काठमाडौं– 'महिला आत्मनिर्भरताका लागि पर्वतारोहण' भन्ने नाराका साथ ३ महिला पर्वतारोहीले सगरमाथा आरोहण गर्ने भएका छन्।
लाक्पा याङ्जी शेर्पाको नेतृत्वमा याङ्डी शेर्पा र पासाङ ल्हामु शेर्पा आगामी अप्रिल ७ (चैत २४) देखि सगरमाथाको आरोहण गर्न लागेका हुन्।
आरोहणको नेतृत्व गरेकी लाक्पा याङ्जीले पर्यटन क्षेत्रको प्रवर्द्धनका साथै पर्यटन क्षेत्रमा महिलाहरुको सहभागिता वृद्धि गराउने लक्ष्यका आरोहण गर्न लागेको जानकारी दिइन्। आरोहण दलका सदस्यहरु याङ्डी र पासाङ ल्हामुले पनि महिलाहरुको सशक्तिकरणको विषयलाई आफूहरुले प्राथमिकता दिएको बताए।
आरोहणका क्रममा र आरोहणपछि फर्किसकेपछि वैदेशिक रोजगारीबाट फर्किएका पीडित महिला, दलित महिला र एकल महिलालाई सहयोग गर्ने उद्देश्य रहेको उनीहरुले शुक्रबार गरिएको पत्रकार सम्मेलनमा जानकारी गराए। त्यस्ता महिलाहरुलाई पर्यटन क्षेत्रमा आकर्षित गराई उनीहरुको आयआर्जन वृद्धि गराउँदै यसै क्षेत्रबाट आत्मनिर्भर गराउन लागिपरेको उनीहरुको भनाइ थियो।
मौसमले साथ दिएमा मे १८ मा समिटमा पुग्ने उनीहरुको अनुमान छ। एसेन्ट हिमालयन ट्रेक एन्ड एक्सपिडिसन कम्पनीमार्फत उनीहरु आरोहणमा जान लागेका हुन्। एभरेस्ट हार्डवेयरले आवश्यक सबै सामान उपलब्ध गराउने बताइएको छ। आरोहण क्रममा प्रतिव्यक्ति ३७ लाख ३७ हजार ५ सय रुपैंया र ३ जनाको गरी कुल १ करोड १२ लाख १२ हजार ५ सय रुपैंया खर्च हुने उनीहरुले बताए।
संस्कृति,पर्यटन तथा नागरिक उड्डयन मन्त्रालय, पर्यटन विभाग, नेपाल पर्यटन बोर्ड, नेपाल पर्वतारोहण संघ (एनएमए), ट्रेकिङ एजेन्सिज एसोसियसन अफ नेपाल (टान), नेपाल नेशनल माउन्टेन गाइड एसोसिएसन (एनएनएमजिए), नेपाल माउन्टेनेरिङ इन्सट्रक्टर एसोसिएसन लगायत संस्थाहरुले उनीहरुलाई सहयोग गर्दैछन्।
जुन २ सम्ममा सगरमाथा आरोहण सम्पन्न गरी काठमाडौं फर्किने उनीहरुको कार्यक्रम रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
