग भएको कलर फरक रहेकोले सडकमा कोनाले धेरैको ध्यान खिच्न सफल हुने छन्। किया निरोमा सनरुफलगायतका विशेषता पाउन सकिन्छ जुन कोनामा समावेश गरिएको छैन।
मूल्य
समान ब्याट्री पावर तथा इलेक्ट्रिक मोटर भएका यी दुई क्रसओभर हुन्डाई कोना र किया निरो कारको मूल्यमा केही फरक रहेको छ। अहिले नेपाली बजारमा निरोको मूल्य ६८ लाख ९० हजार रहेको छ। कम्पनीले यो मूल्यलाई सुरुवाती मूल्य भनेको छ। हुन्डाईले कोनाको मूल्य भने ५५ लाख ९६ हजार र ६५ लाख ९६ हजार रुपैयाँ तोकिएको छ। कोना दुई ब्याट्री अप्सनमा उपलब्ध रहेकाले मूल्यभन्दा भिन्दै रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
