काठमाडौं- वाणिज्य बैंकहरुको छाता संगठन नेपाल बैंकर्स संघका अध्यक्ष ज्ञानेन्द्र ढुंगानाले बैंकिङ क्षेत्रमा समस्या दोहोरिइरहेको भन्दै यसको स्थायी समाधान खोज्नुपर्ने बताएका छन्।
‘हामीले अहिलेसम्म समस्या आउनुको कारण नै नखोजी क्षणिक समाधान खोज्यौ,’ कृषि विकास बैंकको वार्षिकोत्सव कार्यक्रममा बोल्दै उनले भने, ‘त्यसैले बैंकहरुमा बारम्बार समस्याहरू दोहोरिइरहेका छन्।’
वाणिज्य बैंकहरुको पुँजी वृद्धि भए पनि सोही अनुसार निक्षेप तथा कर्जा विस्तार हुन सकेको छैन। निक्षेप र कर्जाबीचको असन्तुलनका कारण बैंकिङ क्षेत्रले कहिले तरलता अभाव र कहिले क्रेडिट क्रन्चको समस्या भोगिरहेको अध्यक्ष ढुंगानाले बताए।
बैंकिङ क्षेत्रमा देखिएको क्रेडिट क्रन्चको समस्या छिटो समाधान नगर्ने हो भने सरकारले लिएको आर्थिक वृद्धि र मौद्रिक नीतिले लिएको कर्जा वृद्धिको लक्ष्य हासिल गर्न कठिन हुने ढुंगानाले चेतावनी दिए। यसको स्थायी समाधानका लागि संघले अर्थ मन्त्रालय र नेपाल राष्ट्र बैंकका सुझाव बुझाएको र त्यसलाई छिटो कार्यान्वयमा ल्याउन पनि उनले जोड दिएका छन्।
वार्षिकोत्सवमा बोल्दै अर्थमन्त्री ज्ञानेन्द्रबहादुर कार्कीले राष्ट्रको आवश्यक्ता र ग्राहकको चाहना अनुसार बैंकहरुले सेवा प्रवाह गर्न निर्देशन दिए। दुर्गम तथा गरिब जनतामा बैंकिङ सेवा पुर्याउन र वित्तीय साक्षरता अभिवृद्धिका लागि समेत काम गर्न पनि कार्कीले निर्देशन दिए ।
२०२४ माघ ७ गते स्थापना भएको बैंक आइतबारबाट ५१ औं वर्षमा प्रवेश गरेको हो। हाल २५३ शाखा र २ हजार ७७६ कर्मचारीमार्फत बैंकिङ सेवा दिइरहेको बैंकले आर्थिक वर्ष २०७३/०७४ सम्ममा ९९ अर्ब ९२ करोड निक्षेप संकलन तथा १ खर्ब ९ अर्ब कर्जा लगानी गरी २ अर्ब ७८ करोड खुद नाफा गरेको छ।
बैंकले वाणिज्य बैंकिङ सेवाको अतिरिक्त नेपाल सरकारको प्राथमिकतामा रहेका कृषि, लघुवित्त लगायतका क्षेत्रमा पनि लगानी गरिरहेको जनाएको छ। कृषि क्षेत्रमा मात्र ३३ प्रतिशत कर्जा लगानी रहेको बैंकका प्रमुख कार्यकारी अधिकृत (सिइओ) लीलाप्रकाश सिटौलाले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
