काठमाडौं- आर्थिक वर्ष २०७४/०७५ मा नेपाल विद्युत प्राधिकरणले ७ अर्ब २० करोड रुपैयाँ खुद मुनाफा कमाएको छ। गत आर्थिक वर्षमा प्राधिकरणले कमाएको खुद नाफा अघिल्लो आर्थिक वर्ष २०७४/७५ को भन्दा १४९ प्रतिशतले बढी हो।
गत आर्थिक वर्षमा प्राधिकरणले गरेको प्रगति समीक्षाका बारेमा जानकारी दिँदै उर्जा, जलश्रोत तथा सिंचाईमन्त्री वर्षमान पुनले प्राधिकरणको खुद मुनाफामा उच्च अंकको वृद्धि भएको बताए।
गत आर्थिक वर्षमा प्राधिकरणमार्फत सरकारको ढुकुटीमा सवा १ अर्ब रुपैयाँ, विगत वर्षहरुको ब्याजसमेत १३ अर्ब १६ करोड र रोयल्टीबापत १ अर्ब ४४ करोड रुपैयाँ गरी जम्मा १५ अर्ब ५९ करोड रुपैयाँ जम्मा भएको पुनको भनाई छ।
विद्युत चुहावट नियन्त्रणमा पनि प्राधिकरणले प्रगति हासिल गरेको छ। गत आर्थिक वर्षमा विद्युत चुहावट १५ दशमलव ३२ प्रतिशत कायम भएको छ। जुन अघिल्लो आर्थिक वर्षको विद्युत चुहावट २० दशमलव ४५ प्रतिशतले भन्दा ५ दशमलव १३ प्रतिशतले कम हो। आर्थिक वर्ष २०७२/७३ मा कुल चुहावट २५ दशमलव ७८ प्रतिशत रहेकोमा पछिल्लो ३ वर्ष अवधिमा १० दशमलव ४६ प्रतिशतले चुहावटमा कमी आएको छ।
गत असार मसान्तसम्ममा राष्ट्रिय प्रशारणलाइनमा आबद्ध भई विद्युत उपभोग गर्ने जनसंख्या ७८ प्रतिशत रहेको छ। यो गत वर्षको तुलनामा करिब १० प्रतिशत बढी हो।
गत आर्थिक वर्षमा भएको कुल विद्युत खपतमा भारतबाट आयातित विद्युतको योगदान सबैभन्दा बढी छ। गत आर्थिक वर्षको कुल विद्युत उपलब्धता ७ अर्ब ५५ करोड युनिट किलोवाट घन्टा रहेकोमा नेपाल विद्युत प्राधिकरणको उत्पादन २ अर्ब ५५ करोड, निजी क्षेत्रको उत्पादनबाट २ अर्ब १९ करोड र भारतबाट २ अर्ब ८१ करोड किलोवाट आवर युनिट विद्युत आयात गरिएको छ।
गत आवमा प्राधिकरणले गरेको विद्युत खरीदको अवस्था हेर्दा नीजि उत्पादकहरुबाट १४ अर्ब १३ करोड र भारतबाट २३ अर्ब ३ करोड रुपैयाँ बराबरको आयात गरिएको विद्युत खरीद गरिएको छ। यस अवधिमा नेपालले ३२ करोड रुपैयाँ बराबरको विद्युत भारत पठाइएको छ।
गत आर्थिक वर्षमा प्रशारणलाइनतर्फ करिब ७ सय ५७ सर्किट किलोमिटर लाइन सम्पन्न भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
